ჟურნალისტი და გიდი ზურაბ ბაუჟაძე სოციალურ ქსელში აჭარის მთიანეთის ერთ ძველ კერძს – კოპიწას მომზადების წესს გვიმხელს.
“აჭარული სამზარეულო ცნობილია რძისა და რძის პროდუქტების დამუშავების მრავალფეროვნებით, მაგრამ მუდამ ისმის კითხვა, ხალხს რომელიც მესაქონლეობას მისდევდა, ნუთუ ხორციანი კერძები არ ჰქონდა?
ჰქონდა, როგორ არ ჰქონდა, მაგრამ რატომღაც აჭარული კერძების პოპულარიზების დროს აქცენტი გაკეთდა ბორაოზე და კაიმაღზე. ამიტომაც ბევრი ფიქრობს, რომ ამ კუთხის სამზარეულოში მხოლოდ რძის ან რძის პროდუქტებისგან დამზადებული კერძებია.
დღეს აჭარის მთიანეთის ერთ ძველ კერძს – კოპიწას გაგაცნობთ.
კოპიწას აჭარლები ხმელი და ნედლი ხორცისგან ამზადებენ. ხორცს შემოდგომით დაწრიტავდნენ, დაამარილებდნენ და გაახმობდნენ. მას ფასტურმას ეძახდნენ.
კოპიწას ასე ამზადებდნენ: კომბოსტოს დაჭრიდნენ დიდ ნაჭრებად და ფენაფენა ჩააფენდნენ ქვაბში კომბოსტოსა და ძვლებისგან გათავისუფლებულ ხმელ ან ახალ ხორცს. ერთი ფენა კომბოსტო, ერთი ფენა ხორცი. შუაში ართ ფენას მჟავე კომბოსტოს მოაქცევდნენ, რომელიც კერძს დამახასიათებელ გემოსა და არომატს აძლევდა. ზემოთ დაადებდნენ პიმპილს, მარილს და ნიორს.
სახურავს დაახურავდნენ ქვაბს და ცეცხლზე შემოდგამდნენ. კომბოსტოს შეუსკდებოდა წვენი, ცხელი ორთქლი კი ხორციდან გამოადნობდა ცხიმს და ამ ნაზავში კერძი დაახლოებით ორი სამი საათი იხარშებოდა,“_ წერს ფეისბუქზე ზურა ბაუჟაძე.
