ოზურგეთის ისტორიულ მუზეუმში საჯარო ლექცია – „ვინ იყო ბენია ჩხიკვიშვილი“ (გმირის აღმოჩენა) გაიმართა. მომხსენებელი კინორეჟისორი, მწერალი, მკვლევარი, არაერთი წიგნისა და ფილმის ავტორი ირაკლი მახარაძე იყო.
ირაკლი მახარაძემ ბენია ჩხიკვიშვილის შესახებ დღემდე ნაცნობი და უცნობი ამბები მოუთხრო საზოგადოებას.
„მთავარია, რაც შეიძლება, მეტმა ადამიანმა იცოდეს საქართველოს ყველაზე პატარა კუთხის დიდი ისტორიული ამბების შესახებ და ჩვენი მხარის შესახებ ნებისმიერ ადამიანს გააცნოს.
ბენია იყო ჩვენი ქვეყნის თავისუფლებისთვის მებრძოლი, რის გამოც თავი შესწირა. სამწუხარო ის არის, რომ მის შესახებ ძალიან ბევრმა ადამიანმა არ იცის და ასევე, ნაკლებად იციან მის შესახებ გურიაში.
ბენია ჩხიკვიშვილი სადაც იყო თანამდებობაზე, ყველგან დატოვა თავისი კვალი. მინდა ვთქვა, რომ ის იყო განათლებული და გავლენიანი ადამიანი იმდროინდელ საქართველოში.
ის იყო გურიის რესპუბლიკის პრეზიდენტი… 1917 წელს გახდა სოხუმის მერი. იმდენად უყვარდათ ბენია სოხუმელებს და პატივს სცემდნენ, რომ მის საპატივცემულოდ ახალშობილებს მის სახელს არქმევდნენ.
1919 წელს ის ხდება თბილისის არჩეული მერი. ასევე წლების შემდეგ ბათუმის ოლქის შემოერთების შემდეგ დანიშნეს ბათუმის ოლქის გენერალ–გუბერნატორად.
1921 წელს ბენია ჩხიკვიშვილს იძულებით მოუხდა წასვლა ემიგრაციაში 1924 წელს ის ბრუნდება საქართველოში და ეს იყო მისთვის საბედისწერო ჩამოსვლა. რუსებმა ის თავის მეგობრებთან ერთად დახვრიტეს. ამ დრომდე უცნობია მისი დასაფლავების ადგილი“, _ აღნიშნა ირაკლი მახარაძემ.
ლექციის დასასრულს, ირაკლი მახარაძემ დააანონსა, რომ ხვალ ქალაქ ოზურგეთში გაიხსნება ბენია ჩხიკვიშვილის ბიუსტი და ნაჩვენები იქნება ფილმი „ბენია“.
ავტორი
