უმრავლესობის დეპუტატებს შორის კამათი და დაპირისპირება მოჰყვა ლანჩხუთის საკრებულოში მერიის საფინანსო სამსახურის მოხსენებას მიმდინარე წლის ბიუჯეტში განსახორციელებელ ცვლილებებთან დაკავშირებით.
როლანდ ლაშხიას განმარტებით, საქართველოს მთავრობის განკარგულებით, რეგიონული განვითარებისა და ინფრასტრუქტურის სამინისტროს, სსიპ-საგანმანათლებლო და სამეცნიერო ინფრასტრუქტურის განვითარების სააგენტოსა და მუნიციპალიტეტებს შორის ურთიერთშეთანხმების მემორანდუმის საფუძველზე, სსიპ ზოგადსაგანმანათლებლო დაწესებულებების სამშენებლო და სარეაბილიტაციო სამუშაოების განხორციელების მიზნით, კაპიტალური გრანტის სახით ლანჩხუთის მუნიციპალიტეტს გამოეყო 102 719,16 ლარი სოფელ ჩიბათის( ჭალის კორპუსის) და სოფელ ნინოშვილის საჯარო სკოლებისთვის.
ამასთანავე საქართველოს მთავრობის 2018 წლის 9 ნოემბრის N2168 განკარგულებით, საქართველოს რეგიონებში განსახორციელებილი პროექტების ფონდიდან სტიქიის შედეგად მიყენებული ზიანის სალიკვიდაციო ღონისძიებების განხორციელების მიზნით, საპროექტო დოკუმენტაციის მომზადების, სამშენებლო სამუშაოებზე და მასთან დაკავშირებული საქონლისა და მომსახურების შესყიდვისათვის მუნიციპალიტეტს გამოეყო 300 ათასი ლარი. აღნიშნული ღონისძიებები ბიუჯეტში უნდა აისახოს როგორც შემოსავლის, ისე ხარჯვის ნაწილში.
სიტუაცია საკრებულოს სხდომაზე მაშინ დაიძაბა, როცა საბიუჯეტო ცვლილებების საკითხთან დაკავშირებით მიკროფონთან დეპუტატი გიორგი ჩახვაძე მივიდა. ჩახვაძემ თავის გამოსვლაში საფეხბურთო კლუბ ლანჩხუთის „გურიას“ დავალიანების გასასტუმრებლად საბიუჯეტო დახმარება მოითხოვა.
„შავ-ბნელმა ფეხბურთელებმა თუ შავმა ძალებმა გამოიწვია ის, რომ ფიფადან მოსული წერილის თანახმად 140 ათასი ლარია გადასახდელი და ეს უნდა მოხდეს 15 დეკემბრამდე. კლუბში მოვიდნენ პროფესიონალები, არის შედეგი, გუნდი პლეი ოფშია და ახლა შეიძლება ცუდ დღეში აღმოვჩნდეთ. ეს არ უნდა დავუშვათ! „გურიას“ შველა და გვერდით დგომა სჭირდება. ყველა ვთანხმდებით, რომ მაშინ მენეჯმენტი იყო ნული და ამან მიგვიყვანა ამ დღემდე“, – აღნიშნა ჩახვაძემ.
ცნობისათვის, შეგახსენებთ, რომ ერთ-ერთი ბრაზილიური კლუბის მიმართ 140 ათასი ლარის გადახდა, თავის დროზე ფიფამ დაგვაკისრა. საუბარია მავან ბრაზილიელ ფეხბურთელზე, რომელიც 2016 წელს ირიცხებოდა „გურიაში“, მინდორზე რამდენიმე წუთი დაჰყო და იმის გამო, რომ მისი გამზრდელი კლუბიდან ნებართვა არ გვქონდა, ფიფამ დაგვაჯარიმა. იყო შეთანხმება ამ თანხის გადანაწილებაზე, მაგრამ პირობა არ შესრულდა და ფიფა ახლა თანხის სრულად ჩარიცხვას ითხოვს.
არადა, დღეს ახალი ხელმძღვანელობის მოსვლის შემდეგ კლუბი მეორე ლიგაში გადასვლისთვის იბრძვის, ორი ტურით ადრე მან გაინაღდა კიდეც პლე ოფში თამაშის უფლება, მაგრამ თუ 15 დეკემბრამდე არ მოხდა ფიფას მიერ მოთხოვნილი თანხის გადახდა, კლუბი შეიძლება მეორე ლიგის ნაცვლად მკაცრად დასაჯონ და მეოთხეში ამოყოს თავი.
სხვათაშორის უმრავლესობის წევრის მიერ გაკეთებულმა ზემონახსენებმა განცხადებამ, უმრავლესობაშივე გამოიწვია აზრთა სხვადასხვაობა. ჩახვაძის პოზიცია კატეგორიულად არ გაიზიარა საკრებულოს საფინანსო – საბიუჯეტო კომისიის ხელმძღვანელმა ალექსანდრე მახათაძე.
„შველაზე უარს არავინ ვამბობთ, მაგრამ კლუბი ხომ აუქციონის წესით გასხვისდა? მას ჰყავს პატრონი და მანვე უზურნველყოს ამ თანხის მოძიება. როცა გუნდში მოდიოდა, არ იცოდა, რაც იყო საჭირო? მისი აქტივებით და პასივებით არ აიღო კლუბი მმართველობაში? „გურია“ იმიტომ გავიდა აუქციონზე, რომ ბიუჯეტიდან ფულები არ გასულიყო. 140 ათასი კი არა, 354 ათასია ჯამში დავალიანება. ეს თანხა გასასტუმრებელია. თუ ეს არ შეეძლოთ, მაშინ მოდიოდა სხვა და ის მიხედავდა. ასე საუბარი არ გამოვა. ყველას გვიყვარს „გურია“, მაგრამ ნაკისრი ვალდებულებები, კეთილი უნდა ინებოს და შეასრულოს. ამბობთ, რომ გადასვლის კანდიდატიაო, წინამ არ დატოვა ამ მდგომარეობაში? ფიქრობთ, რომ მათი დარჩენის შემთხვევაში ეს რეალობა არ დადგებოდა?!“ – ხმამაღალი ტონით ცხარობდა მახათაძე.
მახათაძის მხარე დაიჭირეს ფრაქცია „ქართული ოცნების“ თავმჯდომარის მოადგილემ, კახა ბოლქვაძემ ეთანხმებოდნენ და ნიგოითის მაჟორიტარმა ზაზა წულაძემ. თუმცა, ჩახვაძეს აცანის მაჟორიტარი ემზარ თევდორაძე გამოექომაგა, რომელიც ამავდროულად იმ კომისიას უდგას სათავეში, რომელიც სპორტს კურირებს.
„ასე ულტიმატუმებით საუბარი არ შეიძლება. მოვიდა ყენია და რა მოიტანა, ფული ჰქონდა?! ამ ხალხმა იციან თავიანთი საქმე, ვაცალოთ და დავეხმაროთ. სად წერია, რომელ ხელშეკრელებაში ვალები რომ ამათი გასასტუმრებელია. მაჩვენეთ ეს სად იყო. არ გამოვა ასე საუბარი“, – კატეგორიული იყო თევდორაძე.
მდგომარეობა ისე დაიძაბა, რომ თევდორაძემ და წულაძემ ერთმანეთისკენ გაიწიეს კიდეც, თუმცა საკრებულოს თავმჯდომარემ და დეპუტატებმა სიტუაცია მალევე განმუხტეს.
როგორც გაირკვა, საკრებულოს თავმჯდომარე ესიკ ტაბიძე თვლის, რომ „გურიას“ დახმარება აუცილებლად უნდა გაეწიოს.
„ბესიკ ტაბიძე და ალექსანდრე სარიშვილი იყო, რომ შუბლიდან ოფლს ოფლზე იწმენდდა. თქვენ იცით რამდენი ნაწვალები გვაქვს? ამბობთ, სხვა მოდიოდაო, კი ბატონო, მაგრამ არავის უთქვამს, ამ ფულს მოვიტანთო. ამ ხალხმა 60 ათასი მოიტანა უკვე. გუნდი პლეი – ოფშია და თქვენ გინდათ, გავარდეს? არა, ბატონებო – „გურია“ მეორე ლიგაში გადავა. შეცდომა იყო თავის დროზე უფულო ყენიას მოყვანა, მაგრამ კითხვები რატომ არ დასვით მაშინ, ახლა რომ ლაპარაკობთ? ერთი ლიტრი ბენზინი თუ გაქვთ „გურიასთვის“ ნაყიდი, ამას რომ ამბობთ? ლანჩხუთი ფეხბურთით ცხოვრობს და ასე იქნება სულ. მე ყველაფერს გავაკეთებ, რომ კლუბის ინტერესები არ დაიჩაგროს“, _ აღნიშნა საკრებულოს თავმჯდომარემ.
სხვათა შორის, სხომაზე ტაბიძემ ყენიას მოყვანა ახსენა და მას შეცდომა უწოდა. ფაქტია, რომ მაშინ გადაწყვეტილება მართლაც შეაცვლევინეს მას და მუნიციპალიტეტის მერს და ბოლო მომენტში კლუბი ყენიას გადაულოცეს. არადა, მაშინაც ბევრი კითხვა არსებობდა, თუ რატომ აბარებდნენ კლუბს ადამიანს, რომელიც ერთი თეთრის გამღები რომ არ იყო საკუთარი ჯიბიდან, რასაც თავადაც ამბობდა.
რაც შეეხება აუქციონში დამარცხებულ პირებს, ისინი ბუნდოვანი პერსპექტივიით მოდიოდნენ კლუბში და ვალების დაფარვას სიტყვიერად აფიქსირებდნენ, მაშინ როცა ამის შესახებ არაფერი ეწერა ურთიერთთანამშრომლობის მემორანდუმში. ანაც თუ ასეთი გულუხვები იყვნენ, რატომ დათმეს აუქციონი? ერთიცაა საგულისხმო, რომ ეს ადამიანები ფოთის „კოლხეთის“ და „ცხინვალის“ მეპატრონეებიც არიან და ნახეთ რა ხდება?! – „კოლხეთი“ უმაღლესი ლიგიდან უკვე გავარდა, „ცხინვალი“ კი, სასწაული უნდა მოხდეს მეორე ლიგიდან რომ არ გავარდეს.
უმრავლესობის ურთიერთდაპირისპირების ფონზე ოპოზიციონერმა სოსო ჩხაიძემ აუდიტის დასკვნის გასაჯარება მოითხოვა:- „ყველა ვაღიარებთ, რომ იყო შეცდომები და არსებობს ვალი. საინტერესოა აუდიტის სამსახური რას ამბობს, როგორ მოხდა, რა იყო, რატომ არის გადასახდელი ეს თანხები და ა.შ. ბატონებო, უკვე მრავალი სხდომაა ვითხოვთ აუდიტის დასკვნას ამასთან დაკავშირებით. გვანახონ რა ხდება და შემდგომ ვიმსჯელოთ რა გამოსავალია საჭირო. აბა, ასე ყველა სხდომაზე ვიძახოთ, იმის ბრალია და ამის ბრალია, შედეგი რა გვექნება?!“
სხდომაზე ისიც ითქვა, რომ როგორც პროკურატურა, ასევე სხვა სამსახურები უნდა დაინტერესდეს კლუბში არსებული ფინანსური მდგომარეობით, რა იყო წინათ, ვინ გააკეთა გადაცდომა და საერთოდ, რა არის ამ ვალების გამომწვევი მიზეზი.
დიდი ალბათობით „გურიას“ ვალების მარადიული თემა საკრებულოს მორიგ სხდომაზე აქტუალური იქნება, რამეთუ საბიუჯეტო ცვლილებების შესახებ საკითხი ადმინისტრაციიულ წარმოებაზე წავიდა და მისი დამტკიცება მომავალ სხდომაზე მოხდება. იმედია, მანამდე უმრავლესობა ჩამოყალიბდება, თორემ გაწევ-გამოწევა რამოსატანია, მუშტი-კრივიც შეიძლება ვიხილოთ.
