ამ კვირიდან, ჩოხატაურის მუნიციპალიტეტის მერია ა(ა)იპ-ების რეორგანიზაციას იწყებს. როგორც გვითხრეს, არსებული 14 ორგანიზაციიდან 9 უნდა დარჩეს.
ა(ა)იპ-ებში შესაბამისი გაფრთხილებები უკვე დარიგებულია. მერიაში არ აკონკრეტებენ, თუ რომელი ორგანიზაციების შერწყმა მოხდება, თუმცა, ფინანსთა სამინისტროდან მოსული რეკომენდაციის თანახმად, აუცილებელია, რომ ერთ სივრცეში მოექცნენ სახელოვნებო სკოლები; ასევე სპორტული დაწესებულებები.
როგორც მუნიციპალიტეტის მერიაში გვითხრეს, ჯერ საბოლოო სტრუქტურა ჩამოყალიბებული არ აქვთ და ამაზე მსჯელობა ამ კვირაში დაიწყება.
ერთადერთი, რაც მერიაში დაზუსტებით იციან, ისაა, რომ გაერთიანებები რამდენიმე დღეში უნდა დასრულდეს და საკრებულოს იანვრის სხდომაზე სტრუქტურა დასამტკიცებლად უნდა გავიდეს.
ასევე, ცნობილია, რომ რეორგანიზაციას შემცირებებიც მოჰყვება, რომელიც ძირითადად ადმინისტრაციულ ნაწილზე აისახება.
ამ დროისთვის უცნობია, რა თანხა დაიზოგება ა(ა)იპ-ების გაერთიანებით ჩოხატაურის მუნიციპალიტეტის ბიუჯეტში:
_ ეს მას შემდეგ გვეცოდინება, რაც სტრუქტურაზე ჩამოვყალიბდებით. თუმცა, მნიშვნელოვანი თანხების დაზოგვა მოხდება, _ განმარტავენ მერიაში.
ამ დროისთვის მოქმედ ა(ა)იპ-ებში 700_მდე ადამიანი დასაქმებული. მათ შორის ისეთებსაც იპოვით, რომლებმაც საკუთარი სამსახურის დასახელებაც არ იციან.
ამის შესახებ “გურია ნიუსს” არა ერთი მასალა აქვს გამოქვეყნებული, თუმცა, ამ დრომდე ცვლილება არ ყოფილა.
ჩოხატაურის მუნიციპალიტეტის მერის ირაკლი კუჭავას მიერ გასული წლის დეკემბერში, საკრებულოს სხდომაზე გაკეთებული განცხადების თანახმად, სახლში მხოლოდ უსაქმურები წავლენ. მერს “უსაქმურების” ვინაობა არ დაუკონკრეტებია, თუმცა, ამ განცხადებით აღიარა, რომ არაფრის კეთებაში ადამიანებს ბიუჯეტიდან ფულს უხდიდნენ, თანაც, საკმაოდ სოლიდურს და საკმაოდ ხანგრძლივ პერიოდში.
რა პრინციპით “გამოხშირავენ” “უსაქმურებს” და რა შეღავათს მოუტანს ეს მუნიციპალიტეტის ბიუჯეტს, ამ კვირაში უნდა გამოჩნდეს. ამავე კვირაში უნდა გახდეს ცნობილი, რომელი ა(ა)იპ-ის ხელმძღვანელი დატოვებს ან შეინარჩუნებს თანამდებობას.
აღნიშნულ თემაზე საჯაროდ საუბარი რეორგანიზაციის მოლოდინში მყოფ ორგანიზაციების ხელმძღვანელებს არ სურთ, თუმცა, პირად საუბრებში ყველა აღნიშნავს, რომ თანამდებობის შენარჩუნებას ან გაერთიანებული ა(ა)-იპის ხელმძღვანელობას ელოდება, რადგან ფიქრობენ, რომ კარგად მუშაობენ და თავს “უსაქმურად” არავინ მიიჩნევს.
