ფსიქოლოგები და ნოვატორი მასწავლებლები დიდი ხანია ამბობენ, რომ სკოლის ნიშნები სუბიექტური და შეზღუდული კრიტერიუმია მოსწავლის ცოდნის შესაფასებლად. ცოდნა, რა თქმა უნდა, მნიშვნელოვანია, მაგრამ არსებობს მინიმუმ ხუთი მიზეზი, რომლებიც ყოფილ „ოროსანს“ ცხოვრებაში წარმატების მიღწევაში დაეხმარება.
რა თქმა უნდა, ეს იმას არ ნიშნავს, რომ უსწავლელობა სასარგებლოა და სწავლა – უსარგებლო, მაგრამ ეს არის თვისებები, რომლებსაც ცოდნაზე არანაკლები ძალა აქვთ და რომელთა არქონაც მცოდნე ადამიანსაც შეუშლის ხელს წარმატების მიღწევაში.
ხუთი მიზეზი, რომლებიც ყოფილ „ოროსანს“ ცხოვრებაში წარმატების მიღწევაში დაეხმარება
ის შეჩვეულია ლანძღვას
ზრდასრულ ასაკში, ამას “კრიტიკა” ეწოდება. მას საკმაოდ ბევრი საყვედური ესმოდა სკოლის წლებში და იცის, როგორ გაუძლოს ამას. კრიტიკით მას ვერც ხასიათს გაუფუჭებთ, ვერც დააბნევთ, ვერც იმედს მოუკლავთ და ვერც გეგმებზე ააღებინებთ ხელს.
მის ადგილას წარჩინებული მოსწავლე წარმოვიდგინოთ, რომელსაც სკოლის წლებში ქების მეტი არაფერი მოუსმენია. ახლა კი სამსახურში მოულოდნელად გახდა უფროსების კრიტიკის ობიექტი. ასეთ სიტუაციაში ის დაიბნევა და შესაძლებელია, სწრაფად დანებდეს.
ყოფილი „ოროსანი“ კი არც კი მიაქცევს ყურადღებას კრიტიკის ფორმას. ყურში მარტო იმას „შეუშვებს“, თუ რაღაცის გამოსწორებას ან გადაკეთებას სთხოვენ და მაშინვე მოქმედებაზე გადავა. ხოლო თუ მისი პროექტი ჩავარდება, ბევრად უფრო ადვილად გადაიტანს ამას.
იცის შეთანხმების დადება და დახმარების თხოვნა
ოფიციალური ენით თუ ვიტყვით, ეს „ამოცანების შემსრულებლისთვის გადაბარებაა“. ის მიჩვეულია, რომ საშინაო დავალებას სხვა წერს, მაგრამ ის კი იყენებს, იცის, ვისთან უნდა დაჯდეს შემაჯამებლების წერისას. ამ ყველაფრისთვის საჭიროა უბრალოდ, კარგ ურთიერთობაში იყოს მათთან, ვისაც დახმარებისთვის უნდა მიმართოს. იმასაც აცნობიერებს, რომ როცა მათ დასჭირდება, თავადაც უნდა დაეხმაროს რამეში.
მომავალში ეს ჩვენი „ყოფილი ოროსანი“ სწრაფად შეძლებს ეფექტური გუნდის შეკრებას, რომელიც მისი ხელმძღვანელობით კარგ შედეგებს დადებს. შესაბამისად, ის უფრო ფასეული იქნება უფროსობისთვის, ვიდრე ყოფილი ფრიადოსანი, რომელიც მიჩვეულია, რომ ყველაფერი თავის თავზე აიღოს. ბუნებრივია, ერთი ადამიანის გაკეთებულ საქმეს რამდენიმე ადამიანის ნაშრომი აჯობებს ხარისხითაც და შესრულების ტემპითაც.
იცის, როგორ მოძებნოს სწრაფი გამოსავალი ნებისმიერი სიტუაციიდან
ხუთ წუთში რომ დაფასთან უნდა გაგიძახონ, შენ კი წიგნიც არ გადაგიშლია, ამ სიტუაციიდან როგორ უნდა გამოძვრე?
შეგიძლიათ პირდაპირ აღიაროთ, რომ არ ისწავლეთ გაკვეთილი და დამსახურებული „ორიანი“ მიიღოთ ან გახვიდეთ დაფასთან და კლასში მოსმენილის თუ კლასელის ნაკარნახევის საფუძველზე რაღაცის მოყოლა სცადოთ. განსხვავებული აზროვნება, ცნობილი ფაქტებიდან ახლებური დასკვნების გამოტანის უნარი არის ის, რასაც ახლა დამსაქმებლები უფრო მეტად აფასებენ, ვიდრე წითელი დიპლომს და სერთიფიკატებს.
ის არ მეწვრილმანე და არ ისწრაფვის იდეალისკენ
მათემატიკაზე და ინგლისურზე სიარული, ცეკვა, სპორტი, პროექტები, აქტივობები, პარალელურად ყველა გაკვეთილის სწავლა და საშინაო დავალებების მომზადება – ასეთია „ფრიადოსნის“ ცხოვრება. სამსახურში ასეთი ადამიანი ყველა დავალებას თავის თავზე იღებს და ცდილობს, ყველას გამოადგეს, ყველა კმაყოფილი ჰყავდეს და ძალიან ცოტა შანსია, ამ ყველაფერს მართლაც თავი გაართვას. პერფექციონიზმს ყოველთვის წარმატებასთან არ მივყავართ.
ხოლო მან, ვინც ჯილდოს და „ოქროს მედალს“ არ ელოდება , პრიორიტეტების შერჩევა იცის. მოსწავლე, რომელიც ცუდად სწავლობს და რომელსაც რეგულარულად ახსენებენ მომამალში „ქუჩების დაგვის“ კარიერას, უკვე ხვდება, რომ რაღაც აუცილებელი და ყველაზე მნიშვნელოვანი უნდა ამოარჩიოს, გააანალიზოს ძლიერი და სუსტი მხარეები და იმაზე დაფიქრდეს, რაც კარგად გამოუვა.
მისგან არაფერს ელოდებიან
უცნაურია, მაგრამ ზოგჯერ ამას წარმატებამდე მივყავართ. სკოლის წარჩინებულ მოსწავლეებს პასუხისმგებლობის ტვირთი აწევთ. მასწავლებლები ელიან, რომ ისინი ყოველთვის მზად იქნებიან გაკვეთილისთვის, გამოცდისთვის, ოლიმპიადისთვის. მშობლები უკვე სიზმარში ხედავენ, როგორ აღებს მათი შვილი პრესტიჟული უნივერსიტეტის კარს და წარჩინებით ამთავრებს. რთულია იყო საუკეთესო სტუდენტი, ყველას რაღაც სჭირდება შენგან. „ჩამორჩენილს“ ამ მხრივ ბევრად უადვილდება: განსაკუთრებულ იმედებს მასზე არ ამყარებს, თავისუფალია ვალდებულებებისგან და ამიტომ მზადაა დაუგეგმავად იცხოვროს, გარისკოს, ინტუიციას მოუსმინოს და საკუთარ შეცდომებზე ისწავლოს.
რატომ არ უნდა მიაქციოთ ყურადღება ცუდ შეფასებებს?
სკოლაში მიღებული შეფასების სისტემა ძირითადად, მიკერძოებულია: ის არ ასახავს ბავშვის ცოდნისა და უნარების მთელ სპექტრს, ასევე არ ითვალისწინებს გარემო პირობებს, მოსწავლის მორალურ და ფიზიკურ მდგომარეობას.
ჩვენ ვხედავთ, რომ ბავშვები, რომლებიც არ ისწრაფვიან მაღალი შედეგისთვის ყველა საგანში, უფრო მოქნილები არიან, სამყაროს უფრო ფართოდ უყურებენ. თქვენც უნდა ისწავლოთ პრიორიტეტების განსაზღვრა და არ იბრძოლოთ ნიშნებისთვის, რომლებიც ბევრ რამეს არ ითვალისწინებენ.
ადამიანი ბედნიერი და წარმატებულია, როცა მოთხოვნადია, აკეთებს იმას, რაც სიამოვნებას ანიჭებს, როცა ურთიერთგაგება და ჰარმონია აქვს მის გარშემო არსებულ სამყაროსთან. და თანამედროვე საზოგადოებაში წარმატების მისაღწევად, პირველ რიგში, არა სკოლის ნიშნები, არამედ პიროვნული თვისებები დაგვეხმარება: გამძლეობა, ყურადღების კონცენტრირებისა და მართვის უნარი, ადაპტაციის უნარი, მოქნილობა კრიტიკულ სიტუაციაში. გარდა ამისა, სამყაროში, სადაც ადამინები სანახევროდ ონლაინრეჟიმში ცხოვრობენ, უფრო მნიშვნელოვანია, ასწავლოთ ბავშვს თანამშრომლობა, თანაგრძნობა, ერთობლივი და გუნდური საქმიანობა.
წყარო: mshoblebi.ge
