“ჯერ კიდევ არ გვინდა, ჩვენივე არჩეულ მთავრობას ვეტაკოთ!”

ქალაქ ოზურგეთში, ცენტრალურ ადგილზე, გურიის ქუჩაზე, გარემოვაჭრეები შეიკრიბნენ. მათი თქმით, 15 გარემოვაჭრე, კორონავირუსის პანდემიის დროს, მოტყუებით გაყარეს იმ ადგილებიდან, სადაც წლების განმავლობაში იდგნენ და ვაჭრობდნენ.

_ ჩვენ ვართ ის ხალხი, რომლებსაც პანდემიის დროს გვითხრეს, 15 დღით ადექით აქედან და მერე მოგხედავთო. კანონს და წესს დავემორჩილეთ. თუმცა, რამდენი თვე გავიდა და მხოლოდ 15 ადამიანისთვის გაჩნდა უსაშველო _ ყველა დაბრუნდა თავის ადგილზე. ყველაფერი “ჩაწყობითაა”, ჩვენ კი მხოლოდ ტყუილით და დაპირებით გვაცხოვრებენ. რამდენი ხილი და ბოსტნეული დაგვილპა და გადავყარეთ.

ყოველთვის გვპირდება მერი, კოტე შარაშენიძე, რომ დაგვაბრუნებს, დაგვეხმარება. კარგად იცის, მის ასარჩევად როგორ დავრბოდით და გვერდში ვედექით. რატომ გვატყუებს? ახლა აქ აქცია არ გვაქვს. არ გვინდა, ჩვენს არჩეულ ხელისუფლებას ძირი გამოვუთხაროთ, ჯერ კიდევ ხათრის ქვეშ ვართ, თორემ აქციას ვაჩვენებთ აწი. 15 ადამიანი რომ “ამოვშავდით”, ზოგი სახლში ზის, ზოგი აქა-იქ დგას ქუჩაში, ეს საქმეა? ერთი თეთრი თუ გაიმეტა ვინმემ ჩვენთვის ამ პანდემიის დროს? ჩვენსავით ვინ დაზარალდა? მშიერი გვყავს ოჯახები. დღეს გამოვიტან აქ მაგიდას, ქოლგასაც გავშლი და დავიწყებ ვაჭრობას. 12 წელი ვიდექი აქ და გამაგდეს. აქვე, ეგერ კი სხვა ქალაქებიდან ჩამოსული ხალხი დგას და ყიდიან საქონელს. აი, ქალბატონი, ნაყინს და წყალს ყიდის. ადრეც იდგა აქ. მისთვის შეიძლება, ჩვენთვის არა? რატომ უნდა დაგვაპირისპირონ ერთმანეთს? თუ ვიღაც არ გმფარველობს, თუ ვიღაცის ნაცნობი არ ხარ, არაფრად გაგდებენ, _  გვითხრა მანანა ფერცულიანმა, რომელსაც ნინა ალვერციანი, ეკა ჯაჭვაძე, ნაზი ტონგანიანი და აზა ჩხარტიშვილი დაეთანხმნენ.

_ 15 წელია, გარემოვაჭრე ვარ. ხომ მიცნობთ კარგად?! ამ ადგილზე ხომ მხედავდით წლების მანძილზე?! რაკი პანდემია გამოცხადდა, მთხოვეს, რომ 15 ივნისამდე შემეჩერებინა საქმიანობა და მოწესრიგებულად მევაჭრა შემდგომში. პირადად ვესაუბრე მერს, კოტე შარაშენიძეს. 15 ივნისს კი დავურეკე და შევახსენე დანაპირები. თან ვუთხარი, რომ ოჯახი მშიერი მყავს, უნდა ჩამოვიტანო ხილ-ბოსტნეული და სად დავდგე-მეთქი. შემპირდა, წადი, ზედამხედველობის სამსახურის წარმომადგენლებს დავურეკავ და გაჩვენებენ ადგილს, სადაც უნდა დადგეო. მართლაც ჩამოვიტანე ყველაფერი. ამის შემდეგ, კვლავ ვრეკავ მერთან და მეუბნება, პანდემიის გამო არ შეიძლება და რა ვქნაო. კი დამალპობინა ამდენი საქონელი. დოლარში მაქვს სესხი აღებული. გადამიხდის? არ მომცა ნება, რომ დავმდგარიყავი, მომატყუა, _ გვითხრა მანანა ფერცულიანმა.

_ ქალბატონო მანანა, თუ იცით, რომ მერიამ შეიტანა საკრებულოში დადგენილების პროექტი, რომ მალე გამოიყოფა ქალაქში სავაჭრო ადგილები. თქვენ უნდა მიმართოთ განცხადებით ნებართვის თაობაზე, რომ კონკრეტული ადგილი გამოგიყონ…

_ ხვალვე შევიტანთ, თუ ესაა აუცილებელი.

_ მაგრამ თუ გქონდათ დღემდე განცხადება შეტანილი?

_ იმათ ჰქონდათ, ეგერ რომ ვაჭრობენ? რატომ მაჩხუბებენ დედის ტოლა ქალთან, რომელიც ძალიან მიყვარს? გამოვიდა და დადგა აგერ, ვაჭრობს. ღმერთმა ყველას ხელი მოუმართოს.

ჩვენ იქვე, გამაგრილებელი წყლითა და ნაყინით მოვაჭრე ევა ტრაპაიძეს ვკითხეთ, ჰქონდა თუ არა ნებართვა და როდის მიიღო ის.

_ ნებართვა მაქვს, როგორ არა. ოცი დღე იქნება, რაც მივიღე.

_ ჩვენი ინფორმაციით, არ გაქვთ და თვითნებურად დადექით. შეგიძლიათ, გვაჩვენოთ თქვენი ნებართვა?

_ მოგიტან ხვალ. ახლა აქ არ მაქვს, _ გვითხრა ქალბატონმა ევამ.

ქალბატონები კი, რომლებიც პროტესტს გამოხატავდნენ, დაჟინებით იმეორებდნენ, რომ ნაცნობობით და “ჩაწყობით” დგებიან ისევ იმ ადგილებზე, სადაც პანდემიამდე იდგნენ და თავად დაიჩაგრნენ მხოლოდ იმიტომ, რომ სიტყვის პატრონებად დარჩნენ.

_ კი, ბატონო, შევიტან ხვალვე მაგ ნებართვისთვის განცხადებას, მაგრამ რამდენ ხანს ვუცადო? და კიდევ ერთ თვეს ვაშიმშილო ოჯახი? გაიხედეთ, რამდენი გამოვიდა და დადგა, ვინც ადრე აქ იდგა და ჩვენსავით, 15 ივნისამდე გაუშვეს, ე. წ. “მოსაწესრიგებლად”, პანდემიის გამო. ერთი ჩვენ ვერ “მოვწესრიგდით”! გამოდის, რაც უფრო კანონმორჩილად მოიქცევი, უფრო აგიგდებენ და დაგტოვებენ მშიერს. ამიტომ დავდგები აქ დღესვე, _ გვითხრა მანანა ფერცულიანმა.

გარემოვაჭრე აზა ჩხარტიშვილი ითხოვს, როგორც ააყენეს კუთვნილი ადგილიდან, ისე მოუძებნონ ახლა ნორმალური სავაჭრო გარემო ან იმავე ადგილზე დადგომის უფლება მისცენ:

_ რომ ვიდექი 12 წელი და გამაგდე აქედან მოტყუებით, ახლა რას მიპირებ, არ უნდა დამაბრუნო, მერი რომ ხარ, თუ ვინც ხარ ამ საქმის მოთავე?! არ მინდა ბატონო, მაგათი ადგილი და არც არაფერი. რაც ვიზარალე, ვერ ვივაჭრე და მომაცდინეს მოტყუებით, დამიბრუნონ. ერთი თეთრი არავის გადაუხდია ჩვენთვის პანდემიის დროს. ჩვენ დავრჩით დაზარალებულთა შორის ყველაზე დაზარალებული ამ კორონობისას. ძალიან გამწარებული ვართ! _ თქვა ჩხარტიშვილმა.

ადგილზე მოსულმა ოზურგეთის მუნიციპალიტეტის მერიის ზედამხედველობის სამსახურის წარმომადგენელმა, გენადი კიშინსკიმ განაცხადა, რომ მერია ცდილობს, ყველაფერი კანონის ფარგლებში მოაწესრიგოს:

_ ყველაფერი უნდა მოწესრიგდეს კანონის შესაბამისად. ქუჩის პროცესში ნუ გადავალთ. უნდა შემოიტანოთ განცხადება მერიაში, რომ გაიცეს ნებართვა. გასაგებია, ხალხს უჭირს და გამოთქვამენ პროტესტს, _ უთხრა მან გარემოვაჭრეებს.

_ კანონი ყველასთვის უნდა კანონობდეს და არა შერჩევით. მერი რომ ამბობდა, შენ გვერდით ვარო, სადაა ახლა? აგერ, ტელეფონში მაქვს ფოტოები, რამდენი პროდუქტი გამიფუჭდა. დღეს ვიწყებ მუშაობას. მორჩა, ვდგები ჩემს ძველ ადგილზე, _ განაცხადა მანანა ფერცულიანმა და დაიკავა ადგილი, სადაც, მისივე თქმით, 12 წლის განმავლობაში იდგა და ვაჭრობდა.

გარემოვაჭრე ქალბატონები _ აზა ჩხარტიშვილი, ზაირა ვაშაყმაძე, ლილი გაზდელიანი და ეკა ჯაჭვაძე, ასევე, აპროტესტებენ იმ ადგილზე დგომას, სადაც მერიის ინიციატივით გადაიყვანეს:

_ ეს არის კიბით გადასასვლელი გურიის ქუჩიდან, აფთიაქ “პსპ”-ს გვერდით. იქ, სადაც კიბე მთავრდება, მიმდებარე მცირე ტერიტორიაზე დაგვიდგეს ნახევრად დახურული ჯიხურები. სიცხეში აჭერს მზე და ვიხრუკებით. წვიმაში წყალი ჩამოდის. მაგიდა გარეთ არ გამოიწიოთ, ქოლგა არ დადგათო… ვართ ასე წვალებაში. ესაა კარგი ადგილი და ხელშეწყობა? რაც მთავარია, ხალხი აქ არ მოძრაობს, თუ ვინმეს კიბით გადასვლა არ სჭირდება. ისიც ან შემოიხედავს იქ და ან _ არა. თან ტუალეტად გადააქციეს იქაურობა. როცა არ ვართ, ღამით თუ დილაადრიან, საპირფარეშოდ იყენებენ. დაგვაბრუნონ ჩვენს ადგილზე. ასე დაგვპირდნენ მაშინ, მოსინჯეთ, 15 დღე დადექით, თუ არ მოგეწონებათ, გადაგიყვანთო. გადაგვიყვანონ ახლა! _ ბრაზობდნენ ქალბატონები.

“გურია ნიუსთან” ადგილზე მოსულმა ზედამხედველობის სამსახურის წარმომადგენლებმა ხაზგასმით აღნიშნეს, რომ მალე გარემოვაჭრეებს გამოუყოფენ ქალაქის სხვადასხვა ადგილზე კონკრეტულ ფართებს. დადგენილება ძალაში აგვისტოს შუა რიცხვებიდან შევა.

_ ჩვენი ვალია, ყველას დავეხმაროთ კანონის დაცვით. გარევაჭრობის თითოეულმა მსურველმა უნდა შემოიტანოს მერიაში განცხადება, რის საფუძველზეც შემდგომში მიიღებს ნებართვას და საქმიანობას დაიწყებს იმ კონკრეტულ ადგილზე, რომელიც კანონიერად იქნება გამოყოფილი, _ თქვა გენადი კიშინსკიმ.