ოზურგეთის მუნიციპალიტეტში, დაბა ანასეულში, უწყლობის პრობლემაზე გასულ ნომერში ვწერდით.
“გურია ნიუსი” ამჯერად სოფელ ლიხაურის მოსახლეობის იმ უბანს ეწვია, სადაც, ანასეულელთა თქმით, 50-მდე ოჯახს დაბაში მიმავალი წყლის ხაზი თვითნებურად აქვს მიერთებული: “ეს მრავალი ათეული წლის მანძილზე ხდება და ცოტა უფრო ახალგაზრდა ასაკის ადამიანებს უკვირთ კიდეც, რაზე საუბრობენო”, _ ამბობენ ანასეულის მკვიდრნი.
ანასეულელთა თქმით, “აჭისწყლიდან გამოყვანილი ანასეულის წყალსადენის პარალელურად, ერთი ხაზი, კეთილი ნებით, ლიხაურელებს დაუტოვეს. მერე კი, დროთა განმავლობაში, ანასეულის წყალსადენიდანაც 50-მდე ოჯახმა მიიერთა ახალი ხაზი და ახლა ორი ხაზით არიან უზრუნველყოფილნი”.
ანასეულელები ამბობენ, რომ ისინი ამ წყალს “ტექნიკურს” უწოდებენ და ძირითადად, სარწყავად იყენებენ.
სოფელ ლიხაურში, ოზურგეთიდან შემავალი გზის გასწვრივ მცხოვრებთა ოჯახების წარმომადგენლები “გურია ნიუსთან” საკუთარ პრობლემებზე საუბრობენ.
თაყაიშვილის ქუჩაზე, რომლის დასრულების შემდეგ სოფელი ლიხაური იწყება, შვიდი ოჯახი მუდმივად უწყლობას უჩივის:
“ჩვენ ჭები გვაქვს. ანასეულისკენ მიმავალი წყლის მილიდან კი ვსარგებლობდით, თუმცა, შემდეგ გაგვიუქმეს. ახლა ეს ჭებიც ნახევრად ჭაობიან გარემოშია და მისი წყალი დიდად ვარგისი არ არის, მაგრამ მაინც ვსვამთ. ლიხაური უზარმაზარი სოფელია, ჩვენი ქუჩაც სოფელს ესაზღვრება და, იქნებ, ვინმემ მოიფიქროს ამ საუკუნეში, რომ ამხელა სოფელს წყალი სჭირდება”, _ გვითხრა ადგილობრივმა მკვიდრმა ლელა დუმბაძემ.
გია და ქეთევან ვაჩნაძეების ოჯახში გვითხრეს, რომ მათ ონკანში წყალი მუდმივად არის, თუმცა, არც არავისთვის წაურთმევიათ და არც ის იციან, ლიხაურის წყალსადენს მიეკუთვნება თუ ანასეულისას.
“ამ მონაკვეთში არა უშავს, თორემ ლიხაურის ცენტრს ზემოთ მუდმივად არის გასაჭირი წყლის მიწოდებაზე. ძალიან ცუდ დღეშია ხალხი, განსაკუთრებით ახლა, ზაფხულის ცხელ დღეებში. იმას ვერ გეტყვით, რომელ ოჯახებშია ორი ხაზიდან შეყვანილი წყალი _ ზოგმა ეს არც იცის, ზოგი არც იტყვის. ჩვენც ხშირად გვაწუხებს უწყლობა და კარგი ის იქნება, თუ მთავრობას ხმას მიაწვდენთ ჩვენი გასაჭირის შესახებ და ხშირად გააშუქებთ პრობლემებს. ერთხელ თქმით საქმე იშვიათად კეთდება”, _ გვითხრეს ლიხაურში, გუდავაძეების ოჯახში.
“ორ წელზე მეტია, ამ წყლით ვსარგებლობთ და თუ უკანონო იყო, ვინ დაგვითმობდა?” _ უკვირთ მათ.
“თუმცა, საქმეც ამაშია, რომ ასეთ საქმეებში ჩვენში კანონი არ კანონობს და რაკი ანასეულმა, თავის დროზე, თითქმის ნახევარი საუკუნის წინ, ლიხაურის ამ უბანს კეთილი ნებით წყლის ხაზი დაუთმო, გარკვეულმა ნაწილმა ისარგებლა ამით და მეორე ხაზიდანაც გაიყვანა წყალი. შემდეგ დაინგრა საბჭოთა კავშირი და აღარავინ ეძებდა, ვინ როგორ ახერხებდა წყლის თუ მიწის მიტაცებას _ ტაციობა ჩვეულებრივი ამბავი იყო”, _ ამბობენ უწყლოდ დარჩენილები.
“გურია ნიუსი” ეწვია საყვავილე მეურნეობას, სადაც პირმა, რომელიც დარაჯად გაგვეცნო, საკუთარი ვინაობის გამხელა არ ისურვა და კითხვაზე, აქვს თუ არა უნებართვოდ მიერთებული მეურნეობის წყალი, გვითხრა, რომ ღელის წყალი, რომელიც მეურნეობას გვერდით ჩაუდის, მათთვის საკმარისია:
“რა წყალი? რომელი ანასეულის წყალი? აგერ, ღელის არხს ვერ ხედავთ გზის პირას? სრულიად გვყოფნის. რაც შეეხება სასმელ წყალს, ეს ლიხაურისაა და ბუნებრივია, სასმელად ვიყენებთ. აქ 500 ადამიანია დასაქმებული და წყალი არ უნდა დალიონ? კიდევ თუ იტყვიან რაიმეს, ამჯერად სასამართლოს მივმართავთ”, _ გვითხრა დარაჯმა.
მან გვითხრა ისიც, რომ სამიოდე დღის წინ აქ მოვიდა ანასეულის მცხოვრებთა ჯგუფი, მათ ახლდა ოზურგეთის მუნიციპალიტეტის მერიის ზედამხედველობის სამსახურის უფროსი შუქრი გაბრიჩიძე. დაათვალიერეს ყველაფერი, დარწმუნდნენ, რომ ანასეულს აქედან წყალს არავინ ართმევს და ბოდიშიც მოიხადეს.
აღნიშნულ სტუმრობაზე სხვა აზრი აქვთ იქ წინა დღით მყოფ ანასეულელებს:
“რა ბოდიში უნდა მოგვეხადა? პირიქით, არაერთხელ იყო დაძაბული საუბარი. საყვავილე მეურნეობის ტერიტორია ახლა მერამდენე მფლობელს ეკუთვნის, აღარც ვიცით. ნაყიდი აქვთ, თუმცა, მიწისქვეშ რა გადის და როგორი კომუნიკაციებია, ალბათ, არც დაინტერესებულან”, _ ამბობენ ანასეულელები.
ოზურგეთის მუნიციპალიტეტის მერიის ზედამხედველობის სამსახურის უფროსი შუქრი გაბრიჩიძე ამბობს, რომ შეხვედრა ნამდვილად შედგა:
“საბოდიშო რა იყო?! ვისაუბრეთ. საყვავილეს წარმომადგენლები ამბობენ, რომ მზად არიან, ამ ეზოში გამავალი მილი, რომლითაც ანასეულს წყალი მიეწოდება, ამოიღონ და სხვა ტერიტორიაზე გადაიტანონ. ამ საქმეში, თავიანთი პოზიციით, დახმარებას შეგვპირდნენ. ეს იყო და ეს”, _ ამბობს გაბრიჩიძე.
ანასეულის ინსტიტუტის დირექტორის თემურ რევიშვილის აზრით, ეკონომიკის სამინისტრომ, რომლის საკუთრებაშიც არსებობს ეს წყალსადენი, როგორც სახელმწიფო საკუთრება, უსწრაფესად უნდა მოახდინოს მისი მუნიციპალიტეტისთვის გადაცემა:
“ამის შესახებ მოძრაობა დაწყებულია და არკვევს ოზურგეთის მუნიციპალიტეტის მერია. წყლის ამ მაგისტრალის განახლება, დაგეგმარება ინჟინრულად უნდა მოხდეს. ნამდვილად ვიცით, რომ ლიხაურის ტერიტორიაზე 50-მდე ოჯახს ორმაგად მიეწოდება წყალი ორივე ხაზიდან თვითნებურად ჩაბმით. ეს კანონით ისე უნდა დარეგულირდეს.
არჩევნების წინ, ამ მონაკვეთზე გზას აგებდნენ და მშენებლები არა ერთხელ გაიქცნენ, ისე იყო დახლართული სხვადასხვა მილები ასფალტის საფარქვეშ. ახლა მთავარია, პატრონი გაუჩნდეს ამ წყალსადენს, მერე ეს პატრონი მიხვდება, როგორ მოუაროს. მთავარია, პროცესი დროში არ გაიწელოს და პრობლემა ერთხელ და სამუდამოდ მოგვარდეს”, _ გვითხრა რევიშვილმა.
მერიის ზედამხედველობის სამსახურის უფროსი, შუქრი გაბრიჩიძე იმასაც ამბობს, რომ, როცა ეკონომიკის სამინისტროდან მუნიციპალიტეტის საკუთრებაში დაბრუნდება წყალსადენი, სახელმწიფო დონეზე მოხდება მოვლა-პატრონობაც:
“ეს ხაზი ისეა დაზიანებული, პატარ-პატარა შეკეთებებით არაფერი გამოვა და მხოლოდ დროებითი პროცესი იქნება. ზოგადად, ანასეულის წყალსადენის საკითხი აქტიურად განიხილება _ აქ მსოფლიო ბანკის წარმომადგენლებიც იყვნენ, გადაიღეს ფოტოები, გაეცნენ რელიეფს, გაზომეს ბევრი რამ. ხალხშიც იმედიანი მოლოდინი გაჩნდა, თუმცა, წავიდნენ და მერე ამ პროექტზე საუბარი აღარ გაგრძელებულა. ანასეულის წყალსადენი ერთხელ და სამუდამოდ უნდა გაკეთდეს საშვილიშვილოდ”, _ გვითხრა გაბრიჩიძემ.
“გურია ნიუსმა” ამჯერად ოზურგეთის მუნიციპალიტეტის მერს სთხოვა აღნიშნული საკითხის ირგვლივ კომენტარი _ როგორც მერიის პრესსამსახურის მიერ მოწოდებული ინფორმაციიდან ირკვევა, აღნიშნულ პრობლემასთან დაკავშირებით, მიმდინარეობს კონსულტაციები მუნიციპალური განვითარების ფონდთან:
“მიმდინარეობს ანასეულის წყალმომარაგების პროექტზე მუშაობა. ჩვენ ვაწარმოებთ კონსულტაციებს მუნიციპალური განვითარების ფონდთან. ეს ძალიან დიდი ხნის და ძალიან მტკივნეული პრობლემაა. მოლაპარაკების დასრულების შემდეგ, დაიგეგმება თანამედროვე სტანდარტებით წყლის სისტემის მოწყობა და ეს პრობლემა საბოლოოდ გადაიჭრება”.
ოზურგეთის მუნიციპალიტეტის საკრებულოს დეპუტატი ნანული ორაგველიძე მიიჩნევს, რომ ეს დავა აუცილებლად უნდა მოაგვაროს სასამართლომ, დეპუტატი ლავრენტი ბიგვავა კი მიიჩნევს, რომ “არ არსებობს არც სუბიექტი, არც ობიექტი, რომ საქმე სასამართლოში სამართლებრივად განიხილონ. სპეციფიკური პრობლემაა და როგორმე მუნიციპალიტეტის მერიის და ეკონომიკის სამინისტროს საერთო ძალისხმევით უნდა მოგვარდეს”.
