“არა მგონია, ღირდეს კითხვის დასმა, მაინც გათიშულები ხართ და რა აზრი აქვს?! არ შეგვიტანია სასამართლოში სარჩელი, ვინ-ვინ და ეს თქვენ ძალიან კარგად იცით… თქვენზე უკეთ არავინ არ იცის ეგ… არასწორად მეკითხებით. ჩვენ დავამთავრეთ უკვე _ სამართლებრივად მერიასთან აღარაფერი საქმე არ გვაქვს; მათ გადაწყვიტეს, რომ ეს მიმართულება მიეცათ და სასამართლოსკენ წასულიყვნენ. ეს იყო ჩემი სიურპრიზი, როცა დავბრუნდი საახალწლო შვებულებიდან”, _ ასეთი კომენტარი გააკეთა ბიზნესმენმა ზურა ჩხაიძემ “გურია ნიუსთან“ ქალაქ ოზურგეთის მერიასთან დაპირისპირების შესახებ, რომელიც ქალაქ ოზურგეთში, აუქციონის წესით შეძენილ, ყოფილ სასტუმრო “გურიას“ შენობას ეხება.
ბიზნესმენი “გურია ნიუსთან“ არ ადასტურებს, ინფორმაციას, რომ შპს“კახური ტრადიციული მეღვინეობა“ სასამართლოს მიმართავს ქალაქ ოზურგეთის მერიის წინააღმდეგ, ხოლო ქალაქ ოზურგეთის მერიის მიერ მოწოდებული ოფიციალური ინფორმაციით, შპს ‘’კახური ტრადიციული მეღვინეობა’’ სასამართლოს მეშვეობით იმ დოკუმენტების ბათილად ცნობას ითხოვს, რომლითაც გაუქმდა იმ პირობებიანი აუქციონის შედეგები, რომელზეც აღნიშნულმა შპს-მ შეისყიდა ქალაქ ოზურგეთში, პეტრიწის ქუჩა 7-სა და გაბრიელ ეპისკოპოსის ქუჩა 1-ში მდებარე უძრავი ქონება.
“ქალაქის მერიამ აღნიშნული პროცესის აბსოლუტურად ყველა ეტაპი წარმართა კანონის სრული დაცვით. აქედან გამომდინარე, სასამართლოსგან ველოდებით შესაბამის გადაწყვეტილებას”, _ ამბობს ოზურგეთის მერი ბეგი სიორიძე “გურია ნიუსთან“.
ქალაქის მერის განმარტებით, “დღეს, ოზურგეთის მერიას აქვს უფლება თავიდან გამოაცხადოს აუქციონი, მას შემდეგ, რაც ბატონმა ჩხაიძემ არ შეასრულა ის პირობები, რომლითაც შეიძინა ყოფილი სასტუმრო “გურია“.
როდის გაიმართება სასამართლო პროცესი, ოფიციალურად ჯერ ცნობილი არ არის.
დაპირისპირების ისტორია კი ასეთი გახლავთ: პირობებიანი აუქციონი არასაცხოვრებელი ფართის გასხვისებასთან დაკავშირებით 2015 წლის 20 ივლისს გამოცხადდა. ქონების საწყისი საპრივატიზაციო ღირებულება იყო 101 112 ლარი. აუქციონში მონაწილეობა ერთმა პრეტენდენტმა შპს “კახური ტრადიციული მეღვინეობამ” მიიღო. შესაბამისად, აუქციონში აღნიშნულმა შპს-მ გაიმარჯვა. კომპანიამ შენობაში 111 223 ლარი და 20 თეთრი გადაიხადა.
ამის შემდეგ, ერთ წელზე მეტი გავიდა და სასტუმროს რეაბილიტაცია, ხელშეკრულებაში გაწერილი ვადების შესაბამისად, არ განხორციელებულა. რის გამოც, კომპანიას ყოველდღიური ჯარიმები დაეკისრა, შემდეგ კი მას შეუწყდა ხელშეკრულებაც და ქონება ოზურგეთის მუნიციპალიტეტს დაუბრუნდა.
თუ რატომ არ განახორციელდა სასტუმრო “გურიას“ სარემონტო სამუშაოები, ბიზნესმენი ზურა ჩხაიძე “გურია ნიუსთან“ აღნიშნავდა, რომ “იყო რაღაცა პრობლემები, რომელიც. უნდა მოგვარებულიყო“.
“ჩვენ ყველაფრის ვადაში ჩავეტიეთ, ყველა ვადა დავიცავით…. აქ იყო ხარვეზი, რომელიც თავიდანვე იქნა, სამწუხაროდ, გაპარული _ შენობაში არ იყო რამდენიმე ფართი შეტანილი, მათ შორის, ტექნიკურად აუცილებელი _ კიბის უჯრედი, რომლის გარეშეც შენობა წარმოუდგენელია. ასევე, სარდაფი, რომელიც, როგორც გაირკვა მერე, ლიცენზირებული იყო რომელიღაც კომპანიაზე.
არ ვიცი ვისი ბრალია ეგ, ვისაც ეკუთვნის იმის…
ჩვენ ერთი წლის მანძილზე ვითხოვდით ამ ორი ფართის აუქციონზე გამოტანას. აუქციონი გამოვიდა 19 აგვისტოს, ერთი წლის შემდეგ და აუქციონზე გამოტანილი პირობები უკვე ჩვენ აღარ გვაწყობს, ეს ჩვენს ინტერსში აღარ შედის, ამიტომ, ჯერ-ჯერობით, მოსაგვარებელია ტექნიკური პრობლემა.
ჩვენ გავაკეთეთ აბსოლუტურად ყველაფერი, მათ შორის დავუკვეთეთ პროექტი, იმუშავა საკმაოდ გამოცდილმა ჯგუფმა, ამათ დაემატა ჩემი მშენებელი, დიზაინერთა და არქიტეტურთა ჯგუფი; მათ ერთობლივად იმუშავეს და არის გაკეთებული პროექტი, რომელიც ერთ-ერთი საუკეთესო იქნება რეგიონისთვის და ქალაქისთვის. ეს მზადაა. ეს შენობა პრობლემურია – მისი პირველი სართული გაყიდულია და მას ჰყავს მესაკუთრე. შენობა ანსამბლურად ერთიანად ვერ იკვრება. ამიტომ, ვინაიდან ერთი ფლიგელი არის პრობლემური, ტექნიკურმა ჯგუფმა დასკვნა მოგვცა _ თუ არ იქნება ის ფლიგელი ჩვენი, ვერ გავაგრძელებთ მუშაობას.
აი, ეს ტექნიკური პრობლემა იყო. ამას სჭირდება დრო, სწორი გაანალიზება. ვიდრე ჩვენ ამაზე არ მოვრიგდებით, რა თქმა უნდა, საკითხი გადაუჭრელი იქნება. მთავარია, პროექტი და ეს მზადააა. გადაწყვეტილების მიღების მომდევნო დღეს დავიწყებთ მშენებლობას“, _ამბობდა ზურაბ ჩხაიძე “გურია ნიუსთან“.
ქალაქ ოზურგეთის მუნიციპალიტეტის მერი ბეგლარ სიორიძე კი მიიჩნევდა, რომ სასტუმროს შენობა პირობიანი აუქციონით გაიყიდა და ამ პირობების შეუსრულებლობა ხელშეკრულების შეწყვეტის საფუძველია: “სასტუმრო ჩვენ გავყიდეთ პირობიანი აუქციონით. სამუშაოები უნდა განეხორციელებინა აუქციონში გამარჯვებულ კომპანიას და ჩაედო 800 000 ლარის ინვესტიცია. ერთი წლის თავზე, მთლიანად ამ სასტუმროს გარე ფასადის რემონტი დასრულებული უნდა ყოფილიყო. ჯერ დაწყებულიც კი არ არის არაფერი. ხელშეკრულებიდან გამომდინარე, წერილობით გავაფრთხილეთ. ხელშეკრულებაში სანქციებია ჩადებული ყველა ვადაგადაცილებულ დღეზე; სადღაც 800 ლარია ჯარიმა და თუ კი არ შეასრულებს ამ პირობას, ერთი თვის ვადაში საერთოდ შეუწყდება ხელშეკრულება და შესაბამისად, ეს ქონება მუნიციპალიტეტს დაუბრუნდება.
არსებობს ამ კომპანიის დამფუძნებლების მხრიდან რაღაც მოსაზრება, რომელიც, ჩემი აზრით, კანონთან შეუსაბამოა _ მათ აქვთ სურვილი შეისყიდონ ორი ოთახი, რომელიც ჩვენ არ გაგვიტანია აუქციონზე და ჩვენი კი არა, ეკონომიკის სამინისტროს ბალანსზე იყო. იმის გარეშე ვერ დავიწყეო – ასეთი მიზეზი აქვთ, მაგრამ ჩვენ რაც მივყიდეთ, ის უნდა გაეკეთებინათ, ეს გვედო პირობაში და ეს არ არის ჩვენთვის პასუხი. თუკი არ დაიწყებენ დღე-დღეზე სამუშაოებს და არ გადაიხდიან იმ ჯარიმებს, რომელიც დაწესებული აქვთ ხელშეკრულების პირობებიდან გამომდინარე, შეუწყდებათ ხელშეკრულება და ქონება მუნიციპალიტეტს დაუბრუნდება“, _ ამბობდა ქალაქის მერი.
