“ევროპული ინტეგრაცია საქართველოს უსაფრთხოებისა და ეკონომიკისთვის ძალიან მნიშვნელოვანი იქნება“

დავით ჭკადუა,  სტუდენტი, “წიგნების თაროს“ მოთამაშე

„ევროინტეგრაციის პროცესი ბევრი კუთხით არის მნიშვნელოვანი როგორც ეკონომიკური ასევე უსაფრთხოების მხრივ; იმიტომ, რომ ყველაზე ცოტა, ჩვენ შეგვიძლია ავიღოთ ევროკავშირის ბოლო გაფართოება და შევადაროთ ქვეყნების მანამდელი და დღევანდელი მდგომარეობა _ მათი კეთილდღეობა რადიკალურად გაიზარდა, როგორც მათი უსაფრთხოება. ჩვენ შეგვიძლია ცალსახად ვთქვათ, რომ გარდა იმისა, რომ საქართველოსთვის ეკონომიკურად ეს იქნება ძალიან მნიშვნელოვანი ასევე, უსაფრთხოებისთვის იქნება ძალიან მნიშვნელოვანი.

ორი მთავარი ფაქტორის გამოყოფა შემიძლია, თუ რა სარგებელი შეიძლება იქონიოს საქართველოს მოქალაქეზე. პირველი, ეს არის ევროკავშირის პასპორტი, რომლითაც შეიძლება უამრავ ქვეყანაში მოგზაურობა უვიზოდ, მათ შორის, თუნდაც აშშ-ში. ეს ბევრად უფრო გააადვილებს არათუ მხოლოდ ტურისტული მიზნებისთვის გადაადგილებას, არამედ, სტუდენტებსაც გაუადვილებს ყოფას, ვისაც აშშ-ში უნდა სწავლის გაგრძელება. მეორე ფაქტორი არის სავალუტო რეჟიმი: ჩვენ გვექნება გაცვლით ვალუტად ასევე ევრო, რომელიც არის ბევრად უფრო მყარი ვალუტა, რაც გულისხმობს იმას, რომ თავის მხრივ იმ ფინანსურმა რყევებმა, რომელიც ლართან მიმართებაში ხდება ხოლმე, არ იქონიოს გავლენა საქართველოს რიგითი მოქალაქის ჯიბეზე.

ევროკავშირიდან იზოლაციამ საქართველო შეიძლება მიიყვანოს სავალალო მდგომარეობამდე (ევროკავშირიდან იზოლაცია გულისხმობს აშშ-დან იზოლაციაც)_ რეალურად, ჩვენი ეკონომიკა დგას ემიგრანტების მიერ გამოგზავნილ ფულზე, ჩვენ ვართ მომხმარებელი ქვეყანა და ჩვენი ძირითადი ეკონომიკა მუშაობს ტურიზმით. აქ ორი ფაქტორია: ერთი, რომ ტურიზმი უფრო შემცირდება და მეორე, სანქციების გამო, შეიძლება არასანდო ქვეყანა გავხდეთ. გარკვეული ბიზნესები, რომლებიც ფინანსდებიან უცხოეთიდან, შეიძლება დაიხურონ და ჩვენ, რეალურად, არ გვაქვს გარანტია, რომ ისინი ეკონომიკურად ჩვენ დაგვიდგებიან გვერდში მაშინ, როდესაც დასავლეთიდან ვიქნებით იზოლირებული.

დასავლეთიდან იზოლაცია გამოიწვევს იმას, რომ ლარი ბევრად უფრო გაუფასურდება და თითოეულ მოქალაქეს შეექმნება სერიოზული პრობლემა, ჩვენ შეიძლება დავბრუნდეთ კუპონების პერიოდშიც კი _ ესაა მთავარი საფრთხე.

უკანასკნელ დღეებში ჩვენ საფრთხის წინაშე დავდექით, რომ შეიძლება ევროპულმა და ამერიკულმა სასწავლებლებმა არ აღიარონ ქართული დიპლომები, რაც იმას ნიშნავს რომ ქართველ სტუდენტებს კიდევ უფრო გაუჭირდებათ ისწავლონ უცხოურ სასწავლებლებში. ჩვენ ვიცით, რომ ძალიან დიდი მოთხოვნაა ევროპული და ამერიკული სასწავლებლების მიმართ საქართველოდან, რაც, თავის მხრივ, გასაგებიც არის, იმიტომ, რომ შეიძლება ბევრ სტუდენტს არ აკმაყოფილებდეს ქართული განათლების სისტემა. ეს შექმნის ძალიან დიდ პრობლემას არა მხოლოდ ამ მხრივ, არამედ იმ მხრივაც რომ ძალიან ბევრი კვალიფიციური კადრი მოგვაკლდება მომავალში_ ერთადერთი გზა მიიღო შესაბამისი განათლება, იქნება წახვიდე ქვეყნიდან და იქ დარჩე დიდხანს, და ეს კიდევ ცალკე დიდი პრობლემაა“.

“გურია ნიუსმა” მიიღო დაფინანსება ამერიკის შეერთებული შტატების საერთაშორისო განვითარების სააგენტოსგან (USAID).
“გურია ნიუსი” ინარჩუნებს სრულ სარედაქციო დამოუკიდებლობას. “გურია ნიუსის” მიერ გამოქვეყნებული მასალა არ ასახავს USAID-ის ან ამერიკის შეერთებული შტატების მთავრობის პოზიციას