ელექტროენერგიის მიწოდების საკითხი, დღესდღეობით, მეტ-ნაკლებად ყველგან გადაჭრილია, თუმცა, გეგმიური გამორთვების გარდა, ზოგჯერ, როცა არც ქარია და არც სხვა სტიქიური მოვლენა, უმიზეზოდ გამორთვაც ხდება.
_ რაც უნდა გეგმიური შეკეთება იყოს, ორი სოფელი ერთდროულად არ უნდა გამოირთოს. შეიძლება, ისე გაკეთდეს, რომ საწარმოს ხელი არ შეეშალოს. ჩვენთან ასე როცა ხდება, ვზარალდებით და ვცდებით, _ ამბობს შპს “კონჭკათი-ორიათასთვრამეტის” დამფუძნებელი იაშა ცენტერაძე.
ციტრუსოვანთა მიმღებ პავილიონში, რამდენიმე აგრეგატი მუშაობს და დაფასოების პროცესს, როგორც თავად ამბობენ, ელექტროენერგიის უეცარი შეწყვეტა ხელს უშლის, საბოლოოდ კი ეს ცუდად ისახება შედეგზე.
იაშა ცენტერაძე, ასევე, აღნიშნავს, რომ საწარმოს შესასვლელთან დამონტაჟებულია გაზის და ელექტრომრიცხველები, დგას ელექტრობოძი, რომელიც ხელს უშლის მანქანების თუ ქვეითების გადაადგილებას შენობის მისასვლელთან.
_ ჩვენ ვთხოვეთ ენერგოკომპანიის ხელმძღვანელობას ოზურგეთში, რომ ამ საქმეში დაგვხმარებოდა. ჯერ არ მოსულან და იმედია, არ დაგვზარდებიან. მზად ვარ, ისევ ჩემს საკუთრებაში არსებულ მიწის ფართობზე გადავიტანო ბოძი, ოღონდ მოშორებით, ისე, რომ ხელი არ შეგვეშალოს მუშაობაში. რა თქმა უნდა, შესაბამის მომსახურებაში გადავიხდით შესაბამის ღირებულებას. ზოგადად კი, ელექტროენერგიის მოწოდებაში ხარვეზები, რაც შეიძლება ნაკლებად უნდა იყოს, _ თქვა იაშა ცენტერაძემ.
“გურია ნიუსი” “ენერგოპრო ჯორჯიას” ოზურგეთის სერვისცენტრის მენეჯერს, გია ნაკაიძეს ესაუბრა:
_ თუ დახმარება სურს, ჩვენ რატომ არ მოგვმართა? როდის იყო “გურია ნიუსს” ელექტრობოძები გადაჰქონდა ერთი ადგილიდან მეორეზე? შემოვიდეს განცხადებით და დავეხმარებით.
_ მან თქვა, რომ უკვე მოგმართათ.
_ არ მოუმართავს. თუ ვინმეს უთხრა სიტყვიერად, მე არ ვიცი. შემოვიდეს განცხადებით. მას საწარმოზე არ აქვს დაფიქსირებული ეს მრიცხველი. საკუთარ სახლში აქვს გახსნილი პავილიონი. თქვენ რატომ მოგმართათ? მოვიდეს განცხადებით და დავეხმარებით.
_ ჩვენ თვითონ ვიყავით იქ. სხვადასხვა სახის პრობლემაზე საუბრისას, ითქვა ელექტროენერგიის შეფერხებით მიწოდებასა და ასევე, მრიცხველის და ბოძის გადატანის აუცილებლობაზე.
_ გასაგებია, მაგრამ ჩვენთან არ მოსულა. მაშინ მეცოდინებოდა. ელექტროენერგიის გათიშვას და საავარიო გამორთვას შორის არის სხვაობა. პირველ შემთხვევაში ყოველთვის ინფორმირებულია მოსახლეობა. როცა ერთი უბანი ან თუნდაც სოფელი უნდა გამოირთოს, არც ისე მოხერხდება, რომ სადმე ერთ ოჯახში ან ერთ პავილიონში დარჩეს შუქი. საავარიო შემთხვევაში კი დაუყოვნებლივ კეთდება. გეგმიური გამორთვები კვლავ გაგრძელება, მით უფრო, ზამთარი მოდის და ძირითადად, მოწესრიგებული უნდა იყოს ხაზების თუ ბოძების მდგომარეობა. ჩვენ მზად ვართ, მოვემსახუროთ ყველას, მათ შორის, ადამიანს, რომელმაც საწარმო გახსნა და ხალხი დაასაქმა, _ გვითხრა ნაკაიძემ.
