კანონს დაუმორჩილებელი წარწერები ურეკში

ურეკში, “იმედის ქალაქის“ მიმდებარე ტერიტორიაზე, სადაც ხილ-ბოსტნეულის ბაზარი არის გახსნილი, ქართულ წარწერებს იშვითად ნახავთ.

ოზურგეთის მუნიციპალიტეტის მერიის ზედამხედველობის განყოფილების უფროსი შალვა გაბრიჩიძე ამბობს, რომ გარე რეკლამებზე ქართულენოვანი  წარწერის ქონაზე აქტიურად მუშაობენ.

“მე რამდენჯერაც ჩავდივარ ურეკში, მაგაზე ბრძოლა მაქვს გამოცხადებული. ხეებზე იყო გაკრული გარე რეკლამები და არსად აღარ არის, ყველა ჩამოღებულია. აუცილებლად ვითხოვდით, რომ ქართული წარწერები უნდა ყოფილიყო. ორი დღე არ ვყოფილვარ და აუცილებლად მოვიკითხავ მაგ ამბავს“,  – თქვა გაბრიჩიძემ.

ამ დროისთვის გარესარეკლამოდ არაქართულენოვანი წარწერისთვის არავინ დაჯარიმებულა.

“ჩვენ ორდღიან მითეთებებს ვაძლევთ და ამ ხნის განმავლობაში უნდა მოიქცნენ კანონის შესაბამისად“, _ ამბობს შალვა გაბრიჩიძე.

“ახალგაზრდა  ადვოკატების“ იურისტი ია გოგნაძე ამბობს, რომ ქართული ენა საქართველოს ისტორიულ-კულტურული მემკვიდრეობაა და ის  სახელმწიფოებრიობის აუცილებელი პირობაა.

“სახელმწიფო ენობრივი პოლიტიკის ძირითად მიმართულებებს განსაზღვრავს საქართველოს პარლამენტი.

 საქართველოს კანონი  „სახელმწიფო ენის შესახებ“  განამტკიცებს სახელმწიფო ენის კონსტიტუციურ სტატუსს, ადგენს მისი გამოყენებისა და დაცვის სამართლებრივ საფუძვლებს, აწესრიგებს სახელმწიფო და არასახელმწიფო ენების ფუნქციონირებასთან დაკავშირებულ სამართლებრივ ურთიერთობებს.

კანონითა და სხვა საკანონმდებლო აქტებით დადგენილ ფარგლებში სახელმწიფო ენის კონსტიტუციური სტატუსის დაცვასა და პოპულარიზაციას, ქართული სალიტერატურო ენის ნორმების დადგენასა და დამკვიდრებას უზრუნველყოფს სახელმწიფო ენის დეპარტამენტი. რომელიც  საჯარო სამართლის იურიდიული პირია.

საქართველოს ტერიტორიაზე, განსაკუთრებით ტურისტულ ზონებში ხშირად გვხვდება მხოლოდ არაქართულენოვანი რეკლამები და აბრები, რომლებიც  გამოიყენება გარკვეული პროდუქციისა თუ დაწესებულების რეკლამირებისთვის.

პლაკატის, აბრის, აფიშის, რეკლამის, სხვა ვიზუალური ინფორმაციის ტექსტი სახელმწიფო ენაზე  უნდა შესრულდეს. საჭიროების შემთხვევაში, შესაბამისი ინფორმაცია შეიძლება მიეთითოს არასახელმწიფო ენაზედაც, ხოლო იმ მუნიციპალიტეტში, სადაც ეროვნული უმცირესობის წარმომადგენლები კომპაქტურად ცხოვრობენ,  აგრეთვე ამ  ეროვნული უმცირესობის ენაზე.

რეკლამის წარმოების, განთავსებისა და გავრცელების დროს წარმოქმნილ სამართლებრივ ურთიერთობებს აწესრიგებს საქართველოს კანონი „რეკლამის შესახებ“, რომლის მე-4 მუხლის  მიხედვით რეკლამა საქართველოს მთელ ტერიტორიაზე უნდა გავრცელდეს სახელმწიფო ენაზე.

საქართველოს კანონმდებლობის მიხედვით  მხოლოდ უცხოურენოვანი წარწერის განთავსება კანონდარღვევაა, რომელზეც რეაგირება უნდა მოახდინოს  სახელმწიფო ენის დეპარტამენტმა და ზედამხედველობის სამსახურმა. სახელმწიფო ენის დეპარტამენტის მოვალეობაა კანონის მოთხოვნათა დარღვევის შემთხვევაში მიმართოს შესაბამისი სახელმწიფო უწყებებს დამრღვევის მიმართ საქართველოს კანონმდებლობით დადგენილი პასუხისმგებლობის ზომის გამოყენების მოთხოვნით.

ამასთან,უშუალოდ მუნიციპალიტეტისა თუ საქალაქო ზედამხედველობის სამსახურს  გააჩნია უფლებამოსილება კანონით გათვალისწინებული წესების დარღვევის  შემთხვევაში დააჯარიმოს კანონდამრღვევი.

ჯარიმის ოდენობას განსაზღვრავს საქართველოს კანონი „საქართველოს ადმინისტრაციული საპროცესო კოდექსი“, რომლის 159-ე მუხლის მიხედვით: 

რეკლამის დაკვეთის, წარმოებისა და გავრცელებისათვის დადგენილი წესების დარღვევა, –გამოიწვევს ფიზიკური პირის დაჯარიმებას 500 ლარის ოდენობით, ხოლო იურიდიული პირის, დაწესებულების, ორგანიზაციის დაჯარიმებას – 3000 ლარის ოდენობით. იგივე ქმედება, ჩადენილი იმ პირის მიერ, რომელსაც ერთი წლის განმავლობაში ასეთი ქმედებისათვის შეფარდებული ჰქონდა ადმინისტრაციული სახდელი, გამოიწვევს დაჯარიმებას 5000 ლარის ოდენობით.

აბრის დაკვეთისა და განთავსებისათვის დადგენილი წესების დარღვევა გამოიწვევს ფიზიკური და იურიდიული პირების გაფრთხილებას.  1 თვის ვადაში გაფრთხილების შეუსრულებლობა − გამოიწვევს ფიზიკური პირის დაჯარიმებას 200 ლარის ოდენობით, ხოლო იურიდიული პირისას − 300 ლარის ოდენობით“, _ განმარტა ჩვენთან საუბრის დროს ია გოგნაძემ.