გასული თვეში ჩვენ ვწერდით, რომ ოზურგეთის მუნიციპალიტეტის სოფელ ნატანების ტერიტორიაზე, შეკვეთილთან, “ლეკიანად” წოდებულ ფართობზე, გარემოს დაბინძურების ამაზრზენი ფაქტის მოწმე გავხდით _ როგორც “გურია ნიუსის” წყარომ მაშინ გვითხრა, აქ საგანგებოდ, სპეციალური ტექნიკით გაჭრილ ორას მეტრამდე სიგრძის არხებში, ქობულეთის ციტრუსოვანთა ერთ–ერთი ქარხნის დირექტორმა რამაზ გოგიტიძემ პროდუქციის გადამუშავების შემდეგ დარჩენილი ასეულობით ტონა ნარჩენი, ოზურგეთის ტერიტორიაზე, ოზურგეთის მუნიციპალიტეტის მერის, კონსტანტინე შარაშენიძის თანხმობითა და დახმარებით შემოიტანა.
როგორც წყარომ გვითხრა, ქობულეთელი ბიზნესმენი, გასული წლის შემოდგომიდან, თვეების განმავლობაში ეზიდებოდა აღნიშნულ ტერიტორიაზე ნარჩენებს, რომელიც აქ უბინძურეს, გარემოს მომწამვლელ მასად იქცა და სივრცეში აუტანელი სუნი დადგა, რაც საკმაოდ შორ მანძილზეც ვრცელდებოდა.
ჩვენი წყაროს ცნობით, ტერიტორია, რომელზეც ღრმა არხებია გაჭრილი, კერძო საკუთრებაა _ 1,6 ათას ჰექტარი ფართობს ფლობდა ვინმე ელეონორა ბარამიძე, რომელიც ოზურგეთში ვერ ვიპოვეთ. წყარომ გვითხრა, რომ იგი თბილისში ცხოვრობს და გურიაში იშვიათად ჩამოდის. ოზურგეთის მუნიციპალიტეტის მერის ძალისხმევით მოხდა ამ ქალბატონის მოძებნა და მასთან შეთანხმება, რომ ქობულეთის ციტრუსოვანთა ქარხნის დირექტორს რამაზ გოგიტიძეს ნარჩენების დასაყრელი ფართობი ჰქონოდა.
როგორც დავადგინეთ, ეს მასა დიდხანს გროვდებოდა აქ გოგიტიძის ძალისხმევით და ათი თვის მანძილზე ღია ცისქვეშ ეყარა. მისი ღია სივრცეში ასე დაუფარავად დატოვება, ჩვენი წყაროს ცნობით, იმიტომ ხდებოდა, რომ რამაზ გოგიტიძეს მომდევნო სეზონზეც ჰქონოდა აქ ნარჩენების შემოტანის და ამ დიდ, სახელდახელოდ მისგანვე გათხრილ სარკოფაგში მავნე ნარჩენის კვლავ ჩაშვების საშუალება.
მას შემდეგ, რაც ჩვენი სტატია გამოქვეყნდა, “ლეკიანის” ტერიტორიაზე მცხოვრებმა არა ერთმა მომთაბარე მესაქონლეობით დაკავებულმა პირმა გვაცნობა, რომ პირუტყვი დიდი ხანია, ახლომახლო ღელეებიდან წყალს ისევ არ სვამს და აუტანელი სუნიც გარემოში ისევ ტრიალებს.
“გურია ნიუსი” ახლახან კვლავ ეწვია აღნიშნულ ტერიტორიას. სასიხარულოა ის ფაქტი, რომ აქ უკვე მძიმე ტექნიკა მუშაობს და საშიში ნარჩენით სავსე, ე. წ. უზარმაზარი სარკოფაგები უკვე დახურულია.
_ რა გინდათ, ვმუშაობ, ვამთავრებ, ფოტო არ გადამიღოთ, _ გვითხრა მძღოლმა, რომელსაც ვინაობა ვკითხეთ და დავინტერესდით, რომელი მუნიციპალიტეტიდან იყო.
_ ქობულეთიდან ვარ, აქ გამომიშვეს სამუშაოდ.
_ ვინ გამოგიშვათ?
_ არ ვიცი…
_ რამაზ გოგიტიძემ გამოგიშვათ? კიდევ ხომ არ მოხდება ამ სეზონზე სადმე ახალი სარკოფაგის გათხრა?
_ არ ვიცი.
_ ეს მანამდეც თქვენ გათხარეთ?
_ არა. ნუ მიღებ, თორემ ამ ციცხვში ჩაგსვამ, _ მიგვანიშნა ამწეს მძღოლმა, საჭე მოაბრუნა და ციცხვი დაგვიმიზნა.
_ გოგიტიძე ვერანაირად ვერ ვიპოვეთ, იქნებ, დაგვაკავშიროთ?!
მემანქანემ ამჯერად აღარ გვიპასუხა და მუშაობა გააგრძელა.
მართალია, შედეგიანი აღმოჩნდა ამ ფაქტის შესახებ “გურია ნიუსის” სტატია, რომლის გამოქვეყნების შემდეგ, ორ კვირაში სამუშაოები დაიწყო, თუმცა, ათი თვის მანძილზე რომ საშიში ნაგავ-ნარჩენი სივრცეში ღიად იყო ჩაჭაობებული და აუტანელი სუნი ახლაც, მისი დაფარვის შემდეგაც არ გამქრალა, ახლომახლო მომთაბარე მესაქონლეებს კი პირუტყვისთვის წყალი საძებარი აქვთ, რადგან დაბინძურებულ ღელეებს საქონელი პირს არ აკარებს, ამის გამო ვინ აგო პასუხი? გარემოს დაბინძურების უმძიმეს ფაქტზე მოხდა თუ არა რეაგირება და დაისაჯა თუ არა ვინმე იმ პირთაგან, ვინც გარემო ამ დონეზე დააბინძურა? როგორც ვიცით, ამისთვის არსებობს კანონით გათვალისწინებული ჯარიმები და სანქციები.
“გურია ნიუსს” სწორედ ეს კითხვები ჰქონდა გარემოსდაცვითი ზედამხედველობის დეპარტამენტის აჭარა-გურიის რეგიონული სამმართველოს გურიის განყოფილების უფროსთან, ალექსი გოგალაძესთან, თუმცა, მან, მიუხედავად არაერთი ზარისა და სმს შეტყობინებისა, არ გვიპასუხა.
ჩვენ ვესაუბრეთ, ასევე, ოზურგეთის მუნიციპალიტეტის მერიის ზედამხედველობის სამსახურის განყოფილების უფროსს შუქრი გაბრიჩიძეს:
_ მე ვერ გეტყვით, რატომ არ გპასუხობენ გარემოს დაცვის ზედამხედველობის რეგიონული განყოფილებიდან. მაქვს ინფორმაცია, რომ მაგ განყოფილებიდან აღნიშნულ თემაზე რეაგირება იყო. როგორც ვიცი, ქობულეთშიც ჩავიდნენ და მგონი, დააჯარიმეს ამ ნარჩენის შემომტანი. სიმართლე გითხრათ, ჩვენც ვაპირებდით ღონისძიების გატარებას, თუმცა, როცა აქტიურად ჩაერთო რეგიონული სამსახური, ჩვენც მათ ვადროვეთ. ისე კი ვიცი, რომ დღეისთვის ნარჩენები მთლიანად დამარხულია. შესაძლოა, გარკვეული დროით, წყალი მართლაც უვარგისი იყოს დასალევად, თუმცა, ეს პროცესები დარეგულირდება თანდათან, _ გვითხრა გაბრიჩიძემ.
