„არაპროფესიონალებს ეკონომიკის ცოდნას ნუ მოვთხოვთ. ქობულიას წარმოდგენა არ აქვს, რა არის ეკონომიკა და საქართველოში არსებული ეკონომიკური მდგომარეობა ადეკვატურად როგორ უნდა შეაფასოს?!“, _ აღნიშნა „გურია ნიუსთან“ პროფესორმა ლადო პაპავამ.
მისივე თქმით, საქართველოს მთავრობაში ეკონომისტები არ მუშაობენ, რაც ეკონომიკის განვითარებას აფერხებს. „მენეჯერები არიან, მაგრამ მენეჯერის საქმე მთავრობაში ყოფნა ნამდვილად არ არის“, _ ამბობს პაპავა.
_ ბატონო ლადო, გუშინ ეკონომიკის მინისტრმა გიორგი ქობულიამ მოულოდნელად განაცხადა, საქართველოში ხალხს არ უჭირს, მოსახლეობის ცხოვრების დონე ყოველდღიურად უმჯობესდებაო. აღნიშნული განცხადება შეიძლება შევადაროთ „ქართული ოცნების“ ლიდერის, ბიძინა ივანიშვილის მიერ გაკეთებულ განცხადებას, რომელშიც ივანიშვილი ამბობდა, რომ ქვეყანაში აღმშენებლობის მეტი არაფერი ხდება. როგორ ფიქრობთ, უმაღლესი თანამდებობის პირების მხრიდან გაკეთებული ამგვარი განცხადებები კიდევ უფრო არ აფერხებს ქვეყნის განვითარებას?
_ მოქმედი ეკონომიკის მინისტრის განცხადება აბსოლუტურად არაადეკვატურია. მისი განცხადება ქვეყანაში არსებულ რეალობას არ შეესაბამება. რადგან გიორგი ქობულია პროფესიით ექიმია, ასეთ შედარებას მოვიყვან, იქნებ უკეთ გაიგოს, ავადმყოფი რომ მივიდეს ექიმთან და უთხრას, ტკივილები მაქვს, ცუდად ვარო და ექიმმა საპასუხოდ მიუგოს, არაფერი გტკივა, ჯანმრთელი ხარო, დაახლოებით, ამ დონის სისულელე თქვა მან. ქობულიას ეკონომიკაში არანაირი გამოცდილება არ აქვს. მას წარმოდგეnა არ აქვს, რა არის ეკონომიკა და საქართველოში არსებული ეკონომიკური მდგომარეობა ობიექტურად როგორ უნდა შეაფასოს?! ძალიან უკმაყოფილო ვარ იმ ეკონომიკური ბლოკით, რომელიც დღეს მთავრობაშია.
_ პრემიერ-მინისტრის, მამუკა ბახტაძის თქმით, საქართველოში სიღარიბე 10%-ით შემცირდა. იმ ფონზე, როცა ქვეყანაში მაღალი ინფლაცია ფიქსირდება და ეკონომიკა დაბალი ტემპით ვითარდება, როგორ ფიქრობთ, არსებული მონაცემი რეალურია ?
_ალბათ, პრემიერ -მინისტრს გარკვეული საფუძველი ჰქონდა, როცა ეს განცხადება გააკეთა. ამ კითხვაზე პასუხის გაცემა რთულია, რადგან სიღარიბის დათვლის მეთოდოლოგია მუდმივად განიცდის გარკვეულ ცვლილებას. უნდა ითქვას, რომ საქართველოში ყველაზე მთავარი პრობლემა არის ხედვის ჩამოყალიბება, თუ როგორ უნდა განვითარდეს ქვეყანა. ასეთი ხედვა შეიძლება ჰქონდეთ ეკონომიკის მცოდნე ხალხს, პროფესიონალებს. არაპროფესიონალებს ეკონომიკის ცოდნას ნუ მოვთხოვთ. პრაქტიკულად, დღეს მთავრობაში ეკონომისტს ვერ ვხედავ. მენეჯერები არიან, მაგრამ მენეჯერის საქმე მთავრობაში ყოფნა ნამდვილად არ არის. იანვრიდან საქართველოში პენსია 20 ლარით მოიმატებს, რაც საკმარისი არ არის. პენსია რომ გაიზარდოს, ეკონომიკის ამოქმედებაა საჭირო, რომლის რესურსიც, ჯერჯერობით, არ ჩანს.
_ ოპოზიცია რადიკალიზმზე და დესტაბილიზაციის მოხდენაზე დღეს კიდევ უფრო ღიად საუბრობს. პოლიტიკური გაერთიანება „ძალა ერთობაშიას“ წევრების მხრიდან მუდმივად ისმის განცხადებები იმის შესახებ, რომ „ქართული ოცნების“ მმართველობა უახლოეს მომავალში დასრულდება. როგორ ფიქრობთ, ოპოზიციას ხელისუფლების ხელში ჩაგდებისთვის საკმარისი რესურსი გააჩნია?
_ ოპოზიციის რესურსი არის ხალხი, რომელსაც ქვეყანაში პოლიტიკური მდგომარეობის შეცვლა შეუძლია და რომელიც ვხედავ, რომ საკმაოდ პასიურია. შესაბამისად, დღეს ოპოზიციას იმის რესურსი არ გააჩნია, რომ ქვეყანაში სერიოზული დესტაბილიზაცია მოახდინოს.
_ პარტიის ლიდერმა ბიძინა ივანიშვილმა ქვეყანაში რიგი პრობლემების აღმოსაფხვრელად, ერთი წელიწადი მოითხოვა. დაპირების შეუსრულებლობის შემთხვევაში, როგორ ფიქრობთ, 2020 წლის საპარლამენტო არჩევნებში, რა ბედი მოელის მმართველ პარტიას?
_ ბატონმა ბიძინამ თქვა, რომ ერთი წლის განმავლობაში სერიოზული ცვლილებები უნდა განახორციელოს, ამიტომ მას სერიოზული ნაბიჯების გადადგმა მოუწევს. თუ დაპირება ვერ შეასრულა, 2020 წლის არჩევნებში „ქართული ოცნებას“ გარკვეული პრობლემები შეექმნება. დარწმუნებული ვარ, რომ ისინი პარლამენტში მოხვდებიან, მაგრამ იქნებიან თუ არა კვლავ უმრავლესობაში, ეს არის საკითხავი.
