ლანჩხუთის ცენტრში, “მედალფას” კლინიკისა და პირველი საჯარო სკოლის მიმდებარე ტერიტორიაზე, სადაც ჩქაროსნული ავტომაგისტრალი აღმაშენებლის ქუჩის გავლით ძველ მთავარ მაგისტრალს უერთდება, მოჭარბებული ავტოსაგზაო შემთხვევები ადგილობრივი მოსახლეობაში პროტესტს იწვევს _ ისინი გზის გადაკეტვით იმუქრებიან.
გზის აღნიშნულ მონაკვეთზე, მას შემდეგ, რაც ჩქაროსნული ავტომაგისტრალი გაიხსნა, ავტოსაგზაო შემთხვევები, ფაქტობრივად, ყოველ დღე ხდება. ამის გამო მოსახლეობა პროტესტს გამოთქვამს და მიიჩნევს, რომ ავტობანიდან ამოსასვლელი ქალაქის ცენტრში არ უნდა გაკეთებულიყო, მით უფრო, პირველი საჯარო სკოლის მიმდებარე ტერიტორიაზე. მოსწავლეთა მშობლებმა ხელმოწერებიც შეაგროვეს, მაგრამ ამას შედეგი არ მოჰყოლია. “მოგვხედონ, სანამ ტრაგედია დატრიალებულა”, _ აცხადებენ ისინი და აღნიშნულ მონაკვეთზე შუქნიშნის დაყენებას ითხოვენ, თუმცა, არ არიან დარწმუნებულები, რომ ეს პრობლემას სრულყოფილად მოაგვარებს. მძღოლების ნაწილი, საგზაო ნიშნების მიუხედავად, ბათუმისკენ გზას პირდაპირ აგრძელებს, რაც საავარიო სიტუაციას ქმნის.
“ისე “გააპირდაპირებენ”, თითქოს ბათუმი “სამების” წვერში იყოს. იყო შემთხვევა, როცა ავარიისას მანქანა სკოლის ეზოს კუთხესთან აღმოჩნდა. ბედად, იმ დროს საგაკვეთილო პროცესი კარგა ხნის დასრულებული იყო და ბავშვები სკოლაში არ იმყოფებოდნენ. თუმცა, ყოველთვის ბედისა და ღმერთის შემყურე ვერ ვიქნებით. დღე არ გავა, აქ ავარია არ მოხდეს.
ვისაც ამ საქმის მოგვარება ევალებათ, მათი შვილები არ დადიან სკოლაში?! უფრო დიდ ტრაგედიას ელოდებიან თუ რა არის ასეთი უყურადღებობა?! გამოვიდეთ ერთ დღეს ყველა და გადავკეტოთ გზა, სანამ უბედურება დატრიალებულა!” _ უკვე მერამდენედ გამოთქვამს პროტესტს შეწუხებული მოსახლეობა.
პრობლემასთან დაკავშირებით მოსახლეობა სოციალურ ქსელშიც საკმაოდ აქტიურად გამოთქვამს უკმაყოფილებას:
თემო თემო: “მანდ, სარკეც უნდა, მარტო შუქნიშანი არ უშველის… რაის ევროპა და რაის წინ წასვლა, ერთი გზაჯვარედინი ვერ მოუგვარებიათ…”
მამუკა კაკუბერი: “კომუნისტების დროს შუქნიშანი მაინც იყო. სანამ ვიღაც არ შეეწირება ამ გზას, შუქნიშანს არ დადგამენ?!”
თამუნა ასანაშვილი: “ძალიან კარგია, რომ რაღაც კეთდება, კარგია მაგისტრალიც. მაგრამ ხომ შეიძლება, რომ ჭკვიან ადამიანს ანდოთ ეს საქმე?! იყო ნაფიქრი, რომ მანდ სკოლაა, ბავშვებია? რაღაც იღონეთ, თქვენი შეცდომა გამოასწორეთ და დააბალანსეთ მოძრაობა ავარიის გარეშე. მერამდენე ავარია უკვე”.
თაკო მგელაძე: “შუქნიშანი და პატარა წრიული ერთად, ვფიქრობ, აუცილებელია”.
ავთო კორპეზაშვილი: “შუქნიშანი საცობს შექმნის მაქ და ვიღაც ხისთავიანი მძღოლი უარეს ტრაგედიას გამოიწვევს…”
პაატა ურუშაძე: “შუქნიშნისთვის თანხებს ვერ იმეტებენ. ახლა ადგებიან და “ბუგაროკებს” გააკეთებენ _ ყველაზე მარტივია უმაქნისებისთვის!”
პაატა ებრალიძე: “შუქნიშანი მოაწესრიგებს გზაჯვარედინს, მაგრამ საცობს შექმნის და ეგ, შეიძლება, უარესიც დარჩეს. ამოსასვლელი უნდა გადავიდეს სხვაგან, ეგ ჯობს…”
მაია ჭანტურია: “კოკა ყოველთვის წყალს არ მოიტანს!”
ნინი იმნაიშვილი: “შუქნიშანი და ხმოვანი გადასახტომებია საჭირო. ნუთუ, ასე რთულია ამის მოგვარება? ადრეც დავწერე და ახლაც ვიმეორებ _ ვინც ეს გზა დააპროექტა, საეროდ ნაფიქრი არ აქვს… სად ნახა, ან სად ისწავლა ის, რომ მაგისტრალი ქალაქს უნდა უერთდებოდეს სკოლის წინ, კორპუსების და საავადმყოფოს შუაში?! არ ვიცი, რა უპასუხისმგებლობაა, რას ჰგავს ეს?! იქ კორპუსში მცხოვრები ხალხი დაიტანჯა ყოველდღე ავარიის ყურებით. საშინელებათა ფილმია?!”
შექმნილ ვითარებასთან დაკავშირებით საკუთარ პოზიციას პირველი საჯარო სკოლის პედაგოგი ნინო დარჩიაშვილიც აფიქსირებს: “რამდენჯერ შეიძლება ითქვას?! მაინცდამაინც ვინმე უნდა მოკვდეს, ზომები რომ მიიღონ? თითქოს სხვა სამყაროში ცხოვრობენ! გონს მოდით! ვისაც ევალება, იზრუნოს ხალხის უსაფრთხოებაზე, კეთილდღეობასა და ცხოვრების ელემენტარულ პირობებზე!”
ლანჩხუთის მერიის ინფრასტრუქტურის სამსახურის განმარტებით, მოსახლეობის მხრიდან გაჟღერებული მოთხოვნა შუქნიშნის დაწესების თაობაზე ვერ დაკმაყოფილდება: “ამ საკითხზე ჩვენ მივმართეთ შესაბამის უწყებას, თუმცა, ცენტრალურ ავტომაგისტრალზე ფიზიკურად არ ხდება შუქნიშნის დაყენება. უბრალოდ, პერიფერიულ გზაზე შეზღუდვაა დაწესებული სათანადო საგზაო ნიშნით, რომ ცენტრალურ მაგისტრალზე მანქანა გაატაროს და შემდეგ გავიდეს. აღმაშენებლის ქუჩა ამ ეტაპზე არის საერთაშორისო მნიშვნელობის გზა და ამიტომაც ვერ დგება შუქნიშანი”.
შესაბამისი უწყებების არგუმენტით, პროექტის მიხედვით რაც იყო გათვალისწინებული საგზაო უსაფრთხოების კუთხით, ყველაფერი შესრულებულია. რაც შეეხება მომატებულ ავტოსაგზაო შემთხვევებს, გზების დეპარტამენტის განმარტებით, ის პირდაპირ კავშირშია გაუმჯობესებულ გზის საფართან:
“ავტოსაგზაო შემთხვევების თავიდან აცილებისთვის საჭიროა, ყველა დაემორჩილოს დაწესებულ საგზაო წესებს. თუკი მოსახვევში არ შემოვლენ გადამეტებული სიჩქარით და დადგენილ წესებს დაემორჩილებიან, ავარიის შემთხვევებიც არ იქნება”, _ ასეთია გზების დეპარტამენტის პოზიცია შექმნილ პრობლემასთან დაკავშირებით.
