„ეკა ბესელიას, რომელიც ღია კარს ამტვრევს, ბარიკადებზე ასვლა არ შეუძლია“_ სოსო ცინცაძე

„ეკა ბესელია არ არის ისეთი ადამიანი, რომელსაც ბარიკადებზე ასვლა შეუძლია. მოსამართლეთა სიის დაბლოკვა ბიძინა ივანიშვილის დონეზე უკვე გადაწყვეტილია, ამიტომ იურიდიულ საკითხთა ყოფილი თავმჯდომარის ქმედებები ღია კარის მტვრევას უფრო ჰგავს, ვიდრე „ქართულ ოცნებასთან“ დამოუკიდებლად ომის წარმოებას“, _ აღნიშნა „გურია ნიუსთან“ პოლიტიკის ექსპერტმა სოსო ცინცაძემ.

მისივე თქმით, „ეკა ბესელია ბიძინა ივანიშვილს არ დაუპირისპირდებოდა. მით უფრო, როცა ბესელიას ნათქვამი აქვს, რაც დრო გადის, ბიძინა ივანიშვილის გენიოსობაში უკეთ ვრწმუნდებიო“.

_ ბატონო სოსო, „ქართული ოცნება-დემოკრატიული საქართველოს“ თავმჯდომარის მიერ გაკეთებულ განცხადებას, რომელშიც ბიძინა ივანიშვილმა ეკა ბესელია გუნდურობის პრინციპის დარღვევაში დაადანაშაულა, იურიდიულ საკითხთა კომიტეტის ყოფილმა თავმჯდომარემ მუქარანარევი განცხადებით უპასუხა_ ყველაფერს ნათელს მოვფენო, თუმცა დაპირების მიუხედავად, ეკა ბესელიამ ბიძინა ივანიშვილთან დაპირისპირება ვერ გაბედა თუ მთავარი კოზირი ბრძოლის ბოლო ეტაპზე შემოინახა?

_ ეკა ბესელია არ არის ისეთი ადამიანი, რომელსაც ბარიკადებზე ასვლა შეუძლია. მოსამართლეთა სიის დაბლოკვა ბიძინა ივანიშვილის დონეზე უკვე გადაწყვეტილია, ამიტომ იურიდიულ საკითხთა ყოფილი თავმჯდომარის ქმედებები ღია კარის მტვრევას უფრო ჰგავს, ვიდრე „ქართულ ოცნებასთან“ დამოუკიდებლად ომის წარმოებას. ეჭვი არ მეპარებოდა, რომ ეკა ბესელია ბიძინა ივანიშვილს არ დაუპირისპირდებოდა. მით უფრო, როცა ბესელიას ნათქვამი აქვს, რაც დრო გადის, უკეთ ვრწმუნდები ბიძინა ივანიშვილის გენიოსობაშიო.

_ მმართველი პარტია მოსამართლეთა კრიტერიუმების გაწერის შემდეგ, უზესაეს სასამართლოში უვადოდ გასამწესებელი კანდიდატების ახალ სიას განიხილავს, თუმცა რა გარანტია გვაქვს, რომ ახალი კრიტერიუმების გაწერის შემთხვევაში, იუსტიციის უმაღლესი საბჭო პარლამენტს განსახილველად ოდიოზური მოსამართლეების  შემადგენლობით  სიას კვლავ არ შესთავაზებს?

_ სიიდან დროებით რამდენიმე მოსამართლის გვარებს ამოიღებენ, დანარჩენს კი დაამტკიცებენ. „ქართული ოცნება“ კრიტერიუმებს ისე გაწერს, რომ საზოგადოებისთვის დამაბნეველი იქნება, როგორ მოხვდებიან მოსამართლეები თანამდებობებზე. როგორც კი ბიძინა ივანიშვილის მიერ გაჟღერდა მოსაზრება, რომ  მოსამართლეები წინა ხელისუფლების რეჟიმის მსხვერპლნი იყვნენ, ნათელი გახდა, „ქართული ოცნება“  სასამართლო სისტემასთან დაკავშირებით რას აპირებდა.

_ იურიდიულ საკითხთა კომიტეტის ყოფილმა თავმჯდომარემ ეკა ბესელიამ განაცხადა, რომ პარტიის იმ შემთხვევაში დატოვებს, თუ „ქართული ოცნება“ თანამდებობებზე პარლამენტში ამჟამად წარმოდგენილ მოსამართლეებს უვადოდ განამწესებს. როგორ ფიქრობთ, სიის ჩაგდების შემთხვევაში, მმართველ პარტიას ერთიანობის შეინარჩუნების რესურსი გააჩნია?

_ სიის ჩაგდების შემთხვევაშიც კი “ქართულ ოცნებას“ ერთიანობის შენარჩუნება გაუჭირდება. ბიძინა ივანიშვილი ყოველთვის ახერხებს გუნდის წევრები შეკრიბოს, ზოგი დასაჯოს და ზოგი პარტიიდან გარიცხოს, თუმცა შემცვლელს მალე ნახულობს. საქართველოში მედროვეებს რა გამოლევს.

_ საქართველოს პრეზიდენტმა სალომე ზურაბიშვილმა მოულოდნელად განაცხადა, რომ ჩემს გაპრეზიდენტებაში „ქართულ ოცნებას“  წვლილი არ მიუძღვისო. რატომ სურს ზურაბიშვილს „ქართულ ოცნებასთან“ ასე მკვეთრი დისტანცირება ?

_ სალომე ზურაბიშვილს უნდა პიროვნებად იქცეს, რაც გამორიცხულია.  მეორე ტური როგორ ჩატარდა, ჰგონია დაგვავიწყდა?! რა პერსონა იყო ზურაბიშვილი ისეთი, რომ არჩევნებში დამოუკიდებელი პიროვნების სტატუსით გაემარჯვა?  სალომე ზურაბიშვილი სულელი ადამიანი არ არის და ხედავს იმას, რა დღეშია მმართველი პარტია, როგორ უპირისპირდებიან ერთმანეთს, ამიტომ  აწყობს, თავი ისე წარმოაჩინოს, თითქოს პრეზიდენტი არც ერთი პარტიის დახმარებით არ გამხდარა.

_ მმართველი პარტია ცილისწამების შესახებ კანონს ამკაცრებს. მედიაექსპერტები პარალელურად მოსალოდნელ საფრთხეებზე საუბრობენ. ჯერჯერობით, კანონის შინაარსი უცნობია, თუმცა, როგორ ფიქრობთ, მმართველი პარტია სიტყვისა და გამოხატვის  თავისუფლების შეზღუდვისთვის ემზადება?

_საქართველოში ცილისწამების ამკრძალავი კანონი დიდი ხანია არსებობს, რომელშიც ძალიან კონკრეტულად არის გაწერილი ცილისწამების შესახებ ყველა მუხლი. ძირითადად, ვინ შეიძლება შეზღუდოს ამ კანონმა? რა თქმა უნდა, მედია, ამიტომ ძალიან სენსიტიურ საკითხთან გვაქვს საქმე. 2004 წელს სააკაშვილმა ცილისწამების შესახებ კანონი მიიღო და ყოფილი პრეზიდენტის დროს, რაც სისხლის სამართლებრივად არ ისჯებოდა, ახლა „ქართულ ოცნებას“ უნდა დაისაჯოს?! მაშინ, როცა „ქართული ოცნების“ ვერსიის მიხედვით,  მათი მმართველობის პირობებში, ქვეყანაში დემოკრატია  გაიფურჩქნა.