H1N1- გრიპის ვირუსის ერთ-ერთი სახეა და მოსახლეობაში ცნობილი „ღორის გრიპის“ სახელით არის.
Wikipedia-ს ინფორმაციით, სახელწოდება „ღორის გრიპი“ კი 1918 წელს გავრცელებულ ვირუსს უკავშირდება, რომელიც ღორებსა და ადამიანებში ერთდროულად გავრცელდა. თავიდან, უმეტესად იმ ადამიანებს ემართებოდათ, ვისაც ღორებთან ახლო კავშირი ჰქონდათ. თუმცა, მოგვიანებით, ვირუსი იმ ადამიანებზეც გავრცელდა, ვინც ღორების სიახლოვეს არ იმყოფებოდნენ. მოგვიანებით კი ცნობილი გახდა, რომ ღორიდან ადამიანზე ვირუსის გადაცემის შემთხვევა იშვიათობაა.
ვირუსმა მსოფლიოს მასშტაბით, დაახლოებით, 50-100 მილიონი ადამიანი იმსხვერპლა.
1918 წლის შემდეგ, H1N1 ამერიკის შეერთებულ შტატებში 1976 წლის თებერვალში, 1988 წლის სექტემბერში გავრცელდა, 2007 წელს ფილიპინებში, 2009 წელს ჩრდილოეთ ირლანდიაში, 2015 და 2017 წლებში ინდოეთში, 2015 წელს ნეპალში, 2016 წელს პაკისტანში, 2017 წლის მარტში კი მალდივის რესპუბლიკაში გავრცელდა.
ჯანდაცვის მსოფლიო ორგანიზაციის მონაცემებით A(H1N1), რომელიც გავრცელდა ადამიანებს შორის და გამოიწვია 2009 წლის ეპიდემია, არის გრიპის A ტიპის H1N1 შტამის აქამდე უცნობი ვერსია. ამ ახალი შტამის თავისებურება ისაა, რომ იგი შეიცავს ადამიანთა შორის სეზონურად გრიპის აფეთქებების გამომწვევი H1N1 შტამისა და ფრინველის გრიპის გამომწვევი A ტიპის H5N1 შტამის მსგავს გენეტიკურ მასალას.
აღსანიშნავია, რომ ვირუსი ადამიანიდან ადამიანზე სეზონური გრიპის ვირუსის მსგავსად ჰაერწვეთოვანი გზით ვრცელდება და არა საკვებით, მათ შორის, ღორის ხორცით ან სხვა პროდუქტით მომზადებული საკვებიდან, რომელიც თერმულად არის დამუშავებული.
„ღორის გრიპი“ საქართველოს რეგიონებში წელს აქტიურად ცირკულირებს.
სიცხე, ყელის ტკივილი, კუნთების ტკივილი, მწვავე თავის ტკივილი, ხველა, სისუსტე, სუნთქვის გართულება _ ეს ის სიმპტომებია, რაც ვირუსს ახასიათებს და ჩვეულებრივ გრიპის ვირუსს ძალიან ჰგავს.
არსებობს თუ არა ქვეყანაში ეპიდემიის საფრთხე, როგორ უნდა მოიქცეს ადამიანი თუ მას ვირუსი შეხვდა, რით არის განსხვავებული სხვა ვირუსებისგან ღორის გრიპი და საზოგადოების რა ნაწილი უნდა იყოს ყველაზე ფრთხილად _ამ საკითხებზე „გურია ნიუსი“ დაავადებათა კონტროლის ეროვნული ცენტრის ეპიდემიოლოგს, ირაკლი ქარსელაძეს ესაუბრა.
ქარსელაძის თქმით, ქვეყანაში 221 შემთხვევა არის დღეის მონაცემებით გამოვლენილი, რაც ნიშნავს, რომ ეპიდემიის საფრთხე არ არის.
„საქართველოს რეგიონებში H1N1 გრიპის ერთ-ერთი ქვეტიპი აქტიურად ცირკულირებს. ზოგადი ფონი საქართველოში გავრცელების მხრივ ერთნაირია. ქვეყანაში ეპიდემიის საფრთხე არ არის. დღევანდელი სიტუაციით არის 221 შემთხვევა, გრიპის გავრცელების ეპიდემიური ზღურბლი კი 450-500 შემთხვევაა, 100 000 მოსახლეზე.
ყველა ვირუსს აქვს ერთნაირი გართულებები და მიმდინარეობა. ერთადერთი განსხვავება ის არის, რომ H1N1-მა შესაძლოა უფრო სწრაფად გამოიწვიოს გართულებები, რაც გამოიხატება ფილტვების ანთებით, ბრონქების დაზიანებით და ა.შ.“, _ამბობს ქარსელაძე.
როგორც დაავადებათა კონტროლის ეროვნული ცენტრის ეპიდემიოლოგი ამბობს, ვირუსით ნებისმიერი ასაკის და სქესის ადამიანი შეიძლება დაავადდეს, თუმცა, ყველაზე მეტი შემთხვევა ბავშვებში ფიქსირდება.
„დაინფიცირების კუთხით მიმღებლობა აქვს ყველა ადამიანს განურჩევლად ასაკისა და სქესისა. თუმცა, უფრო მეტ წილად გავრცელებულია ბავშვებში, რადგან უფრო ორგანიზებული ასაკია. დადიან სკოლებში, კონტაქტი აქვთ ერთმანეთთან, შესაბამისად, ბავშვებში უფრო მეტი შემთხვევებია. ყველაზე ფრთხილად უნდა იყვნენ ის ადამიანები, ვისაც იმუნური ფონი ამა თუ იმ მიზეზით აქვს დაქვეითებული და ყველაზე დიდი რისკ ჯგუფია ორსულები“,_ამბობს ქარსელაძე.
რაც შეეხება, რეკომენდაციას ქარსელაძის თქმით, ასე გამოიყურება:
„მოსახლეობამ პირველ რიგში გრიპის სიმპტომების გამოვლენისთანავე უნდა გაიაროს კონსულტაცია ექიმთან. ეს არ ნიშნავს კლინიკაში მოხვედრას და დარჩენას. არ უნდა წავიდეს სკოლაში, სამსახურში, ბაღში. სახლში ოთახი უნდა დალაგდეს სველი წესით, ხშირად განიავდეს და მოერიდოს ხალხმრავალ ადგილებს, სადაც უფრო მეტია შანსი დაინფიცირების“,_ამბობს ქარსელაძე.
