“ღირსეული ამომრჩეველი საზოგადოებას უკეთესობისკენ შეცვლის”

 ჩოხატაურში, “ივლიტას ბიბლიოთეკაში”, დასრულდა ააიპ “Post ალიონის” მიერ ორგანიზებული ტრენინგების ციკლი, რომელშიც გურიაში მცხოვრებმა სამოცმა ახალგაზრდამ მიიღო მონაწილეობა. ტრენინგების ფარგლებში ახალგაზრდები გაეცნენ დამოუკიდებელ საქართველოში ჩატარებული პირველი არჩევნების ისტორიას, მაშინდელი პოლიტიკური პარტიების, მედიის მუშაობას და დამფუძნებელი კრების არჩევის საინტერესო დეტალებს; ასევე, დამფუძნებელი კრების ქალი დეპუტატების ბიოგრაფიებს, რუსული საბჭოთა ოკუპაციის ტრაგიკულ ისტორიებს.

_ ოთხი დღის მანძილზე,  სამ ჯგუფად დაყოფილი სამოცი ახალგაზრდა ეცნობოდა და პრაქტიკულად, იმიტაციურად ვარჯიშობდა დღევანდელი საქართველოს სახელისუფლებო შტოების ფორმირების, არჩევის წესის, მათი ურთიერთდამოკიდებულების საკითხების შესახებ ჩვენთვის განსაკუთრებით მნიშვნელოვანი იყო ახალგაზრდების დამოკიდებულება არჩევნების, როგორც ცვლილების მთავარი ინსტრუმენტის მიმართ _ ისინი  კურსის გავლის შემდგომ, რწმუნდებოდნენ, რომ არჩევნებზე მისვლა და ნების გამოხატვა მათი მოქალაქეობრივი ვალდებულებაა. ასევე, მონაწილეთა ინტერესი გამოიწვია მოქალაქეთა ჩართულობის ფორმალიზებულმა და არაფორმალიზებულმა მეთოდებმა, მონიტორინგის, ადვოკატირების მექანიზმებმა. ყველასთვის სახალისო და საინტერესო აღმოჩნდა მონაწილეების როლური “გარდასახვა” ჟურნალისტებად, პოლიტიკოსებად, საარჩევნო ადმინისტრაციის მოხელეებად, _ ამბობს “Post ალიონის” ტრენერი საარჩევნო საკითხებში, სერთიფიცირებული საარჩევნო მოხელე, ადგილობრივი საჯარო პოლიტიკის მაგისტრი მამუკა მამალაძე.

_ როცა დარბაზში ახალგაზრდები სხედან, თემა არჩევნებია და ტრენერებს ტაშით აჯილდოვებენ, ამით ყველაფერია ნათქვამი! ჩვენ საინტერესო სასწავლო მოდულები გამოგვივიდა, ისინი _ კარგი მსმენელები იყვნენ და ეს იყო სწორედ ყველაზე მნიშვნელოვანი; ჩვენი პროექტის სახელწოდება და იდეური შინაარსი ჩვენს ჰეშთეგშია იყო ასახული _ “#მიეხმარასაქართველოს!” და მიგვაჩნია, რომ ინფორმირებული, მოუსყიდველი და ღირსეული ამომრჩეველი საზოგადოებას უკეთესობისკენ შეცვლის.

ბევრი რამ დავგეგმეთ, დახურული ჯგუფიც შევქმენით და აწი აზრებს, შეხედულებებს ამ ჯგუფშიც გავუზიარებთ ერთმანეთს და აქტიურადაც ვიმოქმედებთ, _ ამბობს ია მამალაძე, “Post ალიონის” ხელმძღვანელი და ტრენინგების ორგანიზატორი.

საარჩევნო სისტემების განვითარების, რეფორმებისა და სწავლების ცენტრის მიერ მხარდაჭერილი ამ პროექტის მიზანი გურიაში ახალგაზრდა ამომრჩევლის სამოქალაქო კულტურის განვითარების ხელშეწყობა იყო.