“დაიცავი დაუცველი” _ ამ სათაურით ვაკის პარკში ცხოველებზე გახშირებული ძალადობისა და სასტიკი მოპყრობის წინააღმდეგ აქცია მიმდინარეობს.
როგორც “გურია ნიუსთან” აქციის ერთ-ერთი ორგანიზატორი, ორგანიზაცია “დაიცავი დაუცველის” წევრი, ანა სააკაძე ამბობს, ცხოველების წინააღმდეგ ჩადენილი ძალადობრივი ქმედებები ქვეყანაში დასჯადი უნდა იყოს. ასევე, უნდა ისჯებოდეს ცხოველების მოკვლისთვის.
“დღევანდელი აქციის გამართვა გადავწყვიტეთ, რადგან დღეს საქართველოში კანონი არ იცავს ცხოველს და არც მის პატრონს. ყოველ დღიურად მატულობს ცხოველის მიმართ სასტიკი მოპყრობა და ეს ქმედებები არ არის დასჯადი. ერთ მაგალითს გავიხსენებ, მეზობელმა თავის მეზობელს მოუკლა ლეკვობიდან გაზრდილი ძაღლი და ეს ფაქტი არ არის დასჯადი. შეიძლება დაზარალებულმა მიმართოს პოლიციას და დაწეროს განცხადება, მაგრამ რეალურად ის რჩება მარტო მეზობელთან რომელმაც ჩაიდინა სასტიკი საქციელი და ამიტომაც არ გრძნობს თავს უსაფრთხოდ. ცხოველთა დამცველებს სჭირდებათ არასამთავრობო ორგანიზაციების დახმარება. ამ ღონისძიების მზადების პროცესში მოწვევა გავუგზავნეთ რამდენიმე არასამთავრობო ორგანიზაციას მაგრამ სამწუხაროდ მათგან პასუხი არ მოგვივიდა. ისინი არ იმყოფებიან აქ.ჩვენ თუ არ დავდექით ერთად უსამართლობის წინააღმდეგ არაფერი არ შეიცვლება და ყოველდღიურად მოიმატებს ცხოველთა მიმართ სასტიკი მოპყრობის ფაქტები, იმიტომ რომ თვითონ ამ მკვლელმა იცის, რომ მისი ქმედება არ ისჯება. ჩემი გადმოსახედიდან ერთი ნაბიჯია სხვაობა ცხოველის მკვლელსა და ადამიანის მკვლელს შორის”, _ამბობს ის.
როგორც ანი სააკაძე აღნიშნავს, ადამიანებმა უნდა გააცნობიერონ, რომ ცხოველებსაც აქვთ უფლებები და თუ ხშირად კორპუსში მაცხოვრებლებისთვის პრობლემას იქვე მაცხოვრებელი მეზობლის ძაღლის ყეფა წარმოადგენს, პრობლემა მარტო ყეფა არ არის და ხმაურს ხშირად მეზობლებიც იწვევენ.
” მე თვითონ ვცხოვრობ კორპუსში, მყავს 2 მეტისი. რა თქმა უნდა მარტივი არ არის კორპუსში ცხოველის ყოლა და შესაძლოა, ყეფა მეზობლებისთვის დისკომფორტია, მაგრამ მარტო ყეფა არ არის ცხოვრებაში დისკომფორტი. როდესაც ადამიანს ეცოდინება, რომ ამ ცოცხალ არსებებს აქვთ უფლებები სხვა ცოცხალი არსებებივით, ეს მდგომარეობა უფრო დასტაბილურდება“, _ ამბობს სააკაძე.
მისივე თქმით, საზოგადოების ცნობიერების ასამაღლებალად პროექტის შემუშავებაა საჭირო. ადამიანებმა უნდა გააცნობიერონ, რომ ვინც მოიშინაურა, მის წინაშე ვალდებულებიც აქვს.
“უნდა შევიმუშაოთ რაღაცა პროექტი საზოგადოების ცნობიერების ასამაღლებალად, რომ ძაღლი მარტო “ძაღლო იქით გადი” არ არის და ჯოხის მოქნევა, რომ ძაღლი არის ცხოველი რომელიც ადამიანმა თვითონ მოიშინაურა და ადამიანმა არ უნდა დაივიწყოს, რომ ვალდებულია მის წინაშე ვინც მოიშინაურა“, _ ამბობს სააკაძე.
