კავკასიის გარემოსდაცვითი არასამთავრობო ორგანიზაციების ქსელი CENN მიიჩნევს, რომ მწვანე ტბა ბუნების ძეგლად უნდა გამოცხადდეს და მასზე მკაცრი კონტროლი დაწესდეს.
მწვანე ტბის მიდამო ერთ-ერთი ადგილია, რომელიც Global Forest Watch-ის პროექტის ფარგლებში „ახალი სატყეო ტექნოლოგიები ტყის მდგრადი მართვისათვის“, კავკასიის გარემოსდაცვითი არასამთავრობო ორგანიზაციების ქსელმა, გასულ წელს შეისწავლა.
როგორც CENN -ში ამბობენ, მთებს შორის მოქცეული, ტყით შემოსაზღვრული მწვანე ტბა ერთ-ერთი ყველაზე მიმზიდველი ადგილია ტურისტებისთვის, ტყის უკანონო ჩეხვა კი, საფრთხეს უქმნის მწვანე ტბის უნიკალურ ბუნებრივ გარემოს.
„მწვანე ტბისა და მიმდებარე ტერიტორიის ალპური წიფლნარების დაცვა უნდა მოხდეს. უნდა გაკონტროლდეს წყლის ნაკადები და შეშის ჭრის პროცესები. გარდა ამისა დაცული უნდა იყოს საქონლის ძოვებისგან. მწვანე ტბის ტერიტორიაზე ვაწყდებით ტურისტულ ბანაკებს, სადაც გვხვდება კოცონები, რაც მაღალი საფრთხის შემცველია, საჭიროა აღნიშნული პროცესების კონტროლი. ასევე მაღალია დანაგვიანების ხარისხი. აღნიშნული ტერიტორია უნდა გამოცხადდეს ბუნებრივ ძეგლად და მოხდეს მათი მკაცრად გაკონტროლება“,_ ამბობენ CENN-ში.
რა ვითარებაა მწვანე ტბის ირგვლივ არსებულ ტყეში, ხდება თუ არა ხე-ტყის უკანონო ჩეხვა, როგორ ხდება ბუნებრივი გამწვანების ხელშეწყობა_ამ საკითხებზე „გურია ნიუსი“ ხულოს სატყეო ადმინისტრაციის მთავარ მეტყევეს, ნოდარ შანთაძეს ესაუბრა.
მისი თქმით, ტბის ირგვლივ გავრცელებული ტყე დაავადებული არ არის, ხე-ტყის ჩეხვა აკრძალულია, განახლება კი ბუნებრივი გზით ხდება.
„მწვანე ტბის გარშემო არის შერეული კორომი. ძირითადად არის ფოთლოვანი წიფლნარი და შიგადაშიგ არის წიწვოვანი ნაძვი და სოჭი. აქ არ არის ისეთი დაავადებები გავრცელებული, რაც სახიფათო იქნება ხე-მცენარეებისთვის. აკრძალულია ხე-ტყის ჭრა. აღმონაცენი კარგია. ბუნებრივ განახლებას ჩვენს ადმინისტრაციაში ვაკეთებთ ყოველ წელს, 400 ჰექტარზე მეტი ფართობი სხვადასხვა ადგილებზე გვაქვს შემოკავებული და დაცული, რომ პირუტყვი არ შევიდეს და რამე არ დააზიანოს“,_ამბობს შანთაძე.
მწვანე ტბა საქართველოში, ხულოს მუნიციპალიტეტში მდებარეობს არსიანის ქედის ჩრდილოეთ ნაწილში, ზღვის დონიდან 2058 მ სიმაღლეზე. ზედაპირის ფართობი 0,05 კმ². უდიდესი სიღრმე 19,4 მ. საზრდოობს თოვლის, წვიმისა და მიწისქვეშა წყლებით. გაედინება მიწისქვეშა გზით. წყლის დონე გაზაფხულზე მაღალია, ზამთარში დაბალი. სუსტად მინერალიზებული, სუფთა, გამჭვირვალე და სასმელად ვარგისია. ტბაში თევზი არ არის. ტბა ტურისტებში უკვე სარგებლობს პოპულარობით, თუმცა, ადგილობრივი ხელისუფლება მისი პოპულარობის კიდევ უფრო გაზრდას, ტბის მიმდებარე ტერიტორიების კეთილმოწყობასა და განვითარებას გეგმავს.
უკვე დაწყებულია მწვანე ტბასთან მისასვლელი საავტომობილო გზის რეაბილიტაცია.
როგორც ცნობილია, სამუშაოები ხორციელდება დეპარტამენტის საგზაო და სამელიორაციო ინფრასტრუქტურის მოვლა-შენახვის ქვეპროგრამის ფარგლებში და მოიცავს 6,5 კმ სიგრძის გზის მოხრეშვა-მოშანდაკებას და შევიწროვებული ადგილების გაფართოებას.
