“ხმელთაშუა ზღვა სამაშველო ნავების გარეშე სისხლის ზღვად იქცევა”,_აღნიშნულ განცხადებას The Guardian-ის ინფორმაციით გაეროში აკეთებენ.
გაეროს ლტოლვილთა უმაღლესი კომისარიატის ინფორმაციით, ათასობით ადამიანი ლიბიის დასატოვებლად მზადაა, რადგან ქვეყანა ომში გაეხვია და ძლიერი წვიმებისგან წყალდიდობებიც გახშირდა, მაგრამ სამაშველო კატარღების გარეშე ჩაძირული გემების რაოდენობა საგრძნობლად გაიზრდება.
სადამხმარებლო ჯგუფების ინფორმაციით, ლიბიის სანაპირო ბოლო დღეებში 700-მა ადამიანმა დატოვა, რომელთაგან 5% ლიბიის სანაპირო დაცვამ დაიჭირა, 40% მალტაში და 11% იტალიაში ჩავიდა, სხვებს რა შეემთხვათ უცნობია.
გაეროს მონაცემებით, 2019 წლის დასაწყისში ჩრდილოეთ აფრიკიდან იტალიაში 1940 ადამიანი ჩავიდა, 350 კი დაიღუპა.
საერთაშორისო პოლიტიკური კვლევების ინსტიტუტის ინფორმაციით, იანვრიდან აპრილამდე ზღვის გადაკვეთისას ყოველ 8 ადამიანში 1 იღუპებოდა.
როგორც ცნობილია, იტალიის მმართველო კოალიცია არასამთავრობო ორგანიზაციების სამაშველო ნავებს ტრეფიკინგში ადანაშაულებს და სადამხმარებლო ნავებისთვის იტალიის პორტები დახურა.
არასამთავრობო ორგანიზაციებიც იძულებულები გახდნენ ხმელთაშუა ზღვა თანდათან დატოვონ.
არასამთავრობო ორგანიზაციების 10 კატარღადან ხმელთაშუა ზღვაში მხოლოდ 1- გერმანული ორგანიზაცია SEAWATCH რჩება.
გაეროს ინფორმაციით, ლიბიაში 60 000 თავშესაფრის მაძიებელია. ბოლო 2 თვის განმავლობაში 90 500 ლიბიელი გახდა დევნილი კონფლიქტის გამო.
დახმარების ჯგუფების ინფორმაციით, ათასობით თავშესაფრის მაძიებელი დაკავების ცენტრებში არიან, რომლებიც ძალადობას და წამებას ექვემდებარება.
