29 ივლისს, რუსეთის პრეზიდენტმა ვლადიმერ პუტინმა სახელმწიფოს ღალატისთვის გასამართლებული ორი ქალი – ანიკ კესიანი და მარინა ჯანჯღავა შეიწყალა. ორივე კრასნოდარის მხარის მცხოვრებია. ისინი რუსეთის ფედერაციის სისხლის სამართლის კოდექსის 275-ე მუხლით (სახელმწიფოს ღალატი) გაასამართლეს. რუსეთის გამოძიების მტკიცებით, მათ 2008 წლის აგვისტოში, რუსეთ-საქართველოს კონფლიქტის დაწყებამდე, ქართულ მხარეს სახელმწიფო საზღვართან რუსეთის სამხედრო ძალის გადაადგილების შესახებ შეატყობინეს.
ანიკ კესიანი
ანიკ კესიანს 2014 წელს 8-წლიანი პატიმრობა შეფუარდეს SMS-სთვის, რომელშიც ეწერა “დიახ, მოდიან” (ლაპარაკი იყო რუსულ ტანკებზე). 58 წლის კესიანი ადლერში დაიბადა, შემდეგ გათხოვდა და საცხოვრებლად აფხაზეთში გადავიდა. 1990-იან წლებში რუსეთში დაბრუნდა. ის ბაზარში გამყიდვლად მუშაობდა. ბოლო წლებში დიასახლისი იყო. მისი ქალიშვილი საქართველოს მოქალაქის ცოლია.
უფლებადამცველი ორგანიზაციის, “გუნდი 29”-ის მონაცემებით, რომელიც მის საქმეზე მუშაობდა, 2008 წლის აპრილში ანიკ კესიანს მისმა მეგობარმა მამუკა ლუკავამ მისწერა (ლუკავას შესახებ არანაირი ინფორმაცია არ არსებობს). მან ჰკითხა კესიანს, იყვნენ თუ არა სოჭის ქუჩებში ტანკები, რაც ქალმა დაუდასტურა – ტექნიკა ქალაქში ღიად გადაადგილდებოდა.
2013 წელს, კესიანი დაიბარეს რუსეთის უსაფრთხოების ფედერალურ სამსახურში, ხოლო 2014 წლის თებერვალში დააპატიმრეს. სახელმწიფოს დანიშნული ადვოკატის რჩევით, მან დანაშაული უმალ აღიარა. ქალმა, მხოლოდ განაჩენიდან შეიტყო, რომ ის თავის ქართველ მეგობარს თითქოს სამხედრო ტექნიკის ერთეულების რაოდენობას ატყობინებდა. განაჩენი კესიანს კრასნოდარის სამხარეო სასამართლომ გამოუტანა. ის სასჯელს მორდოვის ერთ-ერთ კოლონიაში იხდიდა.
მარინა ჯანჯღავა
მატარებლის ბორტგამცილებელს, ადლერელ მარინა ჯანჯღავას, მსგავსი გარემოებების გამო, 2012 წელს 12-წლიანი პატიმრობა შეუფარდეს. 2008 წელს მას მიმოწერა ჰქონდა საქართველოში მცხოვრებ გოჩა ჩხეტიასთან, რომელსაც “ეფესბეს” ვერსიით სამხედრო ძალისა და ტექნიკის ეშელონების გადაადგილების შესახებ უამბო. ჩხეტიას რუსული სპეცსამსახურები ქართული დაზვერვის აგენტად მიიჩნევენ. კრასნოდარის სასამართლომ ჯანჯღავა სახელმწიფო ღალატში დამნაშავედ ცნო. 2014 წელს როსტოვის სასამართლომ მას დამატებით 4-წლიანი პატიმრობა შეუფარდა მოხელისთვის ქრთამის მიცემის ბრალდებით და შეკრებითობის პრინციპით სულ 13-წლიანი სასჯელი განუსაზღვრა.
ჯანჯღავას ადვოკატის თქმით, განაჩენში ნათქვამია, რომ ქალი ცდილობდა მისი დაპატიმრებული ძმის გათავისუფლებას, რომელიც საზღვრის გადაკვეთისთვის დააკავეს და ამ მიზნით მოხელისთვის ქრთამის მიცემას შეეცადა პირველი განაჩენის შემდეგ კრასნოდარიდან ეტაპირების დროს. პუტინის ბრძანებაში მხოლოდ ქრთამთან დაკავშირებული განაჩენია ნახსენები.
ინგა თუთისანი
სმირნოვას ადვოკატის თქმით, პუტინს შეწყალების თხოვნით იგივე გარემოებებით სახელმწიფო ღალატისთვის გასამართლებულმა კიდევ ერთმა ქალმა, ინგა თუთისანმა მიმართა. თუთისანი საქართველოს მოქალაქეა. მისი შეწყალების შესახებ ჯერ არაფერი თქმულა. უფლებადამცველები აცხადებენ, რომ შეწყალების აქტების მიუხედავად, ყველა განაჩენს გაასაჩივრებენ.
ოქსანა სევასტიდი
ოქსანა სევასტიდი ვლადიმერ პუტინმა 2017 წლის მარტში შეიწყალა. სოჭის მკვიდრი სევასტიდიც სახელმწიფო ღალატისთვის გაასამართლეს. მისი ინტერვიუდან ცნობილი გახდა, რომ მისი საქმე ერთადერთი არ იყო. ქალის თქმით, საქმეს იძიებდნენ ერთი და იგივე გამომძიებელი, პროკურორი და მოსამართლე. SMS-სთვის განაჩენი გამოუტანეს კიდევ რამდენიმე ქალს, მაგალითად, საქართველოს მოქალაქე ეკატერინე ხარებავას, რომელსაც 6-წლიანი პატიმრობა შეუფარდეს და 2016 წელს ვადამდე ადრე გაათავისუფლეს.
