საქართველოს “საპარტნიორო ფონდის” ოფისში საჯარო აუქციონი გაიმართა, სადაც კომპანია Vanrik Agro-ს მიმართ ვალდებულების მოთხოვნის უფლება გასხვისდა.
“საპარტნიორო ფონდმა” “ვანრიკ აგროში” ინვესტიცია 2015 წელს ჩადო. 6.7 მილიონი დოლარის ინვესტიციით, ოზურგეთის რაიონის დაბა ლაითურში 70 ჰექტარზე ლურჯი მოცვის ბაღები გაშენდა, ამასთანავე აშენდა მოცვის გადამამუშავებელი საწარმო.
ხსენებული აუქციონი გამოცხადდა საინვესტიციო ფონდის მიერ გახორციელებული ინვესტიციის საფუძველზე წარმოშობილი მოთხოვნის გასხვისებაზე. აუქციონში გამარჯვებული პირისთვის აღნიშნული მოთხოვნა წარმოადგენს სს „ვანრიკ აგროს“ აქტივების შეძენის დაფინანსების საშუალებას. აუქციონის საწყისი თანხა შეადგენს 12 მლნ ლარს,
აუქციონში მხოლოდ ერთი კომპანია მონაწილეობდა. ეს არის შპს „ესკო“.
„გურია ნიუსი“ შპს „ესკოს“ დირექტორს, შოთა მარგალიტაძეს დაუკავშირდა და აუქციონის პირობებსა და სხვა დეტალებზე ესაუბრა.
_ დიდი სიამოვნებით გიპასუხებთ. დღეისთვის ჩვენ ვიყიდეთ 320 ჰა ფართობი. თუმცა, მოცვი მხოლოდ 42 ჰა-ზე არის გაშენებული. ჩვენ აუქციონი მივიგეთ მოთხოვნის გასხვისების უფლებით და მეორედ დავაყენეთ გატანის უფლება. ამის შემდეგ ჩატარდება საბოლოო აუქციონი, _ გვითხრა მარგალიტაძემ.
კითხვაზე, შესაძლებელია თუ არა, რომ კონკურენტი მაინც გამოჩნდეს და რა რაოდენობის თანხაა გადასახდელი, შოთა მარგლიტაძემ თქვა:
_ამ მომენტისთვის არ მონაწილეობს არავინ და არც სხვა დაინტერესებული კომპანია ჩანს. ჩვენ ვართ დაინტერესებული და დიდი იმედი, რომ საბოლოოდ გავიმარჯვებთ. რომც გამოჩნდეს დაინტერესებული კომპანია, პრივილიგირებული მდგომარეობა ჩვენია, რადგან გამარჯვებული ვართ. ახალმოსულ კომპანიას, თუ ასეთი გამოჩნდება, მყისიერად მოუწევს 12 მილიონის გადახდა. ჩვენ კი ამ თანხის გადახდა შვიდი წლის მანძლიზე უნდა მოვახდინოთ. ვიმედოვნებთ, რომ ჩვენ გამარჯვებას ადვილად მივაღწევთ.
_ თქვენი აზრით, რატომ გაკოტრდა კომპანია Vanrik Agro-ს?
_ეს უფრო მათ უნდა ჰკითხოთ. ჩემი აზრით, როცა დარგი მომგებიანია და მაინც კოტრდები, ეს არასწორად დაგეგმილი მენეჯმენტის ბრალია. ოქროს საბადოც კი შეიძლება გააკოტრო არასწორი მენეჯმენტით.
_როდის შეუდგება „ესკო“ ასე დიდი საქმის გახორციელებას?
_მეორე დღესვე, როგორც კი ყველაფერი დასრულდება. მაქსიმალური ინტერვალი ერთი კვირა იქნება.
რაც შეეხება გაკოტრებულ კომპანიას, Vanrik Agro გაკოტრების რეჟიმშია და 2019 წლის 12 სექტემბერს ქუთაისის საქალაქო სასამართლომ მასში გაკოტრების მმართველიც დანიშნა.
როგორც ვთქვით, “საპარტნიორო ფონდმა” “ვანრიკ აგროში” ინვესტიცია 2015 წელს ჩადო. $6.7 მილიონის ინვესტიციით, ოზურგეთის რაიონის დაბა ლაითურში 70 ჰექტარზე ლურჯი მოცვის ბაღები გაშენდა, ამასთანავე აშენდა მოცვის გადამამუშავებელი საწარმო. წარმოებული პროდუქცია ექსპორტზე გადიოდა. საპარტნიორო ფონდის განცხადებიდან ირკვევა, რომ Vanrik Agro-ს ფონდის მიმართ 4 მილიონ დოლარზე დიდი ვალდებულება აქვს.
“საპარტნიორო ფონდის” შეფასებით, Vanrik Agro-ში არსებული პრობლემები არასწორ მენეჯმენტს (კომპანიაში ირაკლი ფარცვანიას საქმიანობას) უკავშირდება, კონკრეტულად კი კომპანიის პარტნიორის მიერ არ განხორციელდა კომპანიაში დაგეგმილი ფულადი შენატანები, ამასთანავე, ფონდს კომპანიის მიერ არ მიეწოდებოდა ხელშეკრულებით გათვალისწინებული ფინანსური დოკუმენტაცია, კომპანიის მიერ არ ხდებოდა გადასახადების მომსახურება, დაგროვდა სახელფასო და სხვა ტიპის დავალიანებები, 2017 წლიდან კი კომპანია საბანკო სესხებს ვეღარ ემსახურებოდა.
ამასთანავე, “საპარტნიორო ფონდი” აცხადებს, რომ კომპანია ვითარების გამოსასწორებლად მიცემულ რეკომენდაციებსაც არ ითვალისწინებდა. მეტიც ირაკლი ფარცვანიას მმართველობის პერიოდში გამოვლინდა კომპანიისათვის საზიანო გარიგებები, მათ შორის ფარცვანიასთან დაკავშირებულ პირებთან და კომპანიებთან, რომელთაგან ზოგიერთი გარიგება იმდენად საეჭვოა, რომ შესასწავლად გადაიგზავნა სამართალდამცავ ორგანოებში.
Vanrik Agro-ს 2018 წლის ფინანსური ანგარიშგება საჯაროდ აქვს გამოქვეყნებული. დოკუმენტცის მიხედვით, კომპანია ზარალზეა. გასულ წელს კომპანიის შემოსავალმა 602,956 ლარი შეადგინა, მთლიანი ზარალი კი, 907,374 ლარი იყო.
