ახალგაზრდა ცოლ–ქმარი _ მარიამ შიუკაშვილი და თემურ ჭანტურია ჩოხატაურში სასტუმრო “გურიას” ფლობენ. ტურიზმის განვითარების გზაზე, ასეთი ლოკაციების არსებობა, მნიშვნელოვანია.
_ თბილისში დავიბადე და გავიზარდე. ვსწავლობდით თბილისის 128-ე სკოლაში. მუშაობა დავიწყე ერთ–ერთ სავაჭრო მარკეტში. მე სადაც ვმუშაობდი, იქ გავიცანი ჩემი მომავალი მეუღლე, ჩოხატაურელი თემურ ჭანტურია. ისიც იქვე, დაცვის სამსახურში მუშაობდა. შეგვიყვარდა ერთმანეთი, ოთხ თვეში ვიქორწინეთ და წამოვედით გურიაში, _ სხარტად საუბრობს მარიამ შიუკაშვილი და გიჩენს სურვილს, განსაკუთრებული ყურადღებით მოუსმინო.
_ უკვე დიდი შვილები მყავს. 15 წლის ნატა და 7 წლის ნია. ვშრომობთ, ვმოძრაობთ, ვიბრძვით, რათა ჩვენი ყოველდღიურობა გავალამაზოთ, ყოფითი მხარე კი ეკონომიკურად გავაძლიეროთ, _ გვიამბობს მარიამი და განსაკუთრებული ინტერესით და სიხარულით მაინც თავის ახალ პროექტზე საუბრობს, რომლითაც ენერგოეფექტურობა მათ ცხოვრებაში შემოვიდა.
ახლახან, ოჯახმა, მარიამის ინიციატივით, ბიზნესწინადადება წარადგინა კონკურსში, რომელიც პროექტის _ “ჩოხატაური მდგრადი ენერგეტიკული მომავლისკენ” ფარგლებში გამოცხადდა. ამ პროექტის პარტნიორების შესახებ ინფორმაცია შეგიძლიათ იხილოთ ამ სტატიის ბოლოს, პროექტის ფინანსური მხარდამჭერი კი ევროკავშირია.
პროექტი კომისიამ საინტერესოდ მიიჩნია და დააფინანსა. სწორედ ასე მოხდა ალტერნატიული ენერგიის შეტანა საკუთარ საქმიანობაში.
მარიამ შიუკაშვილი ენერგოეფექტურობის თემით განსაკუთრებით მას შემდეგ დაინტერესდა, რაც არასამთავრობო ორგანიზაციამ “სოლიდარობის ფონდი პლ საქართველოში” ტრენინგი ჩაატარა, რომლის მსმენელი თავადაც იყო, სხვებთან ერთად.
_ გვითხრეს, რომ შესაძლებელი იყო ე.წ. მზის პანელზე დაგვეწერა პროექტი და ბუნებისგან მიგვეღო ეფექტური ენერგია. ძალიან გამიხარდა და ჩემს მეუღლეს გავაცანი ეს ინფორმაცია. იდეა მასაც მოეწონა და დამეხმარა პროექტის დაწერაში. მერე კი წარვადგინე და გავიმარჯვე კიდეც. ჩემს სიხარულს საზღვარი არ ჰქონდა და არ აქვს… მალე დავიწყეთ მოსამზადებელი მუშაობა. დაგვეხმარა შპს “ჰელიო” ჯგუფი, რომლის ძალისხმევით ყველა საქმე სისრულეში მოვიყვანეთ. 16 მზის პანელი განლაგდა მორგებულ სივრცეში. ცოტაც და მუშაობას დავიწყებთ ამ მიმართულებით. დროს, თითოეულ წუთს ვუფრთხილდები და ყოველდღე ვრწმუნდები, რომ ჩემს მცირე ბიზნესსაქმიანობაში, ყველა გადადგმული ნაბიჯი სწორი და კარგად გათვლილი აღმოჩნდა ენერგოეფექტურობამდე, _ ამბობს და აგრძელებს საუბარს სამუშაო დეტალებზეც კი.
სასტუმრო “გურია” დღეისთვის 11 ადგილზეა გათვლილი. აქედან, როგორც მარიამი გვეუბნება, ერთადგილიანი, მხოლოდ ერთი ნომერია, დანარჩენი კი ყველა ორადგილიანია.
კითხვაზე, თუ რა დარჩა, თუნდაც მინიმალური გასაკეთებელი საქმე მზის ენერგიის მიღებამდე, გვითხრა, რომ ბოლო ეტაპი მრიცხველის ჩართვაა:
_ განაცხადი უკვე წარდგენილი მაქვს “ენერგო–პროს” ხელმძღვანელობასთან. როცა განიხილავენ, მალევე დაგვიდგამენ. მოკლე დროში დაიწყება მუშაობა და მზის ენერგიის მიღების შემდეგ, გაგვინახევრდება ხარჯები. ახლა თუ 500 ლარს ვიხდით ელექტროენერგიის მოხმარებისთვის, მალე, სავარაუდოდ, 200 ან 250 ლარს გადავიხდით. ეს კი ძალიან დაგვეხმარება ბიზნესის განვითარების საქმეში, _ გვიამბობს მარიამი.
ყველაზე დიდი ჩანაფიქრი კი, მზის ელსადგურის ამოქმედების შემდეგ, მცირე ბიზნესის გაფართოების სურვილია; მარიამი გეგმავს, რომ სასტუმროს ეზოში რესტორანი ააშენონ. იქვე ზაფხულის და ზამთრის აუზიც გააკეთონ და მრავალმხრივი კომფორტული სივრცე შესთავაზონ მომხმარებლებს გართობისა და დასვენებისთვის.
_ ჩემი საქმიანობის მთავარი ამოსავალი წერტილია, ყოველ ჯერზე საჭირო და აუცილებელი განათლების მიღება, რაც ძალიან დამეხმარება ჩემი ბიზნესის განვითარების საქმეში. გამუდმებით ვსწავლობ, ვეცნობი სიახლეებს. რაკი ცხრა კლასი მქონდა დასრულებული, შემდეგ სწავლა გავაგრძელე გორაბერეჟოულის კოლეჯში “ჰორიზონტი” სპეციალობით _ კომპიუტერული ქსელები და სისტემები. გავიარე “საქართველოს ბანკის” კურსი; ასევე, მივიღე კიბერუსაფრთხოების სერთიფიკატი. ჩემი სპეციალობიდან გამომდინარე, თუკი რამე ონლაინ კურსი იქნება, არცერთს არ ვტოვებ, რომ არ გავიარო. საბედნიეროდ, დღეს ამის ხელმისაწვდომობა არის. მთავარია, მოსმენის და სწავლის სურვილი გქონდეს. ახლა ერთ–ერთი ბანკის განვადების ოფიცრის რეზერვში ვირიცხები, _ ამბობს მარიამი.
ყველაზე ძალიან კი, უხარია სწავლის კურსის გავლა პოლონეთში, რომელიც მალე მოხდება. ამბობს, რომ 23 ნოემბერს გაემგზავრება პოლონეთში სასწავლო კურსის გასავლელად, რაც პროექტითაა გათვალისწინებული.
მარიამს სურს, განსაკუთრებული სიყვარულით და პატივისცემით ოჯახზე ისაუბროს, რადგან მიაჩნია, რომ მის ცხოვრებაში ყველა წარმატებული ნაბიჯის გზამკვლევი მისთვის ძვირფასი ადამიანები არიან.
_ ძალიან მეხმარება ყველა. ჩვენ სოფელ ქვენობანში, დაბა ჩოხატურიდან შვიდი კილომეტრის დაშორებით ვცხოვრობთ. დედამთილი, ნატო ტრაპაიძე კლინიკა “მედალფას” ექთანია, მამამთილი _ გია ჭანტურია მცირე ბიზნესითაა დაკავებული. ისინი მუდამ ახერხებენ ჩემ გვერდით დგომას, საქმეც ამიტომ გამოგვდის. ოჯახში ყველა რომ ერთმანეთს უდგას გვერდით, მაშინ მიდის საქმე წინ. მართალია, ენერგოეფექტურობაზე პროექტის დაწერის იდეა ჩემი იყო, მაგრამ მთავარი საქმის ეფექტურობა ჩემ გვერდით მდგომმა ადამიანებმა განაპირობეს. უმთავრესი კი აქ იყო სამართლიანი გადაწყვეტილება იმ კომისიისა, ვინც ჩემი პროექტი განიხილა და გავიმარჯვე. ამიტომ, განსაკუთრებით მადლიერი ვარ, _ კმაყოფილების გამოსახატავად სიტყვებს არ იშურებს მარიამი.
წარმატებას ვუსურვებთ მიზანსწრაფულ, მოტივირებულ ახალგაზრდას, რომელსაც ნიჭიერებასთან ერთად, საოცარი შრომისმოყვარე ხასიათი აქვს. ეს კი უსათუოდ იქნება მისი არაერთი წარმატების საწინდარი.
ავტორი
