საქართველოს პრეზიდენტმა გიორგი მარგველაშვილმა ,,მაუწყებლის შესახებ“ კანონპროექტს ვეტო დაადო და პარლამენტს მოტივირებული შენიშვნებით უკან გადაუგზავნა. ძირითადად, პრეზიდენტისთვის სადავო საკითხი საზოგადოებრივი მაუწყებლის ეთერში კომერციული რეკლამის განთავსების უფლება და შესყიდვებთან დაკავშირებული ცვლილებები იყო. აპირებს თუ არა პარლამენტი გაითვალისწინოს პრეზიდენტის მოტივირებული შენიშვნები _ ამ საკითხთან დაკავშირებით, ,,გურია ნიუსი“ მმართველი გუნდის წევრს დავით ჭიჭინაძეს ესაუბრა. როგორც საპარლამენტო უმრავლესობის წევრი აცხადებს, დეპუტატთა ის ნაწილი, რომლებმაც მხარი დაუჭირეს კანონპროექტის მიღებას, შენიშვნებს არ გაითვალისწინებს და ვეტოს დაძლევას შეეცდება. როგორც დავით ჭიჭინაძე აღნიშნავს, თავად, ახალი კანონპროექტის დამტკიცებას ეწინააღმდეგება.
,,მხარს არ ვუჭერ და არც მომავალში დავუჭერ ,,მაუწყებლის შესახებ“ კანონპროექტს. ჩემთვის მიუღებელია, საზოგადოებრივ მაუწყებელს ჰქონდეს კომერციული რეკლამის განთავსების უფლება, იმიტომ, რომ საზოგადოებრივი მაუწყებელი არა დამკვეთზე, არამედ საზოგადოებაზე ორიენტირებული ტელევიზია არის. რა თქმა უნდა, დეპუტატები, რომლებიც მხარს უჭერდნენ მაუწყებლის კანონში ცვლილებების დამტკიცებას ვეტოს დაძლევას შეეცდებიან. დღეს არსებული საზოგადოებრივი მაუწყებლის დაფინანსების მოდელი იმიტომ იქნა შემუშავებული, რომ დამოუკიდებელი დაფინანსების წყაროზე არ ყოფილიყო ორიენტირებული. ახლა კი ჩვენ ვიღებთ ისეთ კანონს, რომელიც საზოგადოებრივ მაუწყებელს საშუალებას აძლევს, დამკვეთზე ორიენტირებული გახდეს. ჩნდება საშიშროება, რომ დამკვეთები არ გაიზიარებენ საზოგადოებისთვის სასარგებლო აზრს, რომლის მაგალითი საკმაოდ ბევრია. გვახსოვს, რომ საზოგადოებრივი მაუწყებლის ეთერში საფინანსო კომპანია – „საქართველოს“ რეკლამა გადიოდა და სწორედ, ამ რეკლამის საშუალებით უამრავი ადამიანი დაზარალდა“, – განაცხადა დავით ჭიჭინაძემ.
საზოგადოებრივ მაუწყებელთან დაკავშირებით მიღებული საკანონმდებლო ცვლილებებით, საზოგადოებრივ მაუწყებელს უფლებამოსილება უფართოვდება და შეეძლება კანონმდებლობით განსაზღვრული შემოსავლები, მათ შორის სახელმწიფო ბიუჯეტიდან მიღებული ასიგნებები დამწყები საწარმოების (სტარტეპები) წახალისების, (ტელე, რადიო და ონლაინ პროდუქციის) ინოვაციური განვითარების, მაუწყებლობის სფეროში გარემოს განვითარების ხელშეწყობაზე მიმართოს. ამასთან, საზოგადოებრივი მაუწყებლის ეთერში დასაშვები ხდება კომერციული რეკლამის განთავსება სამუშაო დღეებში.
გარდა ამისა, ”სახელმწიფო შესყიდვების შესახებ” კანონი არ გავრცელდება დამოუკიდებელი კერძო სამართლის იურიდიული პირების მიერ მომზადებულ პროგრამაზე, რომლებსაც საზოგადოებრივი მაუწყებლის ეთერის არანაკლებ 25% დაეთმობა. ”სახელმწიფო შესყიდვების შესახებ” კანონით დადგენილი შეზღუდვები, ასევე, არ გავრცელდება საზოგადოებრივ მაუწყებლის ეთერით გადასაცემი გადაცემების, ფილმების, სერიალების დამზადების მომსახურების შესყიდვაზე.
“მაუწყებლობის შესახებ“ კანონში ცვლილებები უმრავლესობის დეპუტატების მიერ არის ინიცირებული.
