დაზიანებული გზები, უკონტროლოდ გახსნილი კარიერები, გაჩანაგებული ბუნება _ ეს ის რეალობაა, რომელიც გურულებისთვის ყოველდღიურობად იქცა.
ბოლო დროს, განსაკუთრებით ყურადსაღები ჩოხატაური-ოზურგეთის უკიდურესად დაზიანებული ცენტრალური გზაა, რომელზეც ქვა-ღორღით დატვირთული ავტომაქანები უწყვეტად გადაადგილდებიან.
ე. წ. ნასაკირალის უღელტეხილზე გავლა პრაქტიკულად შეუძლებელია, რისი მიზეზიც იქვე, ხეობაში გახსნილი კარიერიდან წამოსული, ზედმეტად დატვირთული ავტომობილებია, რომლის შესახებ „გურია ნიუსი“ არაერთხელ წერდა.
არსებულ ვითარებაზე რეაგირება ჩვენ წიაღის ეროვნულ სააგენტოს ვთხოვეთ, რომელიც ვალდებულია, აკონტროლოს მათ მიერ გაცემული ლიცენზიები.
19 მარტს შეტანილ მიმართვაზე პასუხი დღეს მივიღეთ, რომელშიც აღნიშნულია, რომ შპს „ახალი ქარხანა“ ლიცენციის პირობებს არღვევს:
„სააგენტოს მიერ, კომპეტენციის ფარგლებში გახორციელდა ოზურგეთის მუნიციპალიტეტში, დაბა ნასაკირალის მიმდებარედ, სოფელ ქვედა ბახვის ტერიტორიაზე, მდინარე ბახვის წყალზე ქვიშა-ხრეშის მოპოვების მიზნით, შპს „ახალი ქარხანაზე“ გაცემული #1004923 და შპს „ცაცხვზე“ გაცემული #1003677 ლიცენზიებით განსაზღვრული პირობების შესრულების მდგომარეობის შემოწმება, რის შედეგადაც დადგინა, რომ შპს “ახალი ქარხანას“ მიერ წიაღისეულის მოპოვება გახორციელებულია ლიცენზიით განსაზღვრული სამთო მინაკუთვნის ფარგლებს გარეთ. აღნიშნულის თაობაზე, 2019 წლის 25 მარტის #22/1801 წერილით, ინფორმაცია კომპეტენციის ფარგლებში რეაგირების მიზნით გადაეგზავნა სსდ გარემოსდაცვითი ზედამხედველობის დეპარტამენტის აჭარისა და გურიის რეგიონულ სამმართველოს. შპს „ცაცხვის“ მიერ ლიცენზიის პირობების დარღვევა არ გამოვლინდა“, _ აღნიშნულია წერილში, რომლსაც ხელს წიაღის ეროვნული სააგენტოს უფროსის მოადგილე კარლო ლაფერაძე აწერს.
ლაფერაძე, ასევე, გვწერს, რომ საკითხის შემდგომში განხილვის მიზნით, სააგენტო მზად არის კლავ ჩაერთოს თავიანთი კომპეტენციის ფარგლებში.
სააგენტო რომ საკითხის განხილვაში ჩასართავად მზადა, ეს თავისთავად კარგია, თუმცა, ხაზგასასმელია ერთი დეტალი _ კარიერები გურიის თითქმის ყველა სოფელშია და ვითარება ყველგან ერთნაირია. მედია, მწირე რესურსიდან გამომდინარე, მოკლებულია შესაძლებლობას, მივიდეს ყველგან და ყველა ფაქტის შესახებ სააგენტოს წერილობით აცნობოს, რაც ამ შემთხვევაშიც მოგვთხოვეს.
კანონის თანახმად, წიაღის ეროვნული სააგენტო თავად უნდა აკონტროლებდეს ასეთ ფაქტებს, თავად უნდა იყოს დაინტერესებული მსგავსი შემთხვევების გამოვლინებით. გარდა ამისა, სააგენტო პასუხში გვწერს მხოლოდ იმას, რომ „შპს “ახალი ქარხანას“ მიერ წიაღისეულის მოპოვება გახორციელებულია ლიცენზიით განსაზღვრული სამთო მინაკუთვნის ფარგლებს გარეთ“ და არაფერს ამბობს დაზიანებულ გზებზე, გაჩანაგებულ ბუნებაზე… შესაძლო დაჯარიმების შემთხვევაში, ეს ჯარიმა იქნება იმ ზარალის ადეკვატური, რაც ინფრასტრუქტურასა და მდინარე ბახვისწყლის ხეობას მიადგა?!
ამავე თემაზე: უკონტროლო კარიერი, დაზიანებული გზა და სააგენტო, რომელიც რეაგირებას მხოლოდ ოფიციალური წერილის შემდეგ აკეთებს
