სოციალური მომსახურების სააგენტომ „დასაქმების ხელშეწყობის მომსახურებათა განვითარების სახელმწიფო პროგრამის“ შემაჯამებელი კონფერენცია გამართა.
სოციალური მომსახურების სააგენტოს დასაქმების პროგრამების დეპარტამენტის უფროსის, მარიამ ბეზერაშვილის თქმით, მართალია, წლის საბოლოოს სტატისტიკა ჯერ კიდევ მუშავდება, მაგრამ ამ დროისთვის არსებული მონაცემებით, დასაქმება 1888 ადამიანმა შეძლო, რომელთაგანაც 95 შეზღუდული შესაძლებლობის მქონე პირია.
„69 მუნიციპალიტეტში არის ჩვენი ოფისები. წელს ჩართული იყო 44 სასწავლებელი. აქტიურობა ძალიან დიდია. წელს, მიუხედავად იმისა, რომ სრული სტატისტიკა არ გვაქვს, 1888 ადამიანი გრძელვადიანი დასაქმებით დასაქმებულია და მათ შორის 95 შეზღუდული შესაძლებლობის პირი. მართალია, უმუშევრობას ჯერ ვერ ვძლევთ, მაგრამ საწყისი ნაბიჯები გადადგმულია“, _ ამბობს ბეზერაშვილი.
რამდენად ადაპტირებული და მორგებულია სამუშაო გარემო შშმ პირებზე _ ამ საკითხზე „გურია ნიუსი“ შეზღუდული შესაძლებლობების მქონე პირების რეგიონულ კოორდინატორს, მაკა გოჩიტაშვილს ესაუბრა.
მისი თქმით, დამსაქმებლები ხვდებიან, რომ ადაპტირებული გარემოა საჭირო და თანამშრომლებიც გაგებით უდგებიან.
„2016 წელს იყო 58 დასაქმებული შშმ პირი, 2017 წელს 103, 2018 წელს ამ ეტაპზე 95 დასაქმებულია. წლის ბოლომდე რიცხვი კიდევ გაიზრდება. აღსანიშნავია, რომ იზრდება დაინტერესება შშმ პირების მხრიდან და ნელ-ნელა დამსაქმებელიც მიხვდა, რომ საჭიროა ადაპტირებული გარემო და თანამშრომლებიც გაგებით უდგებიან. წინა წლებთან შედარებით ვითარება უკეთესია“, _ამბობს გოჩიტაშვილი.
დასაქმების დეპარტამენტი „დასაქმების ხელშეწყობის მომსახურებათა განვითარების პროგრამისა“ და „სამუშაოს მაძიებელთა პროფესიული მომზადება-გადამზადების და კვალიფიციური ამაღლების სახელმწიფო პროგრამის“ ფარგლებში, სხვადასხვა აქტივობას ახორციელებს. კერძოდ, საშუამავლო მომსახურება სამუშაოს მაძიებლებსა და დამსაქმებლებს შორის, ინდივიდუალურ ჯგუფური კონსულტირებები, დასაქმების ფორუმები, მხარდაჭერითი დასაქმება, პროფკონსულტირებისა და კარიერის დაგეგმვის მომსახურება, მომზადება-გადამზადების, სუბსიდირების, სტაჟირებისა და სხვა პროგრამები.
2018 წლის ამ ეტაპისთვის არსებული მონაცემებით, ჯგუფურ კონსულტაციებში 1479 სამუშაოს მაძიებელი მონაწილეობდა. ინდივიდუალური კონსულტირება კი 16 275 სამუშაოს მაძიებელმა გაიარა. ინდივიდუალური პროფესიული კონსულტირება 530-ს, ჯგუფური კი 333 ბენეფიციარს გაეწია.
მხარდაჭერითი დასაქმების კონსულტანტებმა შშმ პირთათვის 341 ვაკანსია მოიძიეს. მხარდაჭერითი მომსახურება 274 შშმ პირს გაეწია. აქედან 33 შშმ პირი დასაქმდა.
სუბსიდირების კომპონენტში ჩაერთო 14 დამსაქმებელი და 26 ბენეფიციარი, მათ შორის, 22 შშმ პირი. დღეის მდგომარეობით, შრომითი ხელშეკრულება უკვე გაუფორმდა 11 ბენეფიციარს, აქედან 9 შშმ პირია.
პროფესიული მომზადება-გადამზადების პროგრამის პირველ და მეორე ეტაპზე სამუშაოს მაძიებელთა მოკლევადიანი კურსით უკვე 3000-მდე ბენეფიციარმა ისარგებლა. გასულ წლებთან შედარებით მსურველთა რაოდენობა მზარდია, რაც პროგრამის წარმატებით მიმდინარეობაზე მეტყველებს. 2016 წლიდან დღემდე, უკვე 876 პირი დასაქმდა.
2018 წელს თბილისსა და რეგიონებში დასაქმების 12 ფორუმი ჩატარდა. ფორუმების მეშვეობით 369 პირი დასაქმდა და მონიტორინგი კვლავაც გრძელდება.
შრომის ბაზრის მართვის საინფორმაციო სისტემა www.worknet.gov.ge-ზე სულ 229 555 ადამიანია რეგისტრირებული. აქტიური სამუშაოს მაძიებელია 194 296. წლის განმავლობაში თავისუფალი სამუშაო ადგილი იყო 8932.
როგორც ღონიძიებაზე საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მოადგილემ, თამილა ბარკალაიამ აღნიშნა, დღეს, როდესაც დასაქმება არის ქვეყნის ერთ-ერთი პრიორიტეტი, ჩვენ ნადვილად შეგვიძლია ვთქვათ, რომ გვაქვს მიღწევები, მაგრამ გაცილებით მეტი უნდა გაკეთდეს იმ მიზნების მისაღწევად, რაც სახელმწიფოს აქვს პრიორიტეტად დასახული.
საანგარიშო ღონისძიებაზე სოციალური მომსახურების სააგენტომ საუკეთესო პარტნიორები და დამსაქმებლები დააჯილდოვა.
