ბერძნულ-რომაული ჭიდაობა, რომელიც თანამედროვე სახით საფრანგეთში მეცხრამეტე საუკუნის პირველ ნახევარში ჩამოყალიბდა, საქართველოში ძალიან პოპულარულია და სპორტის ამ სახეობაში მრავალი მსოფლიო და ოლიმპიური ჩემპიონი ჰყავს საქართველოს.
ოზურგეთის სპორტული ტრადიცია ამ კუთხით უმნიშვნელოვანესია.
საქართველოს დამსახურებული მწვრთნელი ბერძნულ-რომაულ ჭიდაობაში, გურამ მაჭარაშვილი, 35 წელია ამ საპატიო საქმეს ემსახურება და როგორც საქართველოში ერთ-ერთი ყველაზე ტიტულოვანი სპორტსმენის, მანუჩარ კვირკველიას გამზრდელი და დამკვალიანებელი სპორტის ამ სახეობაში, განსაკუთრებით ამაყობს მისით.
ოზურგეთელი და ზოგადად საქართველოს სპორტული საზოგადოება იცნობს მას, როგორც სპორტზე უსაზღვროდ შეყვარებულ, მოტივირებულ მწვრთნელს, უაღრესად თავმდაბალ და შრომისმოყვარე ადამიანს.
მალე 40 წელი გახდება, რაც გურამ მაჭარაშვილი ბერძნულ-რომაული ჭიდაობის მიმართულებით მწვრთნელის რთულ და საპასუხისმგებლო საქმიანობას ეწევა.
“საქმეზე თავდავიწყებით შეყვარებული,”, “თავმდაბლობის ეტალონი”, ” მოსწავლე სპორტსმენთა უსაყვარლესი მწვრთნელი,” “უანგარო და უღალატო”… _ ეპითეტები, რომლითაც ოზურგეთში და სრულიად საქართველოში გურამ მაჭარაშვილს ამკობენ მრავალი ათეული წელია, უყოყმანოდ გვაძლევს უფლებას, ამ კეთილშობილ პიროვნებასა და მაღალი კლასის პროფესიონალის შესახებ ვესაუბროთ ჩვენს მკითხველებს, სპორტის მოყვარულ საზოგადოებას.
გურამ მაჭარაშვილი ოზურგეთში დაიბადა, 1958 წელს. სპორტული მონაცემების და ჭიდაობის სურვილის მქონეს, საშუალება მიეცა მოსწავლეობის ასაკიდანვე დაეწყო ჭიდაობა.
_ მე მაშინ ნასაკირალის საშუალო სკოლაში ვსწავლობდი. სკოლის დირექტორი, ვლასი თალაკვაძე ფანატიკურად გახლდათ შეყვარებული სპორტზე. ალბათ, ერთადერთი დირექტორი იყო მთელ გურიაში, რომელიც არ აცდენდა არც ერთ შეჯიბრს, სადაც სკოლის მოსწავლეები იღებდნენ მონაწილეობას. ამიტომ მოსწავლეთათვის სკოლის წინამძღოლის ასეთი მხარდაჭერა, ორმაგი სტიმული იყო გამარჯვების მოსაპოვებლად, _ იხსენებს გურამ მაჭარაშვილი.
სკოლის დამთავრების შემდეგ, სამხედრო სამსახურში როცა წავიდა, იქაც გააგრძელა ჭიდაობა. თბილისში, არმიის სპორტულ კლუბში ვარჯიშობდა. ჯარში ყოფნის დროს არაერთხელ გახდა შეიარაღებული ძალების გუნდის _ “ცსკას” ჩემპიონი.
_ როცა სამხედრო სამსახური დავასრულე, თბილისში გავაგრძელე ჭიდაობა, საქართველოს დამსახურებული მწვრთნელის, ილია ჩხარტიშვილის ხელმძღვანელობით. მონაწილეობა მივიღე და ორთაბრძოლები მოვიგე კიდეც არა ერთ საერთაშორისო ტურნირში, რომელიც იმართებოდა პოლონეთში, უნგრეთში, ფინეთში, ნორვეგიაში. რა თქმა უნდა, საბჭოთა კავშირის სახელით გამოვდიოდი. ყოველთვის პირველი ადგილი არ მომიპოვებია, მაგრამ მუდამ ვიყავი პრიზიორი, _ გვიამბობს ბატონი გურამი წარსულ გამარჯვებებზე.
1979 წლიდან 1983 წლის ჩათვლით, სსრ კავშირის ნაკრების წევრობის კანდიდატი იყო. ამ პერიოდში, მსოფლიო სტუდენტურ ფესტივალზე, ბერძნულ-რომაულ ჭიდაობაში მეორე ადგილი აიღო. გრან-პრის საერთაშორისო ტურნირები არაერთხელ მოიგო უნგრეთში, ფინეთსა და პოლონეთში.
გურამ მაჭარაშვილი პარალელურად სწავლობდა საქართველოს ფიზკულტურის ინსტიტუტში, რომლის დასრულების შემდეგ, მალე სამწვრთნელო მუშაობა დაიწყო.
თავდაპირველად, როგორც მწვრთნელმა, თბილისში, “შრომითი რეზერვების” მთავარ მწვრთნელად სამი წლის მანძილზე იმუშავა. მისი მწვრთნელობის პერიოდში ევროპის პრიზიორები გახდნენ მოსე ჭაკნელიძე, ხვიჩა მეფარიშვილი, ლევან ოდიშარია, ნაიბი დვალიძე და არაერთი სხვა.
გურამ მაჭარაშვილი იხსენებს ხვიჩა მეფარიშვილის კარიერას, რომელიც ევროპის და მსოფლიოს პრიზიორი იყო ბერძნულ-რომაულ ჭიდაობაში, შემდეგ უკრაინაში გადავიდა საცხოვრებლად და ამ ქვეყნის ორგზის მოწვევის პარლამენტარი გახდა.
1989 წლიდან, როცა არეულობის წლები დაიწყო, საბჭოთა კავშირი დაიშალა და საქართველომ დამოუკიდებლობა გამოაცხადა, მშობლიურ ოზურგეთში დაბრუნდა.
ძნელი იყო 90-იან წლებში მუშაობა. შუქი არ იყო, მოსწავლეებს უჭირდათ. სპორტულ დარბაზამდე რომ მოსულიყვნენ, ბევრ ბავშვს სოფლიდან მგზავრობის ფული არ ჰქონდა. გურამ მაჭარაშვილი ყველა ღონეს ხმარობდა, როგორმე შესაბამისი სოფლების თუ რაიონების ხელმძღვანელები დახმარებოდნენ ნორჩ სპორტსმენებს.
_ ბევრმა მიატოვა ასეთი გასაჭირის გამო ვარჯიშზე სიარული, თუმცა, უფრო მოტივირებულები აგრძელებდნენ ჭიდაობას სპორტის გაერთიანებულ ცენტრ ,”ამირანში”.
მოგვიანებით, ეს დარბაზი ოზურგეთის სპორტის გაერთიანებულ ცენტრს გადაეცა და მას შემდეგ სამუშაო პირობები შედარებით გაუმჯობესდა.
_ უამრავი წარმატებული სპორტსმენი გავზარდეთ ამ ხნის მანძილზე. საქართველოში ყველაზე ტიტულოვანი ჩემპიონის მწვრთნელი ვარ და მეამაყება. მანუჩარ კვირკველია ჩემი გამოზრდილია. მან ყველა ტიტული მოიგო, რაც არსებობს _ გახდა ევროპის, მსოფლიოს და ოლიმპიადის ჩემპიონი. მაქვს უდიდესი სურვილი, ერთი ასეთი ჩემპიონი კიდევ გავუზარდო ქვეყანას. მყავს ძალზე პერსპექტიული რამდენიმე ახალგაზრდა მოჭიდავე! ვნახოთ, _ თავის უზენაეს სურვილს გვიმხელს ბატონი გურამი.
გურამ მაჭარაშვილის გაწვრთნილი მრავალი ახალგაზრდა სპორტსმენი, მათ შორის, ოზურგეთელები, დღეს გერმანიის სხვადასხვა კლუბებში წარმატებით ჭიდაობენ. ესენი არიან ზურაბ მაჭარაშვილი და შოთა ღლონტი.
წელს, საქართველოდან ბერძნულ-რომაულ ჭიდაობაში მსოფლიო ჩემპიონატის პრიზიორი გახდა 20 წლის საბა მამალაძე.
_ საბა ჩემი მოსწავლეა. სოფელ დვაბზუში ცხოვრობს. სხვათა შორის, დვაბზუში სექცია გვაქვს გახსნილი. გული მწყდება _ გერმანიაში, სოფლების კლუბებსაც კი სპონსორები ჰყავს. ოდესმე, ალბათ, ჩვენთანაც იქნება ასე. ახლა ოცდაათამდე მოსწავლე მყავს. საუკეთესო მონაცემები აქვს ჭანიეთელ ნიკა ღლონტს. ვიმეორებ, მინდა, ერთი ყველაზე ტიტულოვანი ჩემპიონი კიდევ გავზარდო, _ გვეუბნება მწვრთნელი და იმედოვნებს, რაც არ უნდა მოხდეს, აწი ბერძნულ-რომაული ჭიდაობის საქმე, უკან არ წავა და საქართველოს კიდევ მრავალი ჩემპიონი ეყოლება.
ბატონ გურამს ყველაზე ძალიან გული იმ დაკარგულ, უნიჭიერეს სპორტსმენებზე წყდება, რომლებსაც, მისივე თქმით, საჩემპიონო მონაცემები ჰქონდათ და ზოგი ტოტალიზატორში თამაშმა ააცდინა გზას, ზოგსაც ცხოვრების გზაზე არსებულმა ფათერაკებმა დაატოვებინა სპორტი.
უსაზღვროდ უხარია, რომ ახლახან ერთი უნებლიედ ფათერაკში გახვეული მოჭიდავე დაუბრუნდა სპორტს და უმალვე ოქროს მედლით დაამშვენა თავისი ბიოგრაფია.
დღეისთვის მრავალ ახალგაზრდა წარმატებულ მწვრთნელთა შორის, რომლებიც ოზურგეთში მომავალ თაობას ასწავლიან ჭიდაობას და გამარჯვებისკენ ლტოლვას, გურამ მაჭარაშვილის აღზრდილებიც არიან. ესენია: უჩა მჟავანაძე, კობა ბალავინოვი, დავით მაჭარაშვილი, ქემალ ხარაბაძე და სხვები.
ყველაზე დიდი ნიშა, რითაც ბატონ გურამს შეუძლია იამაყოს, არის ის, რომ ბერძნულ-რომაულ ჭიდაობაში, ყველაზე გამორჩეული სკოლა ჰყავს ოზურგეთს.
_ საქართველოს ნაკრებში, 30 პროცენტი მაინც, ჩვენი, ოზურგეთელი მოჭიდავეებია! ეს მხოლოდ ჩემი დამსახურება კი არ არის! ტრადიცია 1959 წლიდან მოდის, როცა ოზურგეთში ჭიდაობის სკოლა დააფუძნა მიხეილ გოგუაძემ _ ის საქართველოს დამსახურებული მწვრთნელი იყო. ასევე, უდიდესია ძმები ზურაბიანების ღვაწლი.
მთავარია, უსაზღვროდ გიყვარდეს შენი პროფესია, შენი საქმე და იყო მოტივირებული. გამარჯვება და წარმატებები კი, უცებ არა, მაგრამ აუცილებლად მოვა! _ ამ სიტყვებით ასრულებს ჩვენთან საუბარს, კიდევ ერთი , ყველაზე ტიტულოვანი სპორტსმენის გაზრდაზე მეოცნებე სახელოვანი მწვრთნელი.
დიდ წარმატებებს, გამარჯვებებს ვუსურვებთ გურამ მაჭარაშვილს, უამრავი თაობის უსაყვარლეს მწვრთნელს!
[sexy_author_bio]
