საქართველოს პრეზიდენტი გიორგი მარგველაშვილი პარლამენტში ყოველწიური ანგარიშით 2 მაისს წარდგება. ეს პრეზიდენტის რანგში პარლამენტარების წინაშე, გიორგი მარგველაშვილის ბოლო გამოსვლა იქნება. დეპუტატები ბიუროს დღევანდელ სხდომაზე საკანონმდებლო ორგანოში პრეზიდენტის მისვლის ფორმატზე უნდა შეჯერდნენ.
პოლიტიკური დებატების ფორმატი ნებისმიერ დეპუტატს საშუალებას მისცემს, პრეზიდენტის გამოსვლაზე საკუთარი მოსაზრება დააფიქსიროს – ამის შესახებ ჟურნალისტებს საპროცედურო საკითხთა კომიტეტის თავმჯდომარემ გიორგი კახიანმა განუცხადა. დეპუტატის განმარტებით, პრეზიდენტის გამოსვლის შემდეგ რეგლამენტი ორ ფორმატს ითვალისწინებს -ფრაქციების თავმჯდომარეების გამოსვლასა და პოლიტიკურ დებატებს.
“როგორც გახსოვთ, ამ საკითხის განხილვა ყოველ წელს საკმაოდ აქტუალური ხდებოდა და ოპოზიცია დებატების ჩატარების სურვილს გამოთქვამდა. ამჯერად, მათ ასეთი სურვილი არ გამოუთქვამთ. პრეზიდენტის მხრიდან შესაძლოა ეს ბოლო დროინდელ მოვლენებს უკავშირდებოდეს, რომელიც მის გარშემო განვითარდა და საზოგადოების მხრიდან მკვეთრად უარყოფითი დამოკიდებულება ჰქონდა. გადაწყვეტილება მიღებული გვაქვს, რომ ამჟამად, პრეზიდენტის გამოსვლის შემდეგ პოლიტიკური დებატები გაიმართოს. ეს არის ფორმატი, რომელიც პოლიტიკურ ჯგუფებს მეტ შესაძლებლობას აძლევს, ქვეყანაში არსებულ მდგომარებაზე თავიანთი შეხედულებები და მოსაზრებები გამოთქვან”, – განაცხადა კახიანმა.
კახიანის განცხადებით, პოლიტიკური დებატების დროს, უმრავლესობასა და უმცირესობას 45-45 წუთი ექნებათ, ფრაქციებს 15-15 წუთი, დამოუკიდებელ დეპუტატს – 5 წუთი.
“ეს ისეთი ფორმატი იქნება, რომელიც ნებისმიერ დეპუტატს საშუალებას მისცემს, საკუთარი მოსაზრება დააფიქსიროს”, – აღნიშნა კახიანმა.
ქართული ოცნება პრეზიდენტზე შტურმისთვის ემზადება – ასე გამოეხმაურა ნაციონალური მოძრაობის წევრი რომან გოცირიძე უმრავლესობის გადაწყვეტილენას პრეზიდენტის წლიური ანგარიშის შემდეგ პოლიტიკური დებატების გამართვის თაობაზე.
“ეს ის იშვიათი შემთხვევაა როცა უმრავლესობა ითხოვს დებატებს. ახლა როგორც ჩანს გადაწყვიტეს მარგველაშვილის ჩაქოლვა. ჩვენ მივესალმებით დებატებს, ის არის ყოველთვის შესაძლებლობა რომ ღრმად იყოს განხილული პრობლემები ქვეყანაში”, _ აცხადებს რომან გოცირიძე.
