15 ნოემბერს ოზურგეთის ფოლკლორის ცენტრში, ოზურგეთელი კოლორიტის, ქართული ფოლკლორის მოტრფიალის, მისი შენარჩუნებისა და განვითარებისთვის დაუღალავი მებრძოლის, იური ჩიხლაძის ლექსების წიგნის პრეზენტაცია, მისი ტრაგიკულად დაღუპვის შემდეგ, მოგვიანებით, მაგრამ მაინც შედგა.
ხელოვანისა და პოეტის შემოქმედებაზე, მის უდიდეს პიროვნულ თვისებებსა და ღვაწლზე ისაუბრეს ოზურგეთის ხელოვნების ცენტრის დირექტორმა ავთანდილ თავართქილაძემ, ჟურნალისტმა ნუგზარ ასათიანმა, მუნიციპალიტეტის მერიის სამსახურის უფროსმა მარინა ჯაფარიძემ. მათ, ასევე, მადლობა გადაუხადეს იური ჩიხლაძის შვილს, გიორგი ჩიხლაძეს, რომელიც იბრძვის, გააგრძელოს მამის საქმე.
„კაცი რომელიც ოზურგეთში ლექსად და სიმღერად იღვრებოდა, რომელიც მოდიოდა და მოჰქონდა, ლამის, სამყაროს სამყოფი პოზიტივი და თავისი უბრალოებით, თავმაბლობით, მორიდებულობით ისე გაუჩინარდა, ცრემლიც ვერ მივადევნეთ სათანადოდ. სჯობს გვიან, ვიდრე არასდროს, ჩვენ ეს შევძელით, სამომავლოდ კი ვეცდებით, მისი ხსოვნის უკვდასაყოფად საგანგებო ღონისძიებები გავგეგმოთ, ეს ხალხის მოთხოვნაა, _ გვითხრა ოზურგეთის მუნიციპალიტეტის ა(ა)იპ კულტურის ცენტრის ხელმძღვანელმა თამარ ნადირიძემ.
აღნიშნული ცენტრის ძალისხმევით დაიბეჭდა პოეტის და ხელოვანის წიგნი, რომელიც პრეზენტაციაზე მყოფთ საჩუქრად გადაეცათ.
წიგნის პრეზენტაციაზე საკუთარი ხელოვნება აჩვენეს იური ჩიხლაძის „ედელვაისის“ ძველმა და ახალმა წევრებმა, რომლის ხელმძღვანელი ახლა ხელოვანის შვილი, გიორგი ჩიხლაძეა.
იური ჩიხლაძე ქართული ფოლკლორის შენარჩუნების, განვითარების და პოპულარიზაციის საქმეში შეტანილი წვლილისთვის ღირსების ორდენით იყო დაჯილდოებული.
