ესტონეთის საგარეო საქმეთა მინისტრი მარგუს ცაჰკნა აცხადებს, რომ ევროკავშირის დღის წესრიგში დგას საქართველოსათვის ევროკავშირთან უვიზო მიმოსვლის შეჩერების საკითხი, რასაც, მისი თქმით, მხოლოდ 15 წევრი ქვეყნის თანხმობა სჭირდება.
„მოვუწოდებთ ევროკავშირს, დაიწყოს სავიზო რეჟიმის ლიბერალიზაციის გაუქმების პროცესი“, — განაცხადა მინისტრმა ცაჰნკამ 3 აპრილს ბრიუსელში, ნატოს წევრი ქვეყნების საგარეო საქმეთა მინისტრების შეხვედრის წინ ჟურნალისტებს.
„ეს საკითხი მაგიდაზე დევს და პროცესის დაწყებას 15 წევრი ქვეყანა სჭირდება, რომ შევაფასოთ და ვუთხრათ რეჟიმს, ქმედებები შეცვალოს“, _ განაცხადა ესტონეთის საგარეო საქმეთა მინისტრმა Euroscope-ის ჟურნალისტის, თამარ ნუცუბიძის კითხვაზე პასუხად.
„ესტონეთმა ათობით და ათობით სხვადასხვა პირს დაუწესა პერსონალური სანქციები, მათ შორის [ბიძინა] ივანიშვილსა და პრემიერ-მინისტრს“, — თქვა მარგუს ცაჰკნამ.
ჯამში ესტონეთში შესვლა საქართველოს მოქალაქე/„ქართულ ოცნებასთან“ დაკავშირებულ 83 ადამიანს აქვს ქვეყანაში შესვლა აკრძალული.
ჯერ უცნობია, როდის იმსჯელებენ ბრიუსელში უვიზო მიმოსვლის შეჩერებაზე.
უვიზო მიმოსვლის შეჩერება
ევროკავშირის საბჭომ საბოლოოდ 2025 წლის იანვრის ბოლოს მიიღო გადაწყვეტილება ევროკავშირი-საქართველოს სავიზო რეჟიმის გამარტივების შესახებ შეთანხმების ნაწილების შეჩერებაზე.
შედეგად, ქართველ დიპლომატებსა და ოფიციალურ პირებს უვიზო მიმოსვლის უფლება შეუჩერდათ.
თუმცა ევროკავშირის წევრი ქვეყნები აცხადებდნენ, რომ ეს მხოლოდ ნაწილია იმ შესაძლო ზომებისა, რასაც ბრიუსელში განიხილავენ „ქართული ოცნების“ ანტიდემოკრატიულ, ანტიდასავლურ ნაბიჯებზე საპასუხოდ.
უვიზო მიმოსვლის შეჩერების საკითხი სწორედ ესტონეთმა დააყენა დღის წესრიგში 2025 წლის 27 იანვარს, ბრიუსელში ევროკავშირის საგარეო საქმეთა საბჭოს სხდომაზე.
„არ ვამბობ, რომ ეს პროცესი ხვალვე დაიწყოს, მაგრამ ეს პროცესი უნდა დავიწყოთ, რათა ნათელი, მკაფიო გზავნილი გავუგზავნოთ მთავრობას“, – თქვა მაშინ ცაჰკნამ.
2024 წლის 5 დეკემბერს ნიდერლანდების საგარეო საქმეთა მინისტრმა კასპარ ველდკამპმა დაწერა, რომ ემხრობა საქართველოსთვის უვიზო რეჟიმის შეჩერებას.
