საქართველოს მთავრობის მიერ მიღებული რეგულაციების თანახმად მიმდინარე წლის ოქტომბრიდან ქვეყანაში ერთჯერადი პარკების ხმარებიდან ამოღება ეტაპობრივად მოხდება.
როგორც დღეს საქართველოს პრემიერ-მინისტრმა, მამუკა ბახტაძემ განაცხადა, გარემო ყველაზე მეტად ერთჯერადი პარკებისგან ბინძურდება.
როგორც ცნობილია, პოლიეთილენის ერთჯერადი პარკები ამერიკასა და ევროპაში 1950-იან წლებში გაჩნდა. ერთჯერად პოლიეთილენის პარკები აქტიურად გამოიყენება მაღაზიებში თუ სხვა სავაჭრო ადგილებში. პრობლემას კი გადაყრილი პარკები წარმოადგენს, რომელიც გარემოში ასეულობით წლის მანძილზე იშლება, როდესაც ბიოდეგრადირებადი პარკი გარემოში მოხვედრიდან 3-6 თვეში იწყებს დაშლას.
გარემოს დაცვის მიზნით, მსოფლიოში პოლიეთილენის პარკების აკრძალვა დაიწყეს.
გარემოს დაბინძურების გარდა, შეუძლია თუ არა რაიმე სახის ზიანის მოტანა პოლიეთილენის პარკს_ამ საკითხზე „გურია ნიუსი“ მწვანეთა მოძრაობა „დედამიწის მეგობრების“ თანათავმჯდომარეს, ნინო ჩხობაძეს ესაუბრა.
მისი თქმით, ქვეყანაში ძალიან თხელი პარკების აკრძალვა მოხდება, თუმცა, აღნიშნული გადაწყვეტილების სისრულეში მოყვანა ნელ-ნელა უნდა მოხდეს და ხელისუფლებას ხელი ხალხმაც უნდა შეუწყოს.
რაც შეეხება, თხელი პარკების უარყოფით მხარეს, ექსპერტი გარემოს დაცვის საკითხებში ამბობს, რომ დაბინძურების კერას წარმოადგენს და საქონლის დაღუპვა შეუძლია.
„საქართველოში მოხდება ძალიან თხელი პარკების აკრძალვა და მაქსიმალურად ცდილობენ, რომ მწარმოებლებმა შეზღუდონ მათი წარმოება. ისინი არ ექვემდებარებიან გადამუშავებას და დაბინძურების კერაა. ვთვლით, რომ ეს არის სწორი ნაბიჯი, მაგრამ კარგი ადმინისტრირება სჭირდება. პირველ რიგში, მოსახლეობამ უნდა დაუჭიროს მხარი მთავრობას და მაქსიმალურად შეეცადოს თხელი პარკი არ გამოიყენოს და უფრო სქელ პარკებზე გადავიდეს. ძალიან თხელი პარკები, რომლებიც დაფრინავს არის კატასტროფის ფასი. საქონელი ეტანება და შემდგომ იღუპება. ცელოფნის პარკები და ზოგადად პლასტმასი ნელ-ნელა უნდა ხმარებიდან ამოიღონ, თუ ევროპისკენ მივდივართ. ევროპამ დიდი ხანია უკვე აკრძალა. იქ შემოტანილია ბიოდეგრადირებადი პლასტმასები და ცელოფნები. ბევრ ქვეყანაში აქცენტი გაკეთებულია ქაღალდის პარკებზე და ეს უნდა მოხდეს საქართველოშიც, მაგრამ ამას ეტაპობრივად უნდა გაკეთება“,_ამბობს ჩხობაძე.
თუმცა, როგორც ვიკიპედიაში ვკითხულობთ, მხოლოდ გარემოს დაბინძურება და ბუნებაში მიმოფანტული პარკებისგან საქონლის და ზღვის ბინადრების დაღუპვა, არ არის ის მიზეზი, რატომაც მსოფლიო ქვეყნებში პოლიეთილენის თხელი პარკების ხმარებიდან ამოღება დაიწყეს.
თხელი პარკები, განსაკუთრებით გაწმენდილი პარკები, მოწამვლას იწვევს. გარდა ამისა, ამერიკის შეერთებულ შტატებში ყოველწლიურად 25 ბავშვი იგუდება, რის გამოც, პარკებში გაჩნდა გაფრთხილება, რომ ის ბავშვებისთვის აკრძალულია.
