გურიის რეგიონს წლებია ამ რაოდენობის ნალექი თოვლის სახით არ ახსოვს. მეტეოროლოგების თქმით, ადგილი არქტიკული ცივი ჰაერის მასების შემოჭრას აქვს, რამაც დასავლეთ საქართველოში ბოლო რამდენიმე დღის განმავლობაში უხვთოვლიანობა და მასთან დაკავშირებული არაერთი პრობლემა გამოიწვია.
დაზიანებულია საცხოვრებელი სახლები, ენერგოსისტემა. სოფლების ნაწილში გზები არაა გაწმენილი. სახლის გადათოვლის სამუშაოებს ერთი ადამიანის სიცოცხლეც შეეწირა.
ორგანიზაცია „საქართველოს მწვანეები – დედამიწის მეგობრების“ თავმჯდომარემ, ნინო ჩხობაძე “გურია ნიუსთან” საუბრისას ამბობს, რომ მუნიციპალიტეტებს სტიქიასთან გასამკლავებლად საჭირო ტექნიკა საკმარისი რაოდენობით არ ჰყავთ. ამ რაოდენობის თოვლის დნობის პროცესმა კი შესაძლოა დამატებითი პრობლემები შექმნას, რადგან მოსალოდნელია მეწყრული პროცესების გააქტიურება.
“ახლა მაქვს გახსნილი 2023 წლის ბიულეტენი გარემოს ეროვნული სააგენტოსი, რომელიც აკეთებს საფრთხის ზონებს და პირდაპირ არის მითითებული, რომ გურიის მხარეში გამოვლენილია 135 ინფრასტრუქტურული ობიექტი, 151 დასახლებული პუნქტი 467 გააქტიურებული და ახალი წარმონამქმნი მეწყრული სხეული, რომელიც გააქტიურდება როგორც კი დაიწყება თოვლის დნობა. ეს არის ოზურგეთი-ლანჩხუთის მონაკვეთი და არანაკლები პრობლემები აქვს ჩოხატაურის მუნიციპალიტეტსაც. ასე რომ მეწყრული ზონების გამო, რომელიც რეალურად გვაქვს გურიაში უნდა ველოდოთ მეწყერების გააქტიურებას, რადგან გაიჟღინთება ამდენი ნალექის შედეგად და მეწყრული პროცესები შეიძლება ბევრ შემთხვევაში უფრო აქტიური გახდეს. ამ სიტუაციიდან გამომდინარე, 2023 წელს დაიდო ეს ბიულეტენი და დღეს არის 2025 წელი. მუნიციპალიტეტებს უნდა ჰქონოდათ მარტო მეწყერთან საბრძოლველად მძიმე ტექნიკა, ტრაქტორი მაინც, შესაბამისი მანქანები, იმისთვის რომ სწრაფად მოახდინონ რეაგირება. სამწუხაროდ, არაფერი არ ჰქონდათ, თოვლთან ბრძოლასაც ეს ტექნიკა სჭირდება და აღმოჩნდა, რომ ადგილზე არ არის დიდი რაოდენობით და დროზე ვერ დაიწყო გზის გაწმენდითი სამუშაოები. ყველა მუნიციპალიტეტი უნდა იყოს აღჭურვილი მძიმე ტექნიკით, რომელიც მათ სჭირდებათ. ლენტეხის მუნიციპალიტეტში მეტრა- ნახევარი თოვლია, თუმცა შესაბამისი ტექნიკა აქვთ, მაგრამ ახლა უჭირს იმერეთს და გურიას განსაკუთრებით გაუჭირდა, რადგან აღმოჩნდა, რომ არც ადამიანური და არც აღჭურვილი ტექნოლოგიური რესურსი მათ ადგილზე არ ჰქონდათ მოქმედების დროულად დასაწყებად. ეს სჭირდებოდათ მეწყერის შემთხვევაშიც.
2023 წელს, როცა შოვის ტრაგედიის შემდეგ წყალდიდობამ დააზიანა გურიის რეგიონი და ხალხი დაიღუპა, უკვე უნდა გვცოდნოდა, რომ მეწყრული პროცესები იქ არის ძალიან გააქტიურებული და ტექნიკა უნდა ყოფილიყო, მაგრამ სამწუხაროდ არ არის“,_ ამბობს ნინო ჩხობაძე.
_ ამ რაოდენობის ნალექი გურიის რეგიონში წლებია არ ყოფილა. შეიძლება ეს დავუკავშიროთ კლიმატის ცვლილებას?
_ეს პირდაპირ კავშირშია კლიმატის ცვლილებასთან. კლიმატის ცვლილება პოლიტიკური ამბიცია არ არის, გარემო იცვლება. ყველა ბოლო ანგარიში მეტყველებს იმაზე, რომ იმდენად იცვლება დედამიწის კლიმატი, რომ ბუნებრივი კატასტროფები მოხდება ძალიან ბევრ შემთხვევაში. ეს ციკლონი შემოსულია არქტიკიდან. ეს ნიშნავს, რომ იქ იმხელა დნობა იყო, რომ ციკლონი წამოვიდა აქეთ.
