პარლამენტი საზოგადოებრივ მაუწყებელთან დაკავშირებით მიღებულ კანონპროექტზე ვეტოს განხილვას დღეს გეგმავს. როგორც ცნობილია, საპარლამენტო უმრავლესობა პრეზიდენტის მიერ შეთავაზებული პროექტის გაზიარებას არ აპირებს და ვეტოს დაძლევისათვის ემზადება. როგორია მედიაორგანიზაციების მოლოდინები, დაძლევს თუ არა მმართველი გუნდის ,,მაუწყებლობის შესახებ“ კანონზე ვეტოს? _ ამ კითხვით ,,გურია ნიუსმა“ ჟურნალისტური ქარტიის ხელმძღვანელს ნატა ძველიშვილს მიმართა.
,,დაძლევს თუ არა ვეტოს პარლამენტი ამ საკითხზე კომენტარის გაკეთება ჩემი მხრიდან მომავლის სპეკულაცია და პროგნოზირება იქნება. ვნახავთ რამდენიმე საათში, რა გადაწყვეტილებას მიიღებს პარლამენტი, მაგრამ ნებისმიერ საკითხში ამ კანონპროექტთან დაკავშირებულმა მოვლენებმა აჩვენა, რომ სამოქალაქო საზოგადოება, მედიაორგანიზაციები, ძალიან ფართო წრე ადამიანთა ჯგუფის არის ერთ აზრზე, უმრავლესობის წევრების ნაწილიც იზიარებს ჩვენს მოსაზრებებს და ამის ფონზე სრულიად გაუგებარია პარლამენტის თავმჯდომარისა და ზოგიერთი დეპუტატის განცხადებები, რომ აუცილებლად უნდა დაძლიონ ვეტო. მე ვერ ვხვდები, რა ლოგიკით და არგუმენტებით ხელმძღვანელობენ ისინი“, _ გვითხრა ნატა ძველიშვილმა.
,,მაუწყებლობის შესახებ“ კანონში დაგეგმილი ცვლილებების მიხედვით, საზოგადოებრივი მაუწყებლის ეთერში დასაშვები ხდება კომერციული რეკლამის განთავსება სამუშაო დღეებში, გარდა საუკეთესო დროისა (19:00-24:00). რეკლამის ხანგრძლივობა არ უნდა აღემატებოდეს ყოველ საათში 3 წუთს. გარდა ამისა, იზრდება სპორტული რეპორტაჟების, საერთაშორისო ფესტივალების და სხვა პროგრამების დროს კომერციული რეკლამის ხანგრძლივობა _ ნაცვლად 30 წუთისა, იგი არ უნდა აღემატებოდეს 60 წუთს, ხოლო ყოველ საათში, ნაცვლად 6 წუთისა 12 წუთს. საზოგადოებრივი მაუწყებლის, საზოგადოებრივი მაუწყებლის აჭარის ტელევიზიისა და რადიოს არხებზე დასაშვები ხდება სპონსორობა მხოლოდ სპორტული რეპორტაჟის, საერთაშორისო ფესტივალის, კონკურსის და გასართობის გადაცემის, სერიალების დროს. საზოგადოებრივი მაუწყებელი, საზოგადოებრივი მაუწყებლის აჭარის ტელევიზია და რადიო ვალდებული ხდებიან, ეთერში განთავსების მიზნით წარმოდგენილ სოციალურ რეკლამას უსასყიდლოდ და არადისკრიმინაციულად დაუთმონ 3 საათში, ჯამში, არანაკლებ 90 წამისა (ნაცვლად 1 საათში არანაკლებ 60 წამისა).
პროექტით იმიჯნება უფლებამოსილებები საზოგადოებრივი მაუწყებლის მენეჯმენტსა და სამეურვეო საბჭოს შორის. დღეს არსებული კანონით, საზოგადოებრივი მაუწყებლის ბიუჯეტს სამეურვეო საბჭო ამტკიცებს და ასევე, მას შეაქვს ბიუჯეტში ცვლილებები. კანონში დაგეგმილი ცვლილებებით, საბჭო უფლებამოსილი იქნება მხოლოდ გენერალური დირექტორის წარდგინებით შეიტანოს ბიუჯეტში ცვლილებები. გარდა ამისა, საზოგადოებრივი მაუწყებლის დებულებაში ცვლილების შეტანაც მხოლოდ დირექტორის წარდგინებით იქნება შესაძლებელი.
”სახელმწიფო შესყიდვების შესახებ” კანონი არ გავრცელდება დამოუკიდებელი კერძო სამართლის იურიდიული პირების მიერ მომზადებულ პროგრამაზე, რომლებსაც საზოგადოებრივი მაუწყებლის ეთერის არანაკლებ 25% დაეთმობა. ”სახელმწიფო შესყიდვების შესახებ” კანონით დადგენილი შეზღუდვები, ასევე, არ გავრცელდება საზოგადოებრივი მაუწყებლის ეთერით გადასაცემი გადაცემების, ფილმების, სერიალების დამზადების მომსახურების შესყიდვაზე.
