დაგროვებითი პენსიის შესახებ ინტერესი საზოგადოების მხრიდან დიდია. საპენსიო სქემის მოდელს მომხრეებიც და მოწინააღმდეგეებიც ჯერ კიდევ კანონის მიღებამდე ჰყავდა. დღესაც, ქვეყანაში არსებული სიდუჭირის ფონზე, არაერთი ადამიანი ცდილობს, გარკვევას, თუ როგორ მიიღოს კანონით დათქმულ ვადაზე ადრე დაგროვებითი პენსიის სახით დაგროვებული თანხა, ან უარი თქვას მასში მონაწილეობაზე.
ცნობისთვის, დაგროვებით საპენსიო სქემაში გაწევრიანება სავალდებულოა ყველა დასაქმებულისთვის. პროგრამაში მონაწილე დასაქმებულისა და მონაწილე თვითდასაქმებულის საპენსიო შენატანების დაფინანსებას ახორციელებენ დამსაქმებელი, დასაქმებული და სახელმწიფო კანონით განსაზღვრული ოდენობითა და წესით.
დასაქმებული, რომელსაც ამ კანონის ამოქმედებამდე შეუსრულდა 40 წელი და რომელსაც არ სურს, იყოს მონაწილე, უფლებამოსილია, ამ კანონის 22-ე მუხლის შესაბამისად, გავიდეს დაგროვებითი საპენსიო სქემიდან.
9 722 021.67 ლარი კი, ის შთამბეჭდავი თანხაა, რომელიც 2019-2022 წლებში დაგროვებითი პენსიის შედეგად გაიცა. თუმცა, სამწუხაროდ, დღეს, როცა საქართველოში დაგროვებითი პენსიის ამოქმედებიდან ოთხ წელზე მეტია გასული, დასაქმებული თუ ამ დროისთვის უკვე უმუშევარი ადამიანების ნაწილი, ვინც თავის დროზე დაგროვებითი პენსიის სქემაში ჩართვაზე უარი თქვეს, სახელმწიფოს წინაშე ვალში ისე აღმოჩნდნენ, რომ ამის შესახებ წარმოდგენაც არ ჰქონდათ.
ცოტა ხნის წინ, სხვადასხვა ორგანიზაციამ საპენსიო სააგენტოდან
შემდეგი შინაარსის წერილი მიიღო.
_ “დაგროვებითი პენსიის შესახებ“ საქართველოს კანონის მიხედვით, საპენსიო სააგენტო უფლებამოსილია, გადაამოწმოს დამსაქმებლისა და თვითდასაქმებულის მიერ საპენსიო სააგენტოსთვის მიწოდებული ინფორმაცია შემოსავლების სამსახურის საინფორმაციო მხარდაჭერის საშუალებით.
შემოსავლების სამსახური საპენსიო სააგენტოს უზრუნველყოფს ინფორმაციით, რომლის საფუძველზედაც საპენსიო სააგენტო ამოწმებს დამსაქმებლის და მონაწილის მიერ საპენსიო შენატანების გახორციელების ვალდებულების არაჯეროვნად შესრულების ფაქტებს.
გაცნობებთ, რომ თქვენ მიერ შემოსავლების სამსახურში წარდგენილ გადახდის წყაროსთან დაკავებული გადასახადის დეკლარაციებში არსებული მონაცემების და საპენსიო შენატანების ადმინისტრირების ელექტრონული სისტემის მეშვეობით განხორციელებული საპენსიო შენატანების შედარების საფუძველზე, გამოვლენილია გარკვეული შეუსაბამობები, რომლის შესახებაც დეტალურად გეცნობებათ მოგვიანებით.
ზემოაღნიშნულიდან გამომდინარე, გთხოვთ, აღმოფხვრათ შემოსავლების სამსახურის და საპენსიო სააგენტოს მონაცემთა ბაზებს შორის არსებული შეუსაბამობები.
როგორც თქვენთვის ცნობილია, საქართველოს ადმინისტრაციულ სამართალდარღვევათა კოდექსის 165-11 მუხლი ითვალისწინებს, დამსაქმებლის მიერ სავალდებულო საპენსიო შენატანის ან თვითდასაქმებულის მიერ სავალდებულო საპენსიო შენატანის განხორციელების ვალდებულების დარღვევისას, შესაბამის პასუხისმგებლობის ზომებს.
საპენსიო სააგენტოს წერილიდან ირკვევა, რომ დასაქმებულებმა, ვისაც 2019 წლისთვის ასაკი ხელს უწყობდა და უარი თქვეს საპენსიო სქემაში გაწევრიანებაზე, ჯარიმები მიიღეს და ახლა თანხა, რომელიც მთელი ამ დროის განმავლობაში, პროგრამაში მონაწილეობის შემთხვევაში უნდა გადაეხადათ, გადახდას ავალდებულებენ.
როგორც ჩვენთვის ცნობილი გახდა, მსგავსი შინაარსის შემცველი წერილი ჩოხატაურის სკოლებშიც მივიდა.
ჩოხატაურის საგანმანათლებო რესუსრსცენტრის ხელმძღვანელმა შორენა სიხარულიძემ გვითხრა:
“მსგავსი შინაარსის წერილი მიიღო ერთ-ერთი სკოლის დარაჯმა, ვისაც საპენსიო სქემის დატოვების დროს წერილობით არ მიუმართავს სააგენტოსთვის, გარდა ამისა, წერილი მიიღო ერთმა მასწავლებელმა, რომელიც დღეისთვის აღარაა მასწავლებელი, კიდევ ერთმა მასწავლებელმა, რომელიც გადასულია სხვა სკოლაში. ერთ მასწავლებელს, ასევე, ჰქონდა შემთხვევა მსგავსი შინაარსის წერილის მიღების, თუმცა, შემდეგ გასწორდა. ვინც სააგენტოს მიმართა საპენსიო სქემიდან გამოსვლის მოთხოვნით ვადებისა და კანონის გათვალისწინებით, არავისთან არ ფიქსირდება მსგავსი შემთხვევა”.
2019 წელს საპენსიო სააგენტო განმარტავდა, რომ საპენსიო სქემის დატოვება შეეძლო ყველა იმ პირს, ვისაც 2018 წლის 6 აგვისტოსთვის უკვე შესრულებული ჰქონდა 40 წელი ან იყო უფრო მეტი ასაკის.
განცხადების დაწერა შესაძლებელი იყო სქემაში ჩართვიდან სამი თვის შემდეგ. სამი თვის ათვლა კი იწყება იმ თარიღიდან, როდესაც ბუღალტერმა თქვენი პირველი საპენსიო შენატანი განახორციელა და დეკლარაცია დახურა.
დაგროვებით საპენსიო სისტემაში ჩართვისა და გასვლის თარიღი შეგიძლიათ შეამოწმოთ საპენსიო სააგენტოს ვებგვერდზე არსებულ თქვენს პირად პროფილზე.
როგორც საქართველოს ადმინისტრაციულ სამართალდარღვევათა კოდექსში ვკითხულობთ:
მუხლი 165-11. დამსაქმებლის მიერ სავალდებულო საპენსიო შენატანის ან თვითდასაქმებულის მიერ სავალდებულო საპენსიო შენატანის განხორციელების ვალდებულების დარღვევა ითვალისწინებს:
- დამსაქმებლის მიერ საკუთარი ან დასაქმებულის სახელით საპენსიო შენატანის გახორციელების ვალდებულების დარღვევის გამოვლენა (მიუხედავად გამოვლენილი დარღვევების საერთო რაოდენობისა) გამოიწვევს დაჯარიმებას 500 ლარის ოდენობით.
- იგივე ქმედება, ჩადენილი განმეორებით, გამოიწვევს დაჯარიმებას 1 000 ლარის ოდენობით.
- თვითდასაქმებულის მიერ საპენსიო შენატანის გახორციელების ვალდებულების დარღვევა გამოიწვევს დაჯარიმებას 500 ლარის ოდენობით.
- იგივე ქმედება, ჩადენილი განმეორებით, გამოიწვევს დაჯარიმებას 1 000 ლარის ოდენობით“.
აღნიშნულ საკითხთან დაკავშირებით “გურია ნიუსი” საპენსიო სააგენტოს პრესსამსახურს დაუკავშირდა.
ჩვენ ვცადეთ გაგვერკვია თუ რამდენი შეუსაბამობა გამოვლინდა, რატომ და როგორ მოხდა დარღვევების დადგენა დაგროვებითი საპენსიო სისტემის ამოქმედებიდან ამდენი ხნის შემდეგ და რა კეთდება მდგომარეობის გამოსასწორებლად.
“საპენსიო სააგენტო აგრძელებს პროცესს საპენსიო სქემის მონაწილეების ინტერესების დაცვის მიმართულებით. როგორც ცნობილია, დაგროვებითი პენსიის შესახებ კანონი დამსაქმებელს ავალდებულებს დასაქმებულებისათვის ხელფასის გადახდისთანავე მათ სასარგებლოდ განახორციელოს საპენსიო შენატანები. ამ ეტაპზე, საპენსიო სააგენტოსა და შემოსავლების სამსახურში გაგზავნილ ინფორმაციაში შეუსაბამობების შესახებ შეტყობინებები გაეგზავნა 70,000 დამსაქმებელს.
აღსანიშნავია, ასევე რომ აღნიშნული სამუშაოები მიმდინარეობს დამსაქმებლების დახმარების ფორმატში, რათა ყველა დამსაქმებელმა შესაბამისობაში მოიყვანოს დოკუმენტაცია. ასევე, მნიშვნელოვანია ორგანიზაციებმა იცოდნენ, რომ მოკლე დროში, საპენსიო სააგენტოს მიერ გაეშვება პროგრამა, რომლითაც მათ ექნებათ საშუალება დამსაქმებლის გვერდიდან მოახდინონ ინფორმაციის შეუსაბამობის დადგენა, რაც საგრძნობლად გაუმარტივებთ სამუშაო პროცესს.
საპენსიო სააგენტო მუდმივ და ინტენსიურ კავშირზეა დამსაქმებლებთან, ბუღალტერთა კავშირებთან, ფორუმებთან და ასოციაციებთან. უკვე გაიმართა შეხვედრა ბუღალტერთა ფორუმის წარმომადგენლებთან და ონლაინ შეხვედრა ბუღალტრებთან და დაინტერესებულ პირებთან. აღნიშნული შეხვედრების შედეგად წამოჭრილია ისეთი საკითხები, რომელთა გადაწყვეტა საჭიროებს დამატებითი ღონისძიებებს, შესაბამისად, პროცესში მონაწილეობას მიიღებენ შემოსავლების სამსახურის შესაბამისი წარმომადგენლები”,_ გვითხრეს საპენსიო სააგენტოში.
ავტორი
