ყოველთვის პატივს ვცემდი ენთუზიასტებს. ეს ის ხალხია, რომელიც ანგარების და რაღაც მოგების გარეშე აკეთებდნენ საკუთარ (და დავამატებდი) სხვის საქმეს და საკეთებელს და ბევრს ისეთს, რაც მათთვის არავის უთხოვია, მაგრამ მომავალში მათი ეს ნაღვაწი ბევრს გამოადგება. ერთი ასეთი ენთუზიასტი გიორგი გრძელიძე შემხვდა მუზეუმში და გადმომცა საკუთარი ბროშურა სახელწოდებით ,,გურიის სიძველეთა აღწერა”. ნაშრომისთვის მასალები შეკრებილ იქნა 2009-2016 წლებში საველე-ეთნოგრაფიული კვლევა-ძიებისას. ის მოიცავს ნატანების, შრომის, თხინვალის, კონჭკათის და სხვა სოფლების სიძველეთა აღწერას, ასევე საინტერესო მასალა აქვს მოძიებული ფირალების შესახებაც. ავტორს მოშველიებული აქვს მასალების ძველი გაზეთებიდანაც.
ამონარიდი ბროშურიდან: ,,რაც შეეხება მდინარე ნატანებს, რომელსაც ძველი ბერძენი გეოგრაფი არიანე მოიხსენიებს ისისის სახელწოდებით და რომლის სიგრძეც არის 70 კმ. დღევანდელი სახელწოდება მკვლევართა აზრით მიიღო შემდეგ გარემოებათა გამო. მდინარეს მთიდან გზა და გზა ატანდნენ ხე-ტყეს, რის გამოც დროთა განმავლობაში ეწოდა ნატანები, ე.ი. ხე-ტყის ნატანი ანუ ნატანები, დროთა განმავლობაში მდინარის სახელწოდება გადავიდა სოფელზე და ჯიშკლოვანი შეიცვალა ნატანებით, მდინარის სახელწოდების მიხედვით”.
ყოველმხრივ საინტერესო ბროშურაა ,,გურიის სიძველეთა აღწერა”, ვუსურვებ ავტორს კიდევ მრავალი საინტერესო მასალა მოძებნოს და გამოაქვეყნოს. ეს ბევრად შეუწყობს გურიის ისტორიის თეთრი ლაქების შემცირებას.
