ლანჩხუთის მერიის ინფრასტრუქტურის სამსახურის უფროსის, ლევან ჩხაიძის მიერ წარდგენილ საკითხს ადგილობრივ საკანონმდებლო ორგანოში, რომელიც 2020 წლისთვის განსახორციელებელ ინფრასტრუქტურული პროექტების მოწონების საკითხს ეხებოდა, მაჟორიტარ დეპუტატთა მხრიდან საკმაო ხმაური მოჰყვა.
ლესის წარმომადგენელმა საკრებულოში ელისო ჭიჭინაძემ სოფელში არსებულ ავარიულ გზებზე გააკეთა მთავარი აქცენტი- „კარგია, რომ ლესაში წყლის სისტემის რეაბილიტაციისთვის 350 ათასი ლარის დახარჯვაა გათვალისწინებული, თუმცა სამწუხაროდ, არც ერთი თეთრი არაა გაწერილი შიდა გზების მოსაწესრიგებლად. არადა, სოფელში საკმაოდაა ისეთი ადგილები, სადაც ძალიან რთული ვითარებაა, საჭიროების შემთხვევაში სასწრაფო დახმარების მანქანა ვერ შეძლებს დანიშნულების ადგილამდე მისვლას. ამას დროულად უნდა მიექცეს ყურადღება და მუნიციპალიტეტმა გამონახოს საშუალება პრობლემის მოსაგვარებლად“.
ლესის მაჟორიტრამა საექიმო უბნის მშენებლობის თემაც გააჟღერა. მისი თქმით, საკითხის დადებითად გადაწყვეტად სოფელი ყველა ღონეს იხმარს.
„კიდევ ერთხელ ვიტყვი, რომ მშენებლობისთის უბნების შერჩევა არასწორად მოხდა. ლანჩხუთში ხუთი ასეთი უბანი შეირჩა და რატომღაც ამ ხუტეულს მიღმა აღმოჩნდა ლესის ადმინისტრაცია. სოფელი კატეგორიულად ითხოვს ლესაში საექიმო უბნის მშენებლობას. თუ ხელმოწერების შეგროვების საჭიროებაა, ამასაც ვიზამთ, ბოლომდე ვიბრძოლებთ“,- აღნიშნა ჭიჭინაძემ. თუმცა მერიის ინფრასტრუქტურის სამსახურის უფროსმა დეპუტატს მსგავსი კატეგორიულობა დაუწუნა და განუმარტა – ეს არასახელმწიფოებრივიაო.
„დიახ, ეს ყველაფერი არასახელმწიფოებრივი მგონია. რას ქვია, გინდა თუ არა, უნდა აშენდესო?! ჩვენს მიერ მოხდა 25 ათასი ლარის გამოყოფა და თუ ეს თანხა არ იქნება საკმარისი , შეიძლება კორექტირება მოხდეს. ლესის ადმინისტრაციულ შენობაში არის შესაბამისი ფართი, სადაც საექიმო უბნის მოწყობაა შესაძლებელი. იქ კეთდება ორი ოთახი ექიმისთვის, ერთიც აცრებისთვის, ასევე სველი წერტილები მოეწყობა. იქ სადაც არის შესაბამისი ფართი, რატომ უნდა აშენდეს ახალი?! არსებულს გავარემონტებთ და მოვიყვანთ შესაბამის სტანდარტებში“-დეპუტატის პასუხად განმარტა ინფრასტრუქტურის სამსახურის უფროსმა.
როგორც გაირკვა, 2020 წლისთვის დაანონსებულ მასშტაბურ ინფრასტრუქტურული პროექტების ნუსხაში მოხვდა სოფელ შუხუთში ლელოს მუზეუმის მშენებლობა. საამისოდ შუხუთის მააჟორიტარმა, აკაკი იმნაიშვილმა მუნიციპალიტეტის ხელმძღვანელობის მისამართით მადლობა არ დაიშურა, თუმცა მადლობის პარალელურად ადგგილობრივ აღმასრულებელ რგოლს არც სოფელში არსებული სხვა პრობლემებიც შეახსენა და მათი მოგვარება ითხოვა- „მივესალმები ლელოს მუზეუმის მშენებლობას, მაგრამ იცით, რომ შუხუთის ნახევარ მოსახლეობას წყალი არ მიეწოდება?! სოფელში არც სტადიონია, ამის გაკეთებაზე იზრუნა ვინმემ?!“.
2020 წლისთვის განსახორციელებელ ინფრასტრუქტურული პროექტების მოწონების საკითხის განხილვას საკრებულოში ჩიბათის მაჟორიტარის, გიორგი ჩახვაძის გულისწყრომაც მოჰყვა. გაირკვა, რომ დაგეგმილი ინფრასტრუქტურული პროექტების ნუსხაში ამჯერადაც ვერ მოხვდა სოფელში სტადიონის მოწყობა, რომლის მშენებლობაც წლების წინ დაიწყო.
„ვფიქრობდი ახლაც მეთქვა თუ არა ის, რაზეც უკვე მეორე მოწვევის საკრებულოში მიწევს საუბარი. ერთი ობიექტი მაინც მითხარით, ამდენი წელია რომ შენდება და ვერ დასრულდა. დაიწყეს სტადიონის მშენებლობა და გაჩერდნენ. რაც გაკეთდა და თანხა დაიხარჯა, მალე ისიც განადგურდება. არ შეიძლება ერთხელ და სამუდამოდ დავასრულოთ ეს ობიექტი?!“-ცხარობდა ჩიბათის მაჟორიტარი. თუმცა როგორც ჩანს, მას სამომავლოდაც მოუწევს საკრებულოს სხდომებზე ამ თემის წინ წამოწევა, რადგან კონტურზე გამოსახულ ინფრასტრუქტურულ გეგმაში ჩიბათის სტადიონის არა, მაგრამ ქალაქის ტერიტორიაზე არსებული სტადიონების რეაბილიტაციაა გათვალისწინებული.
