პოლონეთში, კატოვიცეში, გაეროს კლიმატის ცვლილებების კონფერენცია ჩატარდა, სადაც სპეციალური ანგარიში წარადგინეს, რომელიც აღწერს, როგორ უნდა იმოქმედონ ქვეყნებმა მთელ მსოფლიოში კლიმატის ცვლილებებისგან სიცოცხლის დაცვის მიზნით.
მსოფლიო ჯანდაცვის ორგანიზაციის ცნობით, პარიზის შეთანხმების მიზნის მიღწევით, მხოლოდ ჰაერის დაბინძურების შემცირების შედეგად 2050 წლისთვის მილიონზე მეტი სიცოცხლის გადარჩენაა შესაძლებელი.
ჰაერის დაბინძურება ყოველწლიურად მსოფლიოში 7 მილიონამდე ადამიანის გარდაცვალების მიზეზი ხდება, ხოლო გლობალური ზარალი 5 ტრილიონზე მეტ აშშ დოლარს შეადგენს.
„პარიზის ხელშეკრულება პოტენციურად ძლიერი ჯანმრთელობის შეთანხმებაა ამ საუკუნეში. ნათელია, რომ კლიმატის ცვლილება სერიოზულ გავლენას ახდენს ადამიანის სიცოცხლესა და ჯანმრთელობაზე. ის საფრთხეს უქმნის ისეთ ელემენტებს, რომლებიც გვჭირდება კარგი ჯანმრთელობისთვის_სუფთა ჰაერს, უსაფრთხო სასმელ წყალს, სასურსათო საკვების წყაროს და უსაფრთხო თავშესაფარს და ხელს უშლის გლობალური ჯანმრთელობის პროგრესს. ჩვენ არ შეგვიძლია რაიმე საქმის მომავლისთვის გადადება“,_ამბობს მსოფლიო ჯანდაცვის ორგანიზაციის გენერალური დირექტორი.
ჰაერის მნიშვნელოვანი დამაბინძურებელია წიაღისეული საწვავის წვა. ასევე ადამიანის ისეთი საქმიანობაც, რომელიც კლიმატის დესტაბილიზაციას და ჯანმრთელობის მდგომარეობის დამძიმებას იწვევს.
ნახშირბადის დაბალი შემცველობის ენერგო წყაროებზე გადასვლა არა მხოლოდ გააუმჯობესებს ჰაერის ხარისხს, არამედ დამატებით შესაძლებლობებს წარმოშობს ჯანმრთელობისთვის. მაგალითად, ველოსიპედით გადაადგილება გაზრდის ფიზიკურ აქტივობას, რომელიც შეიძლება დაეხმაროს ადამიანს ისეთი დაავადებების თავიდან აცილებაში, როგორიცაა დიაბეტი, კიბო და გულის დაავადებები.
როგორც მსოფლიო ჯანდაცვის ორგანიზაციაში ამბობენ, მხარდაჭერა რჩება არაადეკვატური, განსაკუთრებით, მცირე კუნძულოვან განვითარებად ქვეყნებში და ნაკლებად განვითარებულ ქვეყნებში.
ანგარიში ქვეყნებს მოუწოდებს, კლიმატის ცვლილებების შესამცირებელ ინტერესებსა და ხარჯებში ჯანმრთელობა გაითვალისწინონ, გარდა ამისა, ის რეკომენდაციას იძლევა, რომ ქვეყნებმა გამოიყენონ ფისკალური წახალისებებბი, როგორიცაა ნახშირბადის ფასები და ენერგო სუბსიდია, რომ მოხდეს სეგმენტების წახალისება სათბურის აირების და ჰაერის დაბინძურების შემცირება.
