„პროგრესის ცენტრი“ ფრიდრიხ ებერტის ფონდის დახმარებით ახორციელებს პროექტს „მინიმალური ხელფასი საქართველოში“. პროექტის ფარგლებში კი მიმდინარეობს ვიდეო კამპანია, რომელშიც ჩართულნი არიან სხვადასხვა ორგანიზაციები, მათ შორის არასამთავრობო ორგანიზაცია „გილდია“, რომლის მთავარი მიმართულება შრომის უფლებებია.
ორგანიზაციის თავმჯდომარე გიგა ბექაური ვიდეოს ავრცელებს, სადაც საუბრობს კულტურის ინდუსტრიაში დასაქმებული ადამიანების შრომით უფლებებზე. ვიდეოში ნათქვამია, რომ „კულტურის შესახებ საქართველოს კანონის 31-ე მუხლის მე-4 პუნქტი ადგენს სახელფასო მინიმუმს კულტურულ/შემოქმედებით სფეროში დასაქმებულთათვის, რომლის მიხედვით, მინიმალური ხელფასი უნდა იყოს საჯარო სექტორის საშუალო შემოსავალზე მაღალი, ანუ 1000 ლარზე მეტი. ორგანოზაციის თავმჯდომარე ამბობს, რომ ეს ჩანაწერი მხოლოდ კანონში არსებობს და რეალურად არ ხორციელდება, რადგან ორგანიზაციის კვლევით კულტურის სფეროში დასაქმებული ხელოვანის საშუალო ანაზღაურება 570 ლარია, რაც ბევრად ჩამორჩება ქვეყანაში არსებულ ზოგად საშუალო ანაზღაურებასა და ეკონომიკის თითქმის ყველა სფეროში არსებულ დონეს:
„ხშირ შემთხვევაში კულტურის სფეროში დასაქმებულები ღებულობენ საარსებო მინიმუმზე ნაკლებ ხელფასსაც კი. ეს რიცხვები პირდაპირ მეტყველებენ იმაზე, თუ რამდენად მძიმეა ხელოვანთა შრომის პირობები, მითუმეტეს მაშინ, როდესაც მათი მინიმალური თვიური ანაზღაურება მერყეოობს 150 ლარიდან 300 ლარამდე“ – ნათქვამია“გილდიას“ განცხადებაში.
ორგანიზაციის პოზიციით, მინიმალური ანაზღაურება კულტურის სფეროში უნდა დადგინდეს საათობრივად და მან პირველ ეტაპზე უნდა შეადგინოს საათში დარიცხული ხუთი ლარი. სრულ განაკვეთზე მომუშავე ხელოვანი ყოველთვიურად მინიმალური ხელფასის სახით მიიღებს დარიცხულ 800 ლარს: „ცხადია, არც 800 ლარია ბევრი ან საკმარისი, მაგრამ ამ თანხით ხელოვანი შეძლებს მინიმლურის მიღებას, რათა შეძლოს ძალებისა და უნარების მიმართვა შემოქმედებით პროცესზე“.
[sexy_author_bio]
