საქართველოს რეგიონებში გასახორციელებელი ფონდიდან, სოფლის მხარდაჭერის პროგრამის ფარგლებში, ლანჩხუთის მუნიციპალიტეტში 55 პროექტის გახორციელება იგეგმება, რისთვისაც, ჯამში, 748 ათასი ლარის გახარჯვაა გათვალისწინებული.
ლანჩხუთის მერიის ინფორმაციით, აღნიშნული თანხის უმეტესი ნაწილი გარე განათების მოწყობას, შიდა გზებისა და სანიაღვრე არხების მოწესრიგებას მოხმარდება.
ერთ-ერთი სოფელი, სადაც სოფლის კრებაზე მიღებული საერთო გადაწყვეტილებით გარე განათების მოწყობა გადაწყდა, ჩოჩხათის ადმინისტრაციულ ერთეულში შემავალი სუბიექტი ხორეთია. თუმცა, როგორც ირკვევა, სოფლის პროგრამიდან გამოყოფილი თანხით შესრულებული სამუშაო ერთნაირად სარგებლიანი ვერ გახდება ადგილობრივი მოსახლეობისთვის. როგორც ჩოჩხათის მკვიდრის, პარლამენტის ყოფილი წევრის, ომარ ხუციშვილის პოზიციიდან ირკვევა, პროექტის გახორციელების შემდეგ სოფლის გზის ნახევარი “ძველებურად ჩაბნელებული დარჩება”:
“რამდენიმე დღის წინ სოფელ ხორეთში გზის განათების პროექტის შესადგენად მოვიდნენ სპეციალისტები. გაირკვა, რომ ისინი, უსაფრთხოების მიზნით, განათებას არ დაამონტაჟებენ იმ ელექტრობოძებზე, რომელზეც მაღალი ძაბვის სადენები გადის. ასეთი წესით განათების მონტაჟი გამოიწვევს იმას, რომ სოფლის ნახევარში გზა ძველებურად ჩაბნელებული დარჩება”, _ ამბობს ომარ ხუციშვილი.
ხუციშვილისვე ინფორმაციით, პროექტის მსგავსად გახორციელება მოსახლეობაში პროტესტს გამოიწვევს, რაც უპირველესად მერიისკენ იქნება მიმართული.
“კრებები სოფლად მაღალი პასუხისმგებლობით ჩატარდა და თითოეულ კრებას მერიიდან სპეციალურად მოვლენილი წარმომადგენელი ესწრებოდა. სწორედ მას უნდა სცოდნოდა და კრებაზე განემარტა, რომ განათების დაპროექტებას ასეთი წინააღმდეგობა მოჰყვებოდა. ახლა მივიღებთ იმას, რომ სოფლის ერთი ნაწილისთვის გზა განათდება, მერე ნაწილისთვის კი ჩაბნელებული დარჩება, რაც ობიექტურ პროტესტს გამოიწვევს. მოსახლეობის პროტესტი, პირველ რიგში, სამართლიანად, მერიისკენ იქნება მიმართული”, _ აღნიშნავს ომარ ხუციშვილი და იქვე დასძენს, რომ ზემოთ ნახსენები პროგრამიდან გამოყოფილი თანხით შესრულებული სამუშაო სასარგებლო უნდა იყოს სოფლის თითოეული მოსახლისთვის.
საბოლოოდ რა ბედი ელის ხორეთელთა მიერ სოფლის კრებაზე მიღებულ საერთო გადაწყვეტილებას, ამის გასარკვევად “გურია ნიუსი” ლანჩხუთის მერიის პრესასთან და საზოგადოებასთან ურთიერთობის განყოფილებას დაუკავშირდა. როგორც განყოფილების ხელმძღვანელმა მაკა სულაბერიძემ გაგვიმარტა, იმისთვის, რომ მოსახლეობის ინტერესები მაქსიმალურად იყოს გათვალისწინებული, მერია ამ საკითხთან დაკავშირებით საბოლოო ვერდიქტს შესაბამისი სპეციალისტების ჩართულობით გამოიტანს.
