„თუ სალომე ზურაბიშვილი ფიქრობს, რომ „ქართული ოცნება“ 2020 წელის არჩევნებს კვლავ მოიგებს და ბიძინა ივანიშვილი პოლიტიკიდან თავისი კეთილი ნებით წავა, ეს ილუზიაა“, _ აღნიშნა „გურია ნიუსთან“ პოლიტიკის ექსპერტმა გია ხუხაშვილმა.
ამასთან, ექსპერტი აღნიშნავს, რომ 2020 წლის საპარლამენტო არჩევნებში „ქართულ ოცნებას“ გამარჯვების პერსპექტივა არ აქვს.
_ ბატონო გია, საქართველოს პრეზიდენტი სალომე ზურაბიშვილი ბიძინა ივანიშვილთან გამართული აუდიენციის შესახებ ალაპარაკდა. მისი თქმით, პარტიის ლიდერი პოლიტიკას 2020 წლის საპარლამენტო არჩევნების შემდეგ დატოვებს. თქვენი აზრით, ბიძინა ივანიშვილს რაში უნდა აწყობდეს პოლიტიკიდან თუნდაც ფორმალურად კვლავ დისტანცირება? მით უფრო, როცა აღნიშნული, პარტია „ქართულ ოცნების“ მმართველობის დასასრულს დააჩქარებს.
_ ერთი მხრივ, თუ სალომე ზურაბიშვილი იმას გულისხმობს, რომ 2020 წელს „ქართული ოცნების“ დამთავრების შემდეგ ბიძინა ივანიშვილი პოლიტიკიდან წავა, ასეთ მოსაზრებას გავიზიარებ, რადგან საპარლამენტო არჩევნებში მმართველი პარტიის პოლიტიკურ პერსპექტივას ეჭვის თვალით ვუყურებ, მაგრამ, მეორე მხრივ, თუ ზურაბიშვილი ფიქრობს, რომ „ქართული ოცნება“ 2020 წელის არჩევნებს კვლავ მოიგებს და ბიძინა ივანიშვილი პოლიტიკიდან თავისი კეთილი ნებით წავა, ეს ილუზიაა. შესაბამისად, გააჩნია, როგორ შემთხვევასთან გვაქვს საქმე. სამწუხარო ის არის, რომ დღეს ბრძოლა მიდის არა ქართული სახელმწიფოს გადარჩენისთვის, არამედ ძალაუფლების მოპოვებისთვის, რისთვისაც „ქართული ოცნება“ იბრძვის.
_ სახალხო დამცველის, ნინო ლომჯარიას ყოველწლიურ ანგარიშში ისეთი გამოუძიებელი საქმეები მოხვდა, როგორებიცაა: საქართველოს პირველი პრეზიდენტის, ზვიად გამსახურდიას, აფგან მუხთარლის, თემირლან მაჩალიკაშვილის, ხორავას ქუჩაზე მომხდარი მკვლელობისა და სხვათა საქმეები. აგრეთვე, ამ მწვავე ანგარიშში პოლიტიკური ნიშნით დევნის შემთხვევებზე და წინასწარი დაკავების იზოლატორში არაადამიანური მოპყრობის მაჩვენებლის ზრდაზეა საუბარი. თქვენი აზრით, რაზე მეტყველებს ისეთ სენსიტიურ საკითხებზე ხელისუფლებისა და საგამოძიებო ორგანოების გულგრილობა, როგორიც აღნიშნული საქმეებია?
_ სახალხო დამცველის ანგარიში ერთ-ერთი სიმპტომია იმისია, რომ „ქართული ოცნების“ მმართველობითი სისტემა ღრმა კრიზისშია. ეს ხელისუფლება სამართალმემკვიდრე გახდა იმ მანკიერი სისტემის, რომელიც დამახასიათებელი იყო წინა ხელისუფლებისთვის. განსხვავება იმაშია, რომ მაშინ სახალხო დამცველი საკუთარ ანგარიშში ბოლომდე სიმართლეს ვერ წერდა, დღეს კიდევ აღნიშნულს ამას ბედავს, რაც თავისთავად პოზიტიურია.
_ პარლამენტის თავმჯდომარის მიერ ინიცირებული კანონპროექტი “საერთო სასამართლოების შესახებ“, რომელიც უზენაეს სასამართლოში მოსამართლეების განმწესების წესს ითვალისწინებს, პარლამენტში პირველი მოსმენით უკვე მიიღეს. ამ ფონზე, ხომ არ ჩნდება განცდა, რომ მმართველი პარტიის უმრავლესობა ვენეციის კომისიის რეკომენდაციების გათვალისწინებას არ აპირებს?
_საერთოდ კანონპროექტის ძირითად საკითხად განხილვა არასწორია, რადგან ჩვენ მართლმსაჯულების სისტემაში გყავდეს ადამიანები, რომლებსაც აქვთ უნარები ნებისმიერი კანონპროექტი საკუთარ ინტერესებს მოარგონ. აქედან გამომდინარე, თუ იუსტიციის უმაღლესი საბჭო სისტემიდან არ გაიხვეტა, რა კანონიც არ უნდა მიიღონ, სისტემის კონტროლის ბერკეტი ხელში კვლავ ოდიოზურ მოსამართლეებს ექნებათ. მთავარი მოთხოვნა საბჭოს ცვლილება უნდა ყოფილიყო, როგორც პროცედურულ, ასევე პერსონალურ დონზე. სანამ იუსტიციის უმაღლეს საბჭოს ლევან მუსურიძე და მიხიელ ჩინჩალაძე აკონტროლებენ, სისტემას არაფერი ეშველება.
_ უკრაინის საპრეზიდენტო არჩევნებში ლიდერობს ვლადიმერ ზელენსკი, რომელიც საქართველოს ყოფილი პრეზიდენტის, მიხეილ სააკაშვილის მიმართ დადებითად არის განწყობილი და დიდია ალბათობა იმისა, რომ ზელენსკის გაპრეზიდენტებამ უკრაინაში სააკაშვილის დაწინაურება გამოიწვიოს. აღნიშნული როგორ იმოქმედებს საქართველოსა და უკრაინას შორის არსებულ ურთიერთობებზე?
_მიხეილ სააკაშვილის ფაქტორმა არამგონია, რომ საქართველოსა და უკრაინას შორის ურთიერთობების გაფუჭება შეძლოს. გასაგებია, რომ ხელისუფლებისთვის ყოფილი პრეზიდენტის დაწინაურება პრობლემატური იქნება, მაგრამ ერთია „ქართული ოცნების“ ინტერესები და მეორე სახელმწიფოებს შორის არსებული ურთიერთობა. ხელისუფლებას არ აქვს უფლება იმისა, რომ ქვეყნებს შორის ურთიერთობა მიხეილ სააკაშვილს გადააყოლოს.
