„შესაძლებლობა“ _ ასე ჰქვია პროექტს, რომელიც ჩოხატაურში რაგბის განვითარებისთვის შეიქმნა. პროექტის პრეზენტაცია ხელოვნების სასახლეში გაიმართა და მას ვეტერანი მორაგბეები, კლუბ „ღონეს“ წევრები, მწვრთნელები და დაინტერესებული პირები ესწრებოდნენ.
პრეზენტაციაზე პროექტის ინიციატორმა, საფრანგეთის ერთ-ერთი კლუბის წევრმა, მორაგბე მალხაზ ჯინჭარაძემ ისაუბრა იმ შესაძლებლობების შესახებ, რომლითაც პროექტის ავტორები ფიქრობენ, რომ ჩოხატაურში რაგბის განვითარების დიდი პერსპექტივაა.
ჯინჭარაძეს თქმით, ისინი, ფაქტობრივად, მუნიციპალიტეტში მცხოვრებ ყველა ბავშვთან მივლენ, შეკრებენ, გაწრთვნიან და ჩამოაყალიბებენ მორაგბეებს. პრეზენტაციაზე ისაუბრეს, იმ რესურსების შესახებ, რითაც ფიქრობენ, რომ დასახული მიზნის მიღწევას შეძლებენ.
„გურია ნიუსთან“ საუბრისას მალხაზ ჯინჭარაძემ აღნიშნა, რომ შეიქმნება ა(ა)იპ, რომელსაც კერძო სექტორი დააფინანსებს.
“აქ არსებობდა ლელო-რაგბის კლუბი „ჯანი“, რომელიც სათავეს იღებდა 1976 წლიდან. ჩვენ შევეცადეთ, მოგვეძიებინა ინფორმაცია, რომ როგორმე აღგვედგინა კლუბი, მაგრამ ჩვენს ხელთ არსებული დოკუმენტების ხარჯზე, ვერ მოვახერხეთ ძველი კლუბის აღდგენა _ რეალურად, არქივში ვერაფერი ვერ ვიპოვეთ, რაც ბმაში იქნებოდა. იძულებული გავხდით, გაგვეკეთებინა ახალი კლუბი. რეგისტრაციაში უკვე ჩავუშვით და შეიქმნება რაგბის კლუბი, რომელიც იქნება ა(ა)იპ, თუმცა სახელმწიფოზე დამოკიდებული არ ვიქნებით, ჩვენ მთლიანად დაგვაფინანსებს კერძო სექტორი.
ახლა დაკავებული ვართ სარეგისტრაციო საქმეებით, ამავდროულად, აქტიურად ვმუშაობთ მწვრთნელებთანაც. მიმდინარეობს სპორტსმენების მოძიება, რომ გუნდი შეიკრას და დაკომპლექტდეს და დაახლოებით, 2-3 კვირაში ფედერაციაში გავაგზავნით განაცხადს, რომ ფედერაციამ კლუბი დაგვირეგისტრიროს. ამის შემდეგ დავიწყებთ სავარჯიშო პროცესს, რომელიც თავიდან იქნება მხოლოდ მოსამზადებელი, რომ ჩვენ, კლუბის წარმომადგენლებს და ასევე, მწვრთნელებს, წარმოდგენა გვქონდეს, ვინ რა დონის მოთამაშეა, რომ იმის მიხედვით დაკომპლექტდეს”.
როგორც მალხაზ ჯინჭარაძემ გვითხრა, ის აპირებს დატოვოს საფრანგეთი და მუშაობა ჩოხატაურის ახალ კლუბში გააგრძელოს.
„მე აქ დავიწყე რაგბის თამაში, ვსწავლობდი გიმნაზიაში, შემდეგ ჩემი სპორტული მიზნების გამო გადავედი თბილისში. ამჟამად ვცხოვრობ საფრანგეთში და ვთამაშობ იქაურ ჩემპიონატში. ასევე, ვარ, სპორტული სააგენტო „ჯეო ოვალის“ ერთ-ერთი დამფუძნებელი და ვეხმარები მოთამაშეებს უცხოეთის კლუბებთან ინტეგრაციაში. როცა კლუბი ჩამოყალიბდება და ეს აუცილებლად იქნება, მე ვაპირებ გადმოვიდე ჩოხატაურში. დისტანციური მუშაობის მომხრე მე არ ვარ და ამიტომ ჩემი საქმიანობა გაგრძელდება ჩოხატაურში“, _ გვითხრა ჯინჭარაძემ.
