გერმანიის საგარეო საქმეთა კომიტეტის თავმჯდომარე, მაიკლ როთი უკრაინაში ვიზიტის შემდეგ ევროკავშირს რუსულ ნავთობზე ემბარგოს დაწესებისკენ მოუწოდებს.
მისი თქმით, რუსული ნავთობის შემცირება ძალიან მნიშვნელოვანი სიგნალი იქნება, რადგან ეს გავლენას მოახდენს რუსეთის შემოსავლის მთავარ წყაროზე.
Reuters წერს, რომ რუსეთის უკრაინაში შეჭრის და მშვიდობიანი მოსახლეობის დაღუპვის ფონზე, გერმანია, ევროპის უდიდესი ეკონომიკა, ზეწოლის ქვეშ იმყოფება, რათა თავი დაანებოს რუსული გაზს და ნავთობს, რადგან კრიტიკოსები ამბობენ, რომ შემოსავალი მოსკოვს სასიცოცხლო სახსრებს აძლევს ომის საწარმოებლად.
ევროკავშირი ამზადებს წინადადებებს რუსულ ნავთობზე ემბარგოს დაწესების შესახებ, თუმცა წევრ ქვეყნებს შორის არ არსებობს შეთანხმება რუსული ნედლი ნავთობის აკრძალვის შესახებ. ევროკავშირის დიპლომატები ამბობენ, რომ გერმანია აქტიურად არ უჭერს მხარს რუსეთის ნავთობის დაუყოვნებელ ემბარგოს.
გერმანიის კანცლერის, ოლაფ შოლცის თქმით, გერმანია რუსული ნავთობის იმპორტის დასრულებას წლის ბოლომდე შეძლებს. ასევე, შოლცმა აღნიშნა, რომ ქვეყანამ რუსეთის უკრაინაში შეჭრის შემდეგ მოსკოვიდან იმპორტირებული ენერგორესურსების წილი 35%-დან 25%-მდე შეამცირა.
გერმანიის საგარეო საქმეთა კომიტეტის თავმჯდომარის, მაიკლ როთის თქმით, ევროკავშირის სწრაფი გადაწყვეტილება შეიძლება გაერთიანდეს გარდამავალ ფაზასთან, როგორიცაა რუსული ნახშირის იმპორტის აკრძალვა, რომელიც ძალაში შევა აგვისტოს შუა რიცხვებიდან მას შემდეგ, რაც ევროკავშირის ელჩები შეთანხმდნენ ამაზე გასულ კვირას.
”ეს შეიძლება გაკეთდეს რამდენიმე კვირაში, რადგან არიან სხვა მომწოდებლებიც”, _ თქვა ანტონ ჰოფრეიტერმა, ბუნდესტაგის ევროპის კომიტეტის ხელმძღვანელმა და დასძინა, რომ რუსული ქვანახშირის აკრძალვის ეტაპობრივი შეწყვეტის პერიოდი ძალიან გრძელია.
გერმანიაში 13 აპრილს გამოქვეყნებულმა გამოკითხვამ აჩვენა, რომ მოსახლეობა ნავთობის ემბარგოს შესაძლო უარყოფითი გავლენებით შეშფოთებულია.
Frankfurter Allgemeine Zeitung-ის გამოკითხულთა მხოლოდ 30%-მა თქვა, რომ გერმანიამ რუსული ნავთობისა და გაზის იმპორტი დაუყოვნებლივ უნდა შეაჩეროს, რათა არ გახდეს რუსეთის უკრაინაში სამხედრო ოპერაციების ირიბი დამფინანსებელი.
57%-ის თქმით კი, იმისთვის, რომ ქვეყანამ მიწოდების დეფიციტი და ფასების ზრდა თავიდან აიცილოს, გერმანიამ რუსული ენერგორესურსების იმპორტი უნდა გააგრძელოს.
ავტორი
