“ჩვენ ერთად ვირჩევთ მომომავალს“ _ “განათლებისა და თანასწორობის ცენტრმა” პროექტის შემაჯამებელი შეხვედრა გამართა

საქართველო, ისევე როგორც თანამედროვე მსოფლიოს ქვეყნების უმრავლესობა, მულტიეთნიკური ქვეყნების რიცხვს მიეკუთვნება. ქართველების უმრავლესობას რომ ჰკითხო, ეთნიკური და რელიგიური მრავალფეროვნება ჩვენი ქვეყნისათვის დამახასიათებელი ერთ–ერთი სიმდიდრეა.

თუმცა რეალური სურათი განსხვავებულია: სახალხო დამცველის 2018 წლის ანგარიშის მიხედვით: ეთნიკურ უმცირესობათა სამოქალაქო, პოლიტიკური და სოციალური ინტეგრაცია ქართული დემოკრატიის განვითარების ერთ-ერთ მწვავე პრობლემად რჩება. მიუხედავად იმისა, რომ ბოლო წლების განმავლობაში ბევრი პროექტი თუ ინიციატივა განხორციელდა ამ მიმართულებით, მნიშვნელოვანი წინსვლა ეთნიკურ უმცირესობათა ინტეგრაციის და პოლიტიკურ ცხოვრებაში ჩართულობის თვალსაზრისით არ მოხდარა.

ეთნიკური უმცირესობების წარმომადგენელთა უფლებების უზრუნველყოფაზე ზრუნვა აქტიურად გულისხმობს მათთან მიმართებაში არსებული სტერეოტიპების წინააღმდეგ ბრძოლასა და შესაბამისი კამპანიების წარმოებას. სტერეოტიპების წინააღმდეგ ბრძოლის მიზნით, განსაკუთრებით მნიშვნელოვანია ანტიდისკრიმინაციული ნარატივის დამკვიდრებაზე ზრუნვა.

მიუხედავად იმისა, რომ უმცირესობების წარმომადგენლები  ქვეყნის მოსახლეობის დაახლოებით მეექვსედს შეადგენენ, მათი  სოციალური ჩართულობის დონე  დაბალია და ეს განსაკუთრებით თვალშისაცემია, როდესაც საქმე ეხება უმცირესობათა წარმომადგენლობას არჩევით ორგანოებსა და სამთავრობო უწყებებში.

ძირითადად ამ კუთხით იყო მიმართული ა/ო “,განათლებისა და თანასწორობის ცენტრის” მიერ განხორცილებული პროექტი, რომლის შემაჯამებელი შეხვედრაც 2019 წლის 22 ნოემბერს გაიმართა.

 პროექტის განხორციელებისას კიდევ უფრო მკვეთრად გამოიკვეთა, რომ  სამოქალაქო კულტურის ამაღლების ხელისშემწყობი არაფორმალური განათლება უმნიშვნელოვანესია დემოკრატიული პროცესების წარმართვაში. ჭეშმარიტ დემოკრატიულ ღირებულებებზე დაფუძნებული ქვეყნის შენებისათვის აუცილებელია აქტიური და მოტივირებული მოქალაქე. მსგავსი პროექტების განხორციელებით კი საარჩევნო პროცესებში კიდევ უფრო მეტი  მოტივირებული მოქალაქე ჩაერთვება.

 პროექტში ჩართული იყო 75 ბენეფიციარი, ასევე გაიმართა სამი სამუშაო შეხვედრა: როგორც შშმ პირებთან, ასევე სოციალურად დაუცველებთან.  პროექტში ჩართული იყო 50-ზე მეტი ახალგაზრდა, რაც ყველაზე მნიშვნელოვანი შედეგი იყო პროექტის განხორცილებისას. ამ საკითხებით ახალგაზრდების დაინტერესება ქვეყნისთვის ფუნდამეტალურად პრინციპულია, რადგან  სწორედ მათ უნდა აიღონ ხვალ ქვეყნის მართვის სადავეები ხელში.

მნიშვნელოვანი იყო თაობათა დიალოგი, რაც ძალიან საინტერესოდ დავინახეთ სხვადასხვა მცირე აქტივობის დროს. ახალგაზრდებს აქვთ იდეები, ინიციატივები და სურვილები. ვფიქრობთ, რომ სამომავლოდ კიდევ უფრო მეტ ნაბიჯს გადავდგამთ წინ.

(R)