ქალაქ თბილისში, ატენის ქუჩის მცხოვრებლები, თბილისის მერიის მიერ აღნიშნულ ქუჩაზე მშენებლობის ნებართვის ხელახლა გაცემას კვლავ აპროტეტებენ.
თბილისის მერიის არქიტექტურის სამსახურმა, 2018 წლის 15 იანვარს, 27-სართულიანი კორპუსის მშენებლობის ნებართვა გასცა. აღნიშნული კორპუსის მშენებლობა კი უზენაესმა სასამართლომ, ჯერ კიდევ 2017 წლის 20 აპრილს გამოაცხადა უკანონოდ, რაც სისხლის სამართლის დანაშაულად კვალიფიცირდება.
მოსახლეობის უფლებების დამცველის დიმიტრი გაბუნიას თქმით, ატენის ქუჩაზე მიმდინარე მშენებლობას ადგილობრივი მოსახლეობა დიდი ხანია აპროტესტებს:
_ 27-სართულიანი კორპუსის მშენებლობის ნებართვა ჯერ კიდევ 2007 წელს გასცა მერიამ. პროცესები ხელისუფლების ცვლილების შემდეგ კიდევ უფრო დრამატულად განვითარდა. აღნიშნულ ნებართვებში, რომელიც თავდაპირველად 9-სართულიანი კორპუსის მშენებლობას ითვალისწინებდა, ცვლილებები შევიდა და სახლი 27-სართულიანად გადაკეთდა. ამ ტერიტორიაზე დასაშვებ ნორმად 2,5 კოეფიციენტია განსაზღვრული, თუმცა, დადგენილი განაშენიანების ინტენსივობა მერიამ დანაშაულებრივად დაარღვია და ამ მშენებარე კორპუსს თითქმის ოთხჯერ გაუზარდა.
დარღვეული უფლებების გამო, რაც იმაში გამოიხატება, რომ მშენებარე კორპუსი პირდაპირ ტროტუარზე დგას, მიწისქვეშა ავტოსადგომი ღია ვერანდით ტრანსპორტის სავალ ნაწილს უკავშირდება. ავტოსადგომის ვერანდა იქ მცხოვრები მოსახლეობის სახლის ფანჯრებთან ხვდება, შედეგად, გამონაბოლქვის სიხშირის გამო, სახლები საცხოვრებლად უვარგისი და სიცოცხლისთვის საშიში ხდება. მშენებარე კორპუსმა ჩაკეტა სხვა კორპუსთან შემავალი სატრანსპორტო გზა, რის გამოც სახლი მიუწვდომელია სახანძრო და სასწრაფო დახმარების მანქანებისთვის. მშენებარე კორპუსს არ აქვს სამშენებლო მოედანი და პროექტში სამშენებლო მოედნად საცხოვრებელი სახლების _ ატენის ქუჩის 14, 15 და 25 ნოემრების ტერიტორიაა მითითებული. მშენებარე სახლის საძირკველის გათხრისას კი ატენის ქუჩაზე მცხოვრებს საკუთარი სახლის კედელი ჩამოენგრა. ატენის ქუჩის მაცხოვრებლებმა, მოსარჩელეემა _ თათული დოლიძემ, ეკა ანდრონიკაშვილმა, ირინა მენაბდე და სხვებმა მერიას სასამართლოში უჩივლეს. საქმე განიხილა უზენაესმა სასამართლომაც. მსგავსი ტიპის დავა უზენაესმა სასამართლომ წარმოებაში პირველად მიიღო და მნიშვნელობიდან გამომდინარე, საქმეს განსახილველად უპირატესობაც მიანიჭა. საბოლოოდ კი, თბილისის მერიის გადაწყვეტილება, მშენებლობისთვის 8.0 კოეფიციენტის მინიჭებასთან დაკავშირებით, ბათილად ცნო და მერიას მიმართა, სწორად შეეფასებინა კონკრეტული ბიზნესინტერესის გამო საზოგადოებრივი ინტერესის ხელყოფის რისკი. მერიას რეკომენდაციით მიმართა სახალხო დამცველმა, საქმეში დევს ექსპერტიზის დასკვნებიც.
ზემოხსენებული გარემოებების მიუხედავად, მერიამ სასამართლოს გადაწყვეტილება არ გაითვალისწინა და 2018 წლის 15 იანვარს, 27-სართულიანი კორპუსის მშენებლობის ნებართვა ხელახლა გასცა, _ ამბობს ადვოკატი.
მოსარჩელე თათული დოლიძე თავს დაზარალებულად მიიჩნევს:
_ გაუგებრობაში ვართ, პრეკონფერენციაც იმართება დღეს, უკანონობაა, აბა, რაა, სასამართლოდან მოვიდა გადაწყვეტილება და ამათ თავიდან ისევ მოაწერეს ხელი მშენებლობის ნებართვას. ერთი ვიცი, რომ მე ვარ ძალიან დაზარალებული და ჩვენი ქონება გაუფასურებულია.
ატენის ქუჩაზე მცხოვრები ვაჟა ვახრამიშვილი: _ უზენაესმა სასამართლომაც დაგვიკმაყოფილა სარჩელი და მიიღო გადაწყვეტილება, რომ ეს იყო უკანონოდ შეთანხმებული პროექტი და სასამართლომ დაავალა ქალაქის არქიტექტურის სამსახურს, რომ ხელახლა შეეთანხმებინათ პროექტი. ახლა კი თბილისის მერიის ახალმა შემადგენლობამ შეითანხმა ეს პროექტი ხელახლა, ზუსტად იმავე სახით, რა სახითაც გააუქმა სასამართლომ და ხელახლა გასცა მშენებლობის ნებართვა. აქ ამის შემდეგ კომენტარებიც ზედმეტიაა. ჩვენ რამდენჯერმე გამოვხატეთ პროტესტი, გადავკეტეთ ქუჩაც, პროტესტი კი დიდია, გაუგონარი მშენებლობაა, უპრეცედენტო! ამ მშენებლობის უკან კი დგანან მაღალი თანამდებობის პირები.
ვინაიდან სასამართლოს გადაწყვეტილების უგულებელყოფა სისხლის სამართლის დანაშაულად კვალიფიცირდება, ატენის ქუჩის მოსახლეობა მერიის წინააღმდეგ პროკურატურას უახლოეს დღეებში მიმართავს.
“გურია ნიუსი“ დაუკავშირდა თბილისის მერიის პრესსამსახურს, სადაც არქიტექტურის სამსახურის განმარტება მოგვაწოდეს აღნიშნულთან დაკავშირებით:
_ სსიპ – თბილისის მუნიციპალიტეტის არქიტექტურის სამსახურის 15.01.2018 წლის N3778683 ბრძანებით შეთანხმდა ქ. თბილისში, სექტორი ვაკე, ატენის შესახვევის #16, ატენის ქ. #17,ატენის ქ. #19-ში (ს/კ:01.14.14.011.083) მრავალფუნქციური შენობის კორექტირებული არქიტექტურული პროექტი და გაიცა მშენებლობის ნებართვა.
ნებართვის გაცემის ერთ-ერთ საფუძველს წარმოადგენს ქ. თბილისის მერის 2017 წლის 22 აგვისტოს N1-1915 ბრძანებით გაცემული სპეციალური (ზონალური) შეთანხმება, რომლითაც განაშენიანების ინტენსივობის კოეფიციენტი კ2 განისაზღვრა 8.0-ით. აღნიშნული ბრძანება გამოიცა თბილისის სააპელაციო სასამართლოს 2016 წლის 13 ოქტომბრის გადაწყვეტილების აღსასრულებლად და საქართველოს უზენაესი სასამართლოს 2017 წლის 13 თებერვლის განჩინების (საქმე #ბს-930-922(2კ-16)) შესაბამისად. N1-1915 ბრძანება კვლავ გასაჩივრებულია თბილისის საქალაქო სასამართლოში, თუმცა, მისი მოქმედების შეჩერების თაობაზე თბილისის საქალაქო სასამართლოს 2017 წლის 21 სექტემბრის განჩინება სააპელაციო სასამართლოს მიერ გაუქმებულია და სპეციალური ზონალური შეთანხმება ძალაშია.
პროექტი ითვალისწინებს 20 მიწისზედა (მათ შორის 2 ტექნიკური) სართულს, რომლის უმეტესი ნაწილი პროექტის შეთანხმების ეტაპზე იყო აშენებული გაბათილებული ნებართვის მოქმედების პერიოდში. მშენებლობის ნებართვა გაცემულია კანონმდებლობის და სასამართლოს გადაწყვეტილების შესაბამისად, _აღნიშნავენ მერიაში.
