თხილის წარმოება საქართველოში 2023 წლის სეზონზე გამოწვევების წინაშე დგას, მაგრამ უკეთესი ხარისხისა და რაოდენობის იმედი არსებობს, ვიდრე 2022 წელს იყო,_ ამის შესახებ ნათქვამია გამოცემა EASTFRUIT-ის მიერ გამოქვეყნებულ სტატიაში.
როგორც გამოცემა იუწყება, ახლად მოკრეფილი მწვანეჩენჩოიანი თხილის რეალიზაცია ადგილობრივ ბაზარზე უკვე დაწყებულია, თუმცა მსხვილ ექსპორტიორებს პროდუქტის შეძენა ჯერ არ დაუწყიათ. მწვანეჩენჩოიანი თხილის საშუალო საბითუმო ფასი კი 1 კგ 2-3 ლარია.
ანალიტიკოსების თქმით, აგვისტოში, მოსავლის აღების სეზონზე მშრალი ამინდი გადამწყვეტი იქნება ხარისხიანი თხილის მისაღებად, რადგან ასეთ პირობებში დაკრეფილი თხილი ნაკლებ აფლატოქსინს შეიცავს. წინა სეზონის მოსავლის ხარისხი კი დაზარალდა კრეფის დროს ხანგრძლივი წვიმების გამო. გარდა ამისა, ივნისისა და ივლისის პერიოდში წვიმამ ფერმერებს გარკვეული პრობლემები უკვე შეუქმნა.
2022 წელს, სამთავრობო მხარდაჭერის პროგრამის ფარგლებში, 3 ჰექტარამდე ბაღების დაცვის სუბსიდირება ჰექტარზე 500 ლარის (197 დოლარი) ოდენობით დაიწყო და წელსაც ხორციელდება, თუმცა EastFruit იუწყება, რომ ბევრმა ბენეფიციარმა განკუთვნილი სუბსიდია სხვადასხვა სასოფლო -სამეურნეო პროდუქტებზე დახარჯა, თხილის დაცვის ნაცვლად, რაც აჩენს ეჭვს, რომ თხილის ხარისხი მნიშვნელოვნად წელსაც ვერ გაუმჯობესდება.
გამოცემა აღნიშნავს, რომ მცირე მეწარმეებს ჯერ კიდევ არ აქვთ ბაღების მოვლის მოტივაცია, თუნდაც სუბსიდიით, წინა სეზონზე თხილის დაბალი ფასებისა და მომავალი სეზონის მიმართ პესიმისტური მოლოდინების გამო.
ინდუსტრიის წარმომადგენლების თქმით, სახელმწიფოს ფაროსანასთან ბრძოლის კამპანია უფრო აქტიური იყო ამ სეზონზე და ისინი ვარაუდობენ, რომ ფაროსანასგან გამოწვეული თხილის ხარისხის პრობლემა, წელს ნაკლებად იქნება.
ამჟამად ბაზარზე ძირითადად უმწიფარი თხილი იყიდება 40%-ზე მეტი ტენიანობით, რაც უვარგისია მსხვილი მყიდველებისთვის. გადამამუშავებელი კომპანიები, როგორც წესი, იწყებენ ყიდვას, როდესაც ტენის დონე ეცემა 30%-ზე დაბლა, ხოლო იდეალური ტენიანობა ადრეული მოსავლისთვის არის 20%. გადამამუშავებელი კომპანიები, ასევე, ფასების მოლოდინის გამო ფრთხილობენ, რადგან ვარაუდობენ, რომ წინა სეზონის ტენდენცია გაგრძელდება. კერძოდ, თურქეთს გასული წლის გაუყიდავი მარაგი აქვს დარჩენილი, ხოლო წლევანდელ სეზონზე კარგ მოსავალს მოელის. ამის პარალელურად თურქული ლირა უფასურდება.
მთლიანობაში, თხილის ინდუსტრიის წარმომადგენლები საქართველოში რთული სეზონის მოლოდინში არიან გლობალური ბაზრის კრიზისის გამო. ისინი იმედოვნებენ, რომ ფასები მაინც დასტაბილურდება წინა სეზონის დონეზე და არის გარკვეული ოპტიმიზმი უკეთესი ხარისხის ქართული თხილის მიმართ, თუმცა ხარისხის მნიშვნელოვანი გაუმჯობესება მოსალოდნელი არ არის.
