“გამოვედი მაღაზიიდან და რაც მქონდა ნაყიდი, ყველაფერი ძაღლებმა წამართვეს”

სხვა ქალაქების მსგავსად, არც ჩოხატაურისთვისაა უცხო მიუსაფარი ცხოველებით გამოწვეული პრობლემები. ყოველდღე თუ არა, ყოველ მეორე დღეს ჩნდებიან ახალ-ახალი ძაღლები მუნიციპალიტეტის სხვადასხვა ტერიტორიაზე.

“გურია ნიუსის” ჩოხატაურის ოფისს უკვე არა ერთმა ადამიანმა მომართა დახმარების თხოვნით, რომ იქნებ, როგორმე ხმა მივაწვდინოთ მათ, ვისაც პრობლემის გადაჭრა ხელეწიფებათ.

ერთ-ერთი ჩვენი რესპონდენტი გვიამბობს, როგორ დაესხნენ თავს ძაღლები:

_ ზოგადად, ძაღლების არ მეშინია, მაგრამ ზოგიერთი მაინც საფრთხეს წარმოადგენს. მაგალითად, რამდენიმე დღის წინ, ვიყავი ხიდისთავში, პური ვიყიდე და რაღაც პროდუქტები, გამოვედი მაღაზიიდან და რაც მქონდა ნაყიდი ყველაფერი წამართვეს, პარკი დამიხიეს, _ ამბობს ჩვენთან საუბრისას ნინო კვირიკაძე.

“გურია ნიუსს” განსხვავებული პასუხები არც სხვა რესპონდენტებისგან მიუღია, მაგალითად, ნაზი კოტრიკაძე გვიყვება, რომ მას ძალიან ეშინია მიუსაფარი ძაღლების და ხელისუფლებამ ამ პრობლემის მოგვარებაზე უნდა იზრუნოს:

_ ძალიან მეშინია ქუჩის ძაღლების. ადრე მიყავდათ ეს ძაღლები და არ იყო ასეთი მდგომარეობა, ახლა კი, ძალიან ცუდი სიტუაციაა. მოგვაშორონ ეს ძაღლები! ვეღარ გაგვივლია ვერც დღე და ვერც ღამე წესიერად, შიშის გარეშე. წაიყვანონ ეს ძაღლები ქუჩიდან თავშესაფარში, _ ამბობს ის.

მიუსაფარი ძაღლები დიდი რაოდენობით საკვებ და სავაჭრო ობიექტებთან გვხვდება, რადგან ასეთ ადგილებში არიან ადამიანები, ვინც მათზე ზრუნავს და აპურებს.

_ აქ არიან ძაღლები, რომელთაც ვაჭმევთ და ჩვენთვის საფრთხეს არ წარმოადგენენ, თუმცა ერთს რომ გადაუგდებ, სხვებიც მოდიან და მერე გვიწევს გაშველება. ერთი-ერთი შავი ფერის ძაღლი განსაკუთრებით აგრესიულია, გამოკიდება იცის, _ გვეუბნება რესპონდენტი.

როგორც რესპონდენტებთან საუბრით გავარკვიეთ, მათ მიაჩნიათ, რომ ქუჩაში ძაღლების ადგილი არ არის. მათი თქმით, მიუხედავად იმისა, რომ ძაღლებს გაკეთებული აქვთ აცრა და ამის გამო, შეიძლება მათი თავდასხმა და დაკბენა საშიშროებას არ წარმოადგენდეს, საჭიროა მათი თავშესაფარში გადაყვანა, ან რაიმე ზომების მიღება, რომ ეს პრობლემა აღმოიფხვრას.

ჩოხატაურისთვის რომ იუსაფარი ცხოველები გამოწვევად რჩება, ამის შესახებ “გურია ნიუსთან” ჩოხატაურის მუნიციპალიტეტის მერს, დავით შარაშიძესაც არაერთხელ უსაუბრია.

ჯერ კიდევ გასულ წელს ჩაწერილ ინტერვიუში შარაშიძემ გვითხრა, რომ მუნიციპალური თავშესაფრის აშენება იგეგმება, თუმცა, აღნიშნული დიდ თანხებთან არის დაკავშირებული.

ამ ეტაპზე კი, სპეციალურ დაწესებულებაში გადაყვანა, ერთი ძაღლის გამოკვლევა და აცრა მუნიციპალიტეტს 120 ლარი უჯდება. თუმცა, იქაც ძაღლებს 3 დღეზე მეტ ხანს არ იტოვებენ და ისევ ქუჩაში აბრუნებენ.

დავით შარაშიძე აღნიშნავს, რომ მარტო ხელისუფლება ვერ გადაჭრის მიუსაფარი ცხოველების პრობლემას, თუ საზოგადოება არ იზრუნებს სათანადოდ, რომ ცხოველი ქუჩაში არ მოხვდეს.