დათბა თუ არა, გურიაში ფაროსანა ძალიან დიდი რაოდენობით გამოჩნდა, რამაც მოსახლეობის შეშფოთება გამოიწვია.
_ აზიური მავნებლის, ფაროსანას წინააღმდეგ ბრძოლა, წელს, განსაკუთრებით აუცილებელი იქნება და არნახული მობილიზება დაგვჭირდება. იმდენია გამოსული, არც წარმოვიდგენდით. გვეგონა, კლებისკენ იყო საქმე წასული და უარესობაა _ მავნებლის უარესი ჯარი მოგვადგა, ვიდრე აქამდე გვახსოვს, _ ასეთ საუბარს ყოველდღიურად მოისმენთ ოზურგეთში, როგორც სოფლებში, ისე სხვადასხვა თავშეყრის ადგილებსა თუ ტრანსპორტში.
მართლაც, მავნებელი უკვე აქტიურად და დიდი რაოდენობით გამოჩნდა. სად არ ნახავთ მას _ სახლის ფანჯრებზე, სათავსოებიდან გამოსვლისას, თხილის პლანტაციებში…
_ ქინძსაც ფაროსანას სუნი აქვს, _ გვეუბნებიან ოჯახის დიასახლისები, რაც მართლაც დასტურდება.
_ წამლობა გვიანდება. უკვე დაზიანებულია ხეხილი. სანაყოფე კვირტები თუ კვირტიდან გამოსული პატარა ნაყოფი ისეთი რაოდენობით ყრია დაბლა, გული მოგიკვდება. მხოლოდ ერთი მავნებლის ბრალი არაა ეს. ზოგადად, სხვაც ბევრია, თუმცა, ფაროსანა ძალზე გააქტიურებულია. ხალხი შეწამვლასაც სხვადასხვაგვარად უდგება. ზოგს მოსწონს, ზოგს _ არა. სიმართლე გითხრათ, ახლა არ ვიცი, როგორია შესაწამლი ნივთიერების შედგენილობა და მისდამი მიდგომა. ადრე დიზელის საწვავში ურევდნენ სპეციალურ პრეპარატს. უნდა ითქვას, რომ ფაროსანას ძლიერი დარტყმა მიაყენა, თუმცა, აშკარად დააზიანა, დაწვა ხეხილოვანთა ფოთლები, ნაყოფი, ფუტკარსაც ბევრგან დაეტყო ამ შეწამვლის კვალი. ზოგს მთლიანად დაეღუპა ყველა სკა. მე შორს ვარ იმ აზრისგან, რომ მხოლოდ სახელმწიფოს მიერ გატარებული ღონისძიება დაგვაძლევინებს ამ პრობლემას.
აუცილებლად ხალხმაც უნდა შეწამლოს სხვადასხვა ფართობი. თითოეულმა მეურნემ უნდა შეწამლოს საკუთარი პლანტაცია თუ ბაღ-ბოსტანი. ცხელი ნისლით დამუშავება კი, ზოგადად, კარგი წინააღმდეგობაა მავნებელთან, თუმცა, ვიმეორებ, გვიანდება. დაგვიანებულია უკვე! გადაგვიარა უკვე ფაროსანამ, ასე ვთქვათ. მალე თხილსაც მიეტანება! _ ამბობს “გურია ნიუსთან” ფერმერი, მეწარმე დავით თენიეშვილი.
_ წელს, რატომღაც დააგვიანეს ცხელი ნისლით შეწამვლა. ამინდებს ვუყურებთო და ბოლო ერთი კვირაა, წვიმა არ ყოფილა, თუმცა, შეწამვლა არ დაუწყიათ. რა ვიცით, რა ეწებება იმ ფირფიტებზე. ჩვენ ვხედავთ, რომ უამრავი ფაროსანაა გამოსული. გვიანდება შეწამვლა და რატომ _ ვერ მივხვდით, _ გვეუბნებიან ლიხაურის და ჭანიეთის მცხოვრებლები: ნონა სალუქვაძე, ნუგზარ ანთიძე, ვაჟა მოდებაძე, ხათუნა სალუქვაძე.
_ ჩემი სათხილე მე თვითონ შევწამლე. ვიმედოვნებ, რომ სხვა ფართობიდან ნაკლებად გადმოვა მავნებელი, როცა აქ შეწამლულია. თუმცა, რატომ გვიანდება ცხელი ნისლით შეწამვლა, არ ვიცი. გასულ წლებში, ამ დროს შეწამლული იყო. ბევრია გამოსული და რომ დააზიანებს ყველა კვირტს და კვირტიდან გამოსულ ნაყოფს, მერე რაღად გვინდა ეს შეწამვლა? _ ამბობს ჭანიეთის მკვიდრი ჯუმბერ სურგულაძე.
სეს-ის გურიის რეგიონული სამსახურის ხელმძღვანელი მანანა ერქომაიშვილი, “გურია ნიუსთან” ასეთ კომენტარს აკეთებს:
_ დათბა და მავნებელი გამოჩნდა. ჩვენ აქტიურად ვმოქმედებთ. მუშაობს ფაროსანას წინააღმდეგ ბრძოლის, გურია-აჭარის შტაბი, რომლის მითითებები ყველგან სრულდება. კერძოდ, თხილის პლანტაციებში, ეზოებში დამონტაჟებულია ე. წ. მიმზიდველები, ფერომონები. 5-5 ფირფიტა განთავსებულია ყველა ადმინისტრაციულ ერთეულში, რომელზეც მეშვიდე დღეს თუ დაფიქსირდა რაოდენობით 15 მავნებელი, უკვე ცივი შესხურებით შეწამვლა მოხდება. ხოლო როცა აკაციის ყვავილობა დასრულდება, ცხელი ნისლით თერმული დამუშავება აუცილებლად დაიწყება, _ გვითხრა მანანა ერქომაიშვილმა.
ამასობაში კი, ფაროსანას და ასევე, სხვა მავნებელთა გამო, გურიაში უკვე ძალიან ბევრი ვაშლის, მსხლის თუ წყავის კვირტიდან გამოსული ნაყოფი ცვივა. რა თქმა უნდა, კლიმატური ცვლილების დაღიც აზის ამ ყველაფერს. თუმცა, ფაროსანას რაოდენობა, როგორც გურულები ამბობენ, ლამის პირვანდელ მდგომარეობას უტოლდება, როცა ის ჩვენს მხარეში გამოჩნდა.
“გურია ნიუსი” ამჯერად ფაროსანასთან ბრძოლის საკოორდინაციო ცენტრის გურია-აჭარის ჯგუფის ხელმძღვანელს, ირაკლი გოთუას დაუკავშირდა.
_ ბატონო ირაკლი, რა მდგომარეობაა ფაროსანას წინააღმდეგ ბრძოლის თვალსაზრისით? ხალხი ამბობს, რომ ძალიან გვიანდება შეწამვლა. როდის აპირებთ ცხელი ნისლით დამუშავებას?
_ გეტყვით, რომ ფაროსანასთან ბრძოლის წინააღმდეგ აქტიური ღონისძიებები, კარგა ხანია, დაწყებულია. რამდენიმე სოფელში დაწყებულია დაწყებულია წამლობაც.
_ რომელ წამლობაზე საუბრობთ? ხალხი ამბობს, რომ ჯერ მსგავსი არ მომხდარა.
_ ეს არის ცივი შესხურების მეთოდი. ყველა სოფელშია განთავსებული მონიტორინგის ფირფიტა. 15 ცალი ფაროსანა სადაც მიეკვრება ამ ფირფიტას, იქ უკვე ვაწითლებთ სიტუაციას და ვიწყებთ წამლობას. დღეს ასეთი ორმოცამდე სოფელია გურიაში. ასევე, ვითვალისწინებთ აკაციის ყვავილობის დასრულების მომენტს, რადგან ფუტკარი ყველაზე აქტიურად ახლა აკაციის ყვავილს ეტანება.
_ როდის დაიწყება ცხელი ნისლით წამლობა, რომელიც ყველაზე შედეგიანად არის მიჩნეული? ჩვენი გამოკითხვით, ხალხი უკვე ამბობს, რომ ფაროსანამ, ლამის, გადაგვიარა და მოგვეშველონო.
_ ალბათ, სამი-ოთხი დღის შემდეგ დავიწყებთ (საუბარი ჩაწერილია 4 ივნისს. ავტ.).
_ იქნება თუ არა ეს სახიფათო ხეხილოვნების, ფუტკრის თუ ბაღ-ბოსტნებისთვის? ხალხი ამაზეც წუხს…
_ რაც შეეხება საშიშროებას, რომ დაზიანდება გარემო, ბოსტნები ან ფუტკარი, კატეგორიულად გამოვრიცხავ. გეტყვით, რომ წინა წლებში, უფრო სწორად, პირველ წელს, ხდებოდა ნაშუადღევს შეწამვლა. ამ დროს მცენარის ფოთოლი ცხელია, ასევე, ფუტკარი გარეთაა. დღეისთვის, გასულ წელსაც, შეწამვლა ხდება და ხდებოდა გვიან, ღამით. ამიტომ გამორიცხულია დაზიანება. ამ დროს მცენარის ფურცელი უკვე გრილია. ფუტკარი კი სკაშია, _ გვითხრა ირაკლი გოთუამ.
“გურია ნიუსი” , სეზონის განმავლობაში, აქტიურად ერთვება ფაროსანას წინააღმდეგ ბრძოლის პროცესში და ჩვენს მკითხველებს, მეურნეებს სისტემატურად მივაწვდით ინფორმაციას.
ავტორი
