„წინ, წარსულისკენ-ღირსეული მომავლისათვის… თავისუფლებით, რწმენით, განათლებით, მოყვასისა და სამშობლოს სიყვარულით!“ _ ეს ინვალიდთა ასოციაცია „ღვთისშვილთა კავშირის“ დევიზია, რომელსაც 2019 წლის 26 სექტემბერს 30 წელი შეუსრულდა.
საიუბილეო შეხვედრა ორგანიზაციამ საქართველოს პარლამენტის ეროვნული ბიბლიოთეკის დამოუკიდებლობის დარბაზში გამართა.
როგორც ასოციაციის დამფუძნებლის, ზაზა სიხარულიძის მეუღლემ და „ღვთისშვილთა კავშირის“ ახლანდელმა ხელმძღვანელმა, ნონა კენჭუაშვილმა აღნიშნა, დამოუკიდებლობის დარბაზი საიუბილეო მიღების გასამართად განგებ შეარჩია, რადგან ასოციაცია 1989 წლის 26 სექტემბერს დაარსდა, ანუ მაშინ, როდესაც 9 აპრილი უკვე მომხდარი იყო, 27 სექტემბერი კი სოხუმის დაცემის დღეა, ამიტომაც ღონისძიება ომში დაღუპული გმირების საპატივცემულოდ წუთიერი დუმილით დაიწყო.
ასოციაციის იუბილეზე მისულმა სტუმრებმა ზაზა სიხარულიძის ხსოვნას პატივი მიაგეს, ასოციაციის ხელმძღვანელმა კი ქვეყნის ისტორიასა და ინვალიდთა ასოაციაციაში შეტანილი განსაკუთრებული წვლილისათვის საპატიო სიგელით დააჯილდოვა რამდენიმე მოქალაქე დააჯილდოვა, რომელთა შორისაცაა აფხაზეთის ომში დაღუპული შვილის დედა, ლამარა (ივლიტა) კახიანი.
სრულიად საქართველოს ღვთისშვილთა კავშირი (ინვალიდთა ასოციაცია) იცავს და ხელს უწყობს საქართველოში მცხოვრებ შეზღუდული შესაძლებლობების მქონე პირთათვის თანაბარ შესაძლებლობათა, თანასწორობის, თანაბარი უფლებებისა და ძირითადად თავისუფლებათა რელიზების, მათი თანდაყოლილი პიროვნული ღირსების პატივისცემის უზრუნველყოფას.
ასოციაცია მიზნად ისახავს შშმ, მათ შორის ბავშვთა და მოზარდთა, სხვა მოწყვლად ჯგუფებს მიკუთვნებულ პირთა ფსიქო-სოციალურ რეაბილიტაცია-ადაპტაციას, სტიმულირებას, აქტივობის ამაღლებას, ფორმალურ და არაფორმალურ საგანმანათლებლო პროცესში ჩართვით მათი თვითუზრუნველყოფის შესაძლებლობების გაძლიერებას, დასაქმების ხელშეწყობასა და ცხოვრების ხარისხის გაუმჯობესებას.
ცნობისთვის, 1989 წლის 26 სექტემბერს ბავშვობიდან შეზღუდული შესაძლებლობების მქონე პირის (I ჯგუფის ინვალიდის), პოეტისა და აკადემიკოს გიორგი წერეთლის სახელობის აღმოსავლეთმცოდნეობის ინსტიტუტის მეცნიერ-თანამშრომლის, ზაზა სიხარულიძის ინიციატივით დაფუძნდა სრულიად საქართველოს რუსთაველის საზოგადოებასთან არსებული ინვალიდთა ასოციაცია, რითაც საფუძველი ჩაეყარა შეზღუდული შესაძლებლობების მქონე პირთა მოძრაობას საქართველოში.
ასოციაციის ემბლება/გერბი კი საქართველოს სახალხო მხატვარმა, მოქანდაკე გიორგი შხვაცაბაიამ შექმნა.
ასოციაცია დაარსებიდან რანდენიმე თვეში გაფართოვდა ორგანიზაციულ-სტრუქტურულად და მოიცვა მთელი საქართველო, რის შემდეგაც, გამოეყო რუსთაველის საზოგადობას და 1990 წლის 30 ივნისიდან დღემდე, ფუნქციონირებს როგორც სრულიად საქართველოს ღვთისშვილთა კავშირი (ინვალიდთა ასოციაცია).
ასოციაციას წარმომადგენლები ჰყავდა ეროვნულ ფორუმში, ეროვნულ კონგრესში, სახელმწიფო საბჭოში. 1992-1995 წლის მოწვევის პარლამენტში და სწორედ ამ ორგანიზაციის ინიციატივით მიიღო პარლამენტმა პირველი და მოქმედი კანონი „შეზღუდული შესაძლებლობების მქონე პირთა სოციალური დაცვის შესახებ“.
როგორც „გურია ნიუსთან“ საუბარში „ღვთისშვილთა კავშირის“ ხელმძღვანელი, ნონა კენჭუაშვილი ამბობს, ამ 30 წლის განმავლობაში იყო წარმატებებიც, თუმცა ასოციაციას ბევრი სირთულე შეხვდა.
„იყო სირთულეები, დიდი წარმატება, იყო შეფერხებები, ვარდნა და 2012 წლის შემდეგ როცა ოფისი დაენგრა „ღვთისშვილთა კავშირს“ ფაქტობრივად ნულიდან მოგვიწია ბევრი რამის კეთება, რადგან პრაქტიკულად განადგურდა მატერიალურ-ტექნიკური ბაზა ჩვენი ორგანიზაციისა, მაგრამ დარჩა ადამიანური რესურსი, დარჩა გამოცდილება და შესაბამისად, ისევ დავდექით იმ რელსებზე, რაც საქმის კეთების საშუალებას გვაძლევს“,_ ამბობს კენჭუაშვილი და აღნიშნავს, რომ შშმ პირების ირგვლივ არსებული ვითარება 1990-იან წლებთან შედარებით შეცვლილია, თუმცა, გასაკეთებელი კიდევ ბევრია.
„1990-იან წლებთან შედარებით ვითარება რადიკალურად განსხვავებულია. აღარ ვილაპარაკებ იმაზე, რომ მაშინ იყო დიდი ზომის ინსტიტუციები, არა ადაპტირებული გარემო, ოჯახში შშმ პირის ყოლას მალავდნენ. დღეს რადიკალურად შეცვლილია მდგომარეობა, მაგრამ მიუხედავად ამისა, ვერ ვიტყვით, რომ ყველაფერი არის კარგად. ბევრი რამ არის გასაკეთებელი და რასაც რადიკალურად ხაზს ვუსვამ, არის ის, რომ მინდა სიკეთეები რაც ამ ადამიანებისთვის დედაქალაქში ხელმისაწვდომია, დედაქალაქისგან ყველაზე შორეულ ადგილას მცხოვრებ შეზღუდული შესაძლებლობის მქონე უფროსს თუ ბავშვსაც ჰქონდეს“,_ ამბობს კენჭუაშვილი.
