ოზურგეთის მუნიციპალიტეტის საკრებულოს მორიგ სხდომაზე, რომელიც 18 ივლისს არის ჩანიშნული, “ოზურგეთის მუნიციპალიტეტის ადმინისტრაციულ საზღვრებში სატრანსპორტო საშუალებების პარკირების რეგულირების წესისა და პარკირების საფასურის დადგენის შესახებ” უნდა იმსჯელონ და, აქედან გამომდინარე, უნდა დაიწყოს ამ საკითხის ადმინისტრაციული წარმოება.
“მგონი, “სტაიანშიკები” გადავლენ ა(ა)იპ-ებში”, _ ასე დაიწყო თავისი გამოსვლა ოზურგეთის მუნიციპალიტეტის მერის მრჩეველმა ალექსანდრე ბერიძემ ოზურგეთის მუნიციპალიტეტის საკრებულოს ბიუროს სხდომაზე.
ალექსანდრე ბერიძე “გურია ნიუსთან” საუბრის დროს ვერ აზუსტებს თარიღს, როდის შემოვა ოზურგეთში პარკირების სისტემა:
“ზუსტი თარიღი უცნობია, როდის შემოვიღებთ პარკირებას, რადგან საკრებულოს სხდომაზე ჯერ არ არის გატანილი ეს საკითხი. ადმინისტრაციული საქმის წარმოებაა დასაწყები. თუ საკრებულო არ დაუჭერს მხარს, შეიძლება, ეს პროექტი საერთოდ არ გახორციელდეს.
ეს საკითხი იმიტომ დადგა დღის წესრიგში, რომ ქალაქი ძალიან გადაიტვირთა და უკვე აუცილებელია რაღაცა ზომების მიღება. თან მუნიციპალიტეტის ვალდებულებაში შედის, პარკირების წესი იყოს დარეგულირებული. ამ ვალდებულებამ და პრობლემამ გამოიწვია ის, რომ მიგვეღო ახალი წესი”, _ გვითხრა ალექსანდრე ბერიძემ.
პროექტი ჯერ არ განუხილავს საკრებულოს წევრებს, მაგრამ ქალაქში უკვე დაინტერესდნენ აღნიშნული საკითხით. მაგალითად, ხომ არ არის საშიშროება იმისა, რომ განმეორდეს იგივე, რასაც თბილისში “სითი პარკი” აკეთებდა და რასაც ხალხის გაღიზიანება მოყვა. ამასთან დაკავშირებით მერის მრჩეველს ასეთი მოსაზრება აქვს:
“სითი პარკის” სიტუაცია ოზურგეთში ვერ განმეორდება, რადგან აქ საათობრივი გადასახადის სისტემის შემოღებაა დაგეგმილი, თბილისში კი სხვა სისტემა მუშაობდა.
იქნება ორი ფასიანი ზონა _ წითელი და ყვითელი, ერთი უფასო _ მწვანე.წითელი ზონა, სადაც ზედმეტად გადატვირთულია ტერიტორია და ყვითელი ზონა, სადაც ნაკლებად გადატვირთული სიტუაციაა. წითელ ზონაში ერთი საათით პარკირება ერთი ლარი ეღირება განსაკუთრებულ შემთხვევაში, დანარჩენ დროს კი _ 50 თეთრი”.
ამ წესის შემოღების შემდეგ, შეიძლება, დღეს მოქმედი “სტაიანშიკები” სამსახურის გარეშე დარჩნენ, თუმცა, ამ ინფორმაციას თავად ალექსანდრე ბერიძე არ ადასტურებს. ჩვენ, ასევე, დავინტერესდით რამდენი “სტაიანშიკია” დღეს ოზურგეთში.
“საერთოდ, “სტაიანშიკების” საკითხი რთული თემაა. ჩავთვალოთ “შავიც” არაა, მაგრამ რაღაცა ჩრდილოვანი ბიზნესი თემაა ჩვენს ქალაქში. რამდენი “სტაიანშიკი” მუშაობს და რას აკეთებს, ეს ოფიციალურად არსად არ არის აღრიცხული. ყოველ შემთხვევაში, ჩვენთან ამის შესახებ არანაირი ინფორმაცია არ არსებობს. პარკირების უფლებები მუნიციპალიტეტს გადმოცემული ჰქონდა კერძო პირებზე, კერძო მეწარმეებზე და ისინი ამის აღრიცხვას როგორ აკეთებდნენ, არ ვიცი.
ჩვენ შეგვეძლო სხვა გზაც აგვერჩია და ავტომატური ბანკომატების სისტემა შემოგვეღო, მაგრამ ეს გამოიწვევდა იმას, რომ ეს ხალხი დარჩებოდა სამსახურის და შემოსავლების გარეშე. ახალ მოდელზე იმიტომ ვმუშაობთ, რომ ისინი უმუშევრები არ დარჩნენ”, _ თქვა ალექსანდრე ბერიძემ.
“პარკირების პრობლემა აქილევსის ქუსლივით არის ოზურგეთში და ნამდვილად პრობლემის წინაშე ვდგავართ. სრული ქაოსური მდგომარეობაა და აბსოლუტურად მოუწესრიგებელია პარკირების სისტემა. ქალაქის ცენტრი უკიდურესად გადატვირთულია და გადაადგილება მხოლოდ მძღოლებს კი არა, ქვეითად მოსიარულეებსაც უჭირთ”, _ ასე ფიქრობს ოზურგეთის მუნიციპალიტეტის საკრებულოს წევრი ლავრენტი ბიგვავა.
მისივე თქმით, ეს პროექტი, გარკვეულწილად, ხელს შეუწყობს ქალაქის განტვირთვას, დაარეგულირებს სხვა სიტუაციებს _ მაგალითად, აღმოფხვრის ქალაქ ოზურგეთის ბაზრის, ყოფილი სასტუმროს მიმდებარე ტერიტორიაზე და სხვადასხვა ადგილებზე დღეს არსებულ სრულ ქაოსს:
“ამ ეტაპზე პროექტის დეტალური ანალიზი არ შემიძლია _ იგი განხილვის პროცესშია. თავად იდეა კარგია. შეიძლება, რაღაც ხარვეზები იყოს პროექტში, მაგრამ ამასთან დაკავშირებით მოგვიანებით გავაკეთებ კომენტარს.
წინასწარ რაც შემიძლია ვთქვა, ისაა, რომ გადახდის საფასურიც მისაღებია _ ოზურგეთში ცხოვრობენ ადამიანები, რომლებიც ერთსაათიან პარკირებაში ერთ ლარს გადაიხდიან. კარგია ისიც, რომ სამ ზონად იქნება დაყოფილი ქალაქი და სხვადასხვა ზონაში სხვადასხვა ფასები იქნება. ეს არ არის საგანგაშო წითელი ზონისთვის.
ისეა გადატვირთული ქალაქის ცენტრი, მანქანას ვერ გააჩერებ და გავლაც ძნელია. ერთი ფენის ინტერესები დავიცვათ და სხვა ფენა დავჩაგროთ, არ იქნება მართალი. ამიტომ, ოქროს შუალედი უნდა გამოვნახოთ. ქალაქის ცენტრი უნდა განიტვირთოს, რისთვისაც ადგილობრივმა ხელისუფლებამ ქმედითი ნაბიჯები გადადგას _ ეს პრობლემა ერთხელ და სამუდამოდ უნდა გადაიჭრას”, _ ამბობს “გურია ნიუსთან” ლავრენტი ბიგვავა.
