მას შემდეგ, რაც კორონავირუსის გავრცელების შემთხვევებმა იმატა, გარემოვაჭრეების თემამ აქტუალობა ისევ შეიძინა, რამაც ლანჩხუთში ოპოზიციასა და ადგილობრივ ხელისუფლებას შორის უთანხმოება წარმოშვა.
ლანჩხუთის საკრებულოს ოპოზიციონერი წევრმა და “ერთიანი ნაციონალური მოძრაობის” ადგილობრივმა ლიდერმა, კახა ასკურავამ სოციალურ ქსელში დაწერა, რომ მერიის თანამშრომელთა მხრიდან, ოპოზიციის სახელით, გარემოვაჭრეებზე მუქარა ხორციელდება:
“მერიის ზედამხედველობის სამსახური გარემოვაჭრეებს აფრთხილებს, რომ შეწყვიტონ ვაჭრობა _ არ დაგინახოთ მოსული, ოპოზიციამ ააწრიალა ყველაფერიო (აქ, სავარაუდოდ, გულისხმობენ COVID-19 გახშირებულ შემთხვევებს რეგიონში). “ერთიანი ნაციონალური მოძრაობის” სახელით, სრული პასუხისმგებლობით ვაცხადებ, რომ ეს არის ტყუილი და ჩვენი მოსახლეობის იმ კატეგორიის შეგნებულად შეცდომაში შეყვანის მცდელობა, ვინც, რა თქმა უნდა, გაჭირვების და არა ბედნიერი ცხოვრების გამო, დღედაღამ ქუჩაში დგას.
ლანჩხუთის მერია და მმართველი გუნდი კი, ნაცვლად იმისა, რომ კონკრეტულ გამოსავალს სთავაზობდეს გარემოვაჭრეებს და ზოგადად, მცირე ბიზნესის წარმომადგენლებს, დაკავებულები არიან ჭორების გავრცელებითა და საკუთარი პასუხისმგებლობის ოპოზიციისთვის გადაბრალების მცდელობით. ჩვენ ვიცით, იმ გარემოვაჭრეების კონკრეტული სახელი და გვარები, რომლებსაც ოპოზიციის სახელით დაემუქრნენ. მათ ვინაობას, მათივე უსაფრთხოების გამო, არ ვასაჯაროებთ. ასე რომ, ლანჩხუთის ზედამხედველობის სამსახურის მხრიდან იმის თქმა, რომ ეს არ შეესაბამება სიმართლეს, იქნება კიდევ მორიგი ტყუილი”, _ წერს ასკურავა.
ასკურავას ამ პოსტს მისივე თანაგუნდელი ლელა ჩახვაძეც ეხმაურება:
“სამსახურმა გააკეთონ განმარტება. ეს ცოდვაღა აკლდათ. დაერივნენ ლუკმა-პურის საშოვნელად გამოსულ ადამიანებს ოპოზიციის სახელით. შეგვახსენეს თავი!”
ოპოზიციის მხრიდან გაჟღერებული ბრალდებების შემდეგ ლანჩხუთის მერიამ სოციალურ ქსელში გარემოვაჭრეების მიმართ მოწოდება გაავრცელა:
“კორონავირუსის გავრცელების პრევენციის მიზნით, მოვუწოდებთ ყველა გარემოვაჭრეს, გაუფრთხილდნენ თავიანთ და სხვის ჯანმრთელობას, შევიდნენ არსებულ ბაზრებში ან განთავსდნენ იმ ტერიტორიაზე, რომელიც გამოყოფილია მერიის შესაბამისი სამსახურების მიერ”, _ წერია მერიის მიერ გავრცელებულ განცხადებაში.
როგორც ირკვევა, მუნიციპალიტეტის მერი, ალექსანდრე სარიშვილი ზედამხედველობის სამსახურის წარმომადგენლებთან ერთად, პირადადაც შეხვდა გარემოვაჭრეებს და განუმარტა, რომ კოვიდ 19-თან დაკავშირებით ჯანდაცვის სამინისტროს რეკომენდაციების შესაბამისად, ხორციელდება სადეზინფექციო სამუშაოები, რის გამოც აუცილებელია გარემოვაჭრებმა გადაინაცვლონ ბაზრებში ან იმ ტერიტორიაზე, რომელიც გამოყოფილია მერიის შესაბამისი სამსახურების მიერ:
“ლანჩხუთის მუნიციპალიტეტის მერია მოუწოდებს ყველას, დაიცვან ჯანდაცვის სამინისტროს რეკომენდაციები, გაუფრთხილდნენ თავიანთ და სხვის ჯანმრთელობას!” _ ასეთია ლანჩხუთის მერიის მოწოდება.
